Nyanndra Mun 16 - NYANMIƐN NDƐ'N 1998

Anannganman nin i mma'm be o nun titi

¹ Sɛ sran kun fua kɛ ɔ ´yo like wie'n, san Anannganman yɛ ɔ mɛn i wun atin, yɛ man ɔ kwla yo-ɔ.

² Like nga sran kun yo i sa'n, ɔ bu i klun lɔ kɛ like sɔ'n ti kpa i ti yɛ ɔ yo-ɔ, sanngɛ sran ng'ɔ si e klun akunndan mun'n yɛlɛ Anannganman .

³ Like nga ɔ waan a ´yo'n, fa wla Anannganman sa nun. Sɛ a fa wla Anannganman sa nun'n, nga a sunnzun'n ɔ ´kpɛn su.

⁴ Kɛ Anannganman ´yo like kun sa'n ɔ lɛ bo. Klunwifuɛ mun bɔbɔ, jɔlɛ dilɛ cɛn'n nun b'ɔ ´kle be nun'n, ɔ bu i akunndan sie.

⁵ Be nga be yo bé wun dandan'n, Anannganman i nyin ci be. Kannzɛ ɔ yo sɛ ɔ su yaci cɛ-man be.

⁶ Sɛ a ti sran kpa bɔ a di nanwlɛ'n, be yaci ɔ́ wun sa be cɛ wɔ. Sran nga i nyin yi Nyanmiɛn'n, ɔ klo-man sa tɛ yolɛ.

⁷ Sɛ Anannganman klo sran kun nantilɛ'n, sɛ ɔ wie i kpɔfuɛ mun bɔbɔ o, ɔ siesie i nin be be afiɛn.

⁸ Kɛ n ko wua nan n ko nyan mín wun'n, ɔ flunman kɛ n `di nanwlɛ nan n nyan akatua kaan.

⁹ Sran gugu i klun lɔ se kɛ: «N ´yo like nga sa, n ´yo like nga sa.» Sanngɛ Anannganman yɛ ɔ mɛn i wun atin-ɔn.

Famiɛn'm bé wun ndɛ

¹⁰ Anannganman fɛ i ndɛ'n wla famiɛn'n i nuan, ɔ man sɛ ɔ di jɔlɛ'n, ɔ kan-man ndɛ ng'ɔ ti-mɛn i nuan su'n.

¹¹ Jayɛbuɛ nin toe bɔ be ti sɛsɛ'n, be jɔ Anannganman klun. Jayɛbuɛ nga be o pata nun'n i kwlaa ti kɛ i sa nuan like sa.

¹² Sa tɛ yolɛ'n nin famiɛn kun fata-man. Afin nanwlɛ dilɛ'n yɛ man i sielɛ'n taka-a.

¹³ Ndɛ nga be kɛn i nin nanwlɛ'n, ɔ yo famiɛn'm be fɛ yɛ be klo sran ng'ɔ di nanwlɛ'n i sa.

¹⁴ Sɛ famiɛn kun fa ya'n, ɔ kwla kun sran, sanngɛ sɛ ngwlɛlɛfuɛ'n ɔ kpɛtɛ i lele'n, ɔ yaci.

¹⁵ Kɛ a wun srilɛ puɛpuɛ famiɛn'n nuan'n, wuun ɔ ti kɛ i mɛn'n nun sran'm be di alaje yɛ i aklunye'n ɔ ti kɛ nzue b'ɔ tɔ jɔ lika'n sa.

Sran nin sran tranlɛ

¹⁶ Sɛ be kpɛ akunndan'n i wun atin nan be nyɛn i'n, ɔ ti kpa tra sika ɔkwlɛ. Sɛ be kpɛ ngwlɛlɛ'n i wun atin nan be nyɛn i'n, ɔ ti kpa tra jɛtɛ ufue.

¹⁷ Sran nga be ti kpa'n be kaci bé sin be si sa tɛ yolɛ'n. Sran ng'ɔ ´nanti-ɔ ɔ sɛsɛ i wun'n, wuun i nguan'n yɛ ɔ ´sɛsɛ i lɛ-ɔ.

¹⁸ Bé nuan dilɛ'n yi be ase. Wun tulɛ'n kusu i sin sa'n yɛlɛ awieliɛ b'ɔ wie be'n.

¹⁹ Kɛ a nin wun tufuɛ'n amún bo ko yo kun amun ko cɛ like nga be nyɛn i alɛ nun'n be ko fa'n, ɔ flunman kɛ a kan ɔ́ wun ase nan a nin yalɛfuɛ'm be tran.

²⁰ Sran ng'ɔ bu akunndan'n ɔ wun i wun fɛ. Sran ng'ɔ fɛ i wun wla Anannganman sa nun'n, i wun jɔ i fɔuun.

²¹ Sran ng'ɔ si akunndan'n, be flɛ i ngwlɛlɛfuɛ. Sran ng'ɔ kan ndɛ amanniɛn su'n ɔ kan ndɛ-ɔ be fa.

²² Be nga be si akunndan'n, akunndan silɛ'n man be nguan. Yɛ be nga be lɛ-man akunndan'n, be afɔtuɛ'n yɛlɛ fia bɔ be bo'n.

²³ Be nga be si ngwlɛlɛ'n, be bu ndɛ sin nan b'a kan. Ɔ man ndɛ ng'ɔ fin bé nuan fite'n, ɔ ti ngwlɛlɛ ndɛ.

²⁴ Klolɛ ndɛ'n ti kɛ awɛma nzue sa, ɔ ti nɛnkɛn-nɛnkɛn, yɛ ɔ yo be wunnɛn'n i juejue.

²⁵ Atin wie o lɛ'n a wun i-ɔ, ɔ waan ɔ ti kpa sanngɛ i agualiɛ'n yɛlɛ wie.

²⁶ Awe'n ɔ su junman difuɛ'n bo ɔ di junman kpa, afin ɔ klo kɛ i ku yi.

²⁷ Sran tɛ'n ɔ bu akunndan tɛ, i nuan nun ndɛ'n ti kɛ sin sa.

²⁸ Utre ba yɛ gblɛfuɛ'n ɔ kpɛ-ɔ. Abla difuɛ'n ɔ saci janvuɛ nin janvuɛ be afiɛn.

²⁹ Sran gblugblufuɛ'n ɔ lɛkɛ i wiengu, yɛ ɔ fɛ i nanti atin ng'ɔ ti-man kpa'n su.

³⁰ Sran ng'ɔ muɛn i nyinma fii b'ɔ kɛkɛ i nuan bui'n kɛ ɔ ´kunndɛ sa tɛ ´yo'n, wuun ɔ'a dun mmua ɔ'a yo.

³¹ Be ti je'n ti kɛ famiɛn kle sa, afin nguan tɛnndɛn'n ti sran kpa'm be nvasuɛ.

³² Sran ng'ɔ fa-man ya ndɛndɛ'n, ɔ lɛ nyrun tra safunyrɛn. Yɛ sran ng'ɔ si i wun su nian'n, ɔ tra sran ng'ɔ de klɔ dan kun kpɛkuun ɔ sie klɔ sɔ'n.

³³ Like nga be waan be ´fa si Nyanmiɛn i klun sa'n, be to guɛ i ase, sanngɛ Anannganman bɔbɔ yɛ ɔ kle i klun sa sɔ nin-ɔn.