Nyanndra Mun 15 - NYANMIƐN NDƐ'N 1998

¹ Sɛ sran fa ya kan ndɛ tɛ kle wɔ nan a tɛ i su amanniɛn su'n, i ya'n ɔ jɔ. Jɔlɛ tɛ'n ɔ klɔklɔ ya.

² Ndɛ ng'ɔ fin ngwlɛlɛfuɛ'm bé nuan fite'n, sran ti-ɔ ɔ yo i fɛ. Be nga be si-man ngwlɛlɛ'n, be liɛ, ng'ɔ fin bé nuan fite'n, ɔ ti sinnzin ndɛ ngunmin.

³ Anannganman i nyin ta lika'n kwlaa. I nyin ta klunwifuɛ mun nin klun-ufuefuɛ mun .

⁴ Sran ng'ɔ kan ndɛ-ɔ, ɔ man sran wla gua ase'n, i sɔ sran liɛ'n ɔ man bé wun kpinndin be. Sran nga kusu bɔ i nuan nun ndɛ'n ti tɛtɛ'n, ɔ bo wla.

⁵ Ba ng'ɔ si-man ngwlɛlɛ'n, i si tu i fɔ-ɔ ɔ bu-mɛn i ndɛ. Sran nga be ´tu i fɔ b'ɔ ´kplin su lɛ'n, wuun ɔ ti ngwlɛlɛfuɛ.

⁶ Sran ng'ɔ di nanwlɛ'n, ninnge'm be sin yiɛ i. Sran nga kusu b'ɔ di-man nanwlɛ'n, ndɛnngan'n sin yiɛ i.

⁷ Ngwlɛlɛfuɛ'm bé nuan nun ndɛ'n ɔ man akunndan. Be nga be si-man ngwlɛlɛ'n, bé ti sɛ liɛ'n wo lɛ ngbɛn, ngwlɛlɛ ba kun sa nun-man nun.

⁸ Klunwifuɛ'm bé tɛ nga be yi man Anannganman'n ɔ yo i kain. Klun-ufuefuɛ'm be srɛlɛ liɛ nga be srɛ'n, ɔ ti .

⁹ Anannganman klo-man klunwifuɛ'm be nzuɛn'n. Be nga bɔ sa kpa'n yɛ be kunndɛ be yo'n, i klun jɔ bé wun.

¹⁰ Sran nga b'ɔ yaci atin kpa'n ɔ ko fa tɛ'n, i sɔfuɛ'n, be `tu i fɔ kpa. Nga kusu bɔ be tu i fɔ-ɔ ɔ fa-man'n, san wie'n cɛ yɛ ɔ ´kun i-ɔ.

¹¹ Sa kwlaa ng'ɔ o blɔlɔ lɔ'n, Anannganman si nun ndɛ. Nan nán se kɛ sran b'ɔ o yɛ'n i klun ndɛ'n .

¹² Sran ng'ɔ yo i wun dandan'n, ɔ klo-man kɛ be kɛn i nyrun ndɛ. Ɔ usa-man ngwlɛlɛ afɛ akunndanfuɛ wie sa nun.

¹³ Aklunjuɛ'n yɛ ɔ titi be nyrun-ɔn. Kɛ be klun jɔ-man'n, akunndan'n ti sannganwa.

¹⁴ Sran ng'ɔ bu akunndan'n, wuun ɔ klo kɛ ɔ ´si ngwlɛlɛ. Sanngɛ be nga sinnzin'n ɔ'a di be buɛ'n, finfin'n yɛ be waan be fa man be nan be yo-ɔ.

¹⁵ Nyrɛnnɛnfuɛ'n ɔ wo awlaboɛ'n nun titi. Aklunjuɛfuɛ'n kusu ɔ ti kɛ ɔ o cɛn dilɛ nun titi sa.

¹⁶ Sɛ n nyan kan nan min nyin yi Anannganman'n, ɔ flunman tra kɛ m'an nyan mín wun nan min klun ti-man jɔwa'n .

¹⁷ Kɛ n ko tran kan klolɛ nun-man lɛ bɔ sanngɛ nannin nnɛn kpakpa'n yɛ be di i lɛ'n, ɔ flunman kɛ n ko tran kan nnya ngbɛn yɛ be di i lɛ bɔ sanngɛ klolɛ o lɛ'n.

¹⁸ Sran ng'ɔ fa ya ndɛndɛ'n ɔ klɔklɔ utre. Sran nga kusu bɔ i anwlɛn'n ti wɛtɛɛ'n ɔ tra utre.

¹⁹ Fuɛnfuɛ'n i atin liɛ ng'ɔ sin nun'n ɔ ti owie ngunmin. Sran kpa'm be liɛ'n kusu ti weiin.

²⁰ Ba ng'ɔ ti akunndanfuɛ'n, i si klun jɔ i wun. Sinnglinfuɛ'n kusu ɔ bu-mɛn i nin sran.

²¹ Sran nga b'ɔ si-man ngwlɛlɛ'n, i sinnzin like ng'ɔ yo'n, ɔ yo i bɔbɔ fɛ. Sanngɛ sran ng'ɔ yo i like liɛ cɛcɛ'n, ɔ kunndɛ i nantiwlɛ atin klanman .

²² Like nga be ´yo-ɔ be usa-man ngwlɛlɛ afɛ'n, ɔ kpɛn-man su. Sanngɛ nga be ´yo-ɔ, afɔtuɛ manfuɛ'm bé ti yiɛ i wun kpanngban'n, ɔ yo ye.

²³ Sɛ be usa wɔ ndɛ nan a si su tɛ klanman'n, ɔ man wɔ aklunjuɛ. Ndɛ ng'ɔ ju i kanwlɛ cɛ kpɛkuun b'a kan'n, i fɛ b'ɔ yo'n, be kan-man.

²⁴ Sran ng'ɔ si ngwlɛlɛ'n ɔ fa atin nga be fa su-ɔ, be nyan nguan'n. Ɔ fa-man blɔlɔ liɛ'n su .

²⁵ Sran ng'ɔ yo i wun dandan'n, Anannganman saci i awlo'n, sanngɛ Anannganman kunngba'n sasa angboti bla'n i like liɛ ng'ɔ lɛ i'n.

²⁶ Anannganman i nyin ci akunndan tɛ'n. Ndɛ nga sran ti-ɔ, ɔ ukɛ i'n, yɛ ɔ jɔ i klun-ɔn.

²⁷ Sran nga i waan ɔ su kpli nyɛn i wun'n, i awlo'n i bolɛ i wun atin yɛ ɔ su kpɛ i lɛ-ɔ. Sran nga kusu bɔ be cɛ i like kɛ ɔ bua ato-ɔ ɔ kplin-man su'n, ɔ ´cɛ cɛcɛcɛ .

²⁸ Sran ng'ɔ ti sran kpa'n, ɔ bu sa sin nan ɔ'a tɛ ndɛ su. Klunwifuɛ'm be liɛ'n, be jranjran-man sran wun ndɛ tɛtɛ kanlɛ'n wun.

²⁹ Anannganman i ndɛ nun-man klunwifuɛ'm be ndɛ nun. Sran kpa'm be liɛ'n, be srɛlɛ nga be srɛ'n, ɔ fɛ i su sie i bo.

³⁰ Sɛ be nian ɔ nyrun klanman'n ɔ klun jɔ. Ndɛ fɛ'n kusu sanndi bé wun.

³¹ Sran nga be man i afɔtuɛ kpa b'ɔ fɛ i su sie i bo'n, be kwla fɛ i be wlɛ i ngwlɛlɛfuɛ'm be nun.

³² Sran nga i waan nán man be tu i fɔ'n, ɔ kpɔ i bɔbɔ wun. Sran nga be tu i fɔ b'ɔ fa'n, i sɔfuɛ'n ɔ ´yo ngwlɛlɛfuɛ.

³³ Bé nyin b'ɔ yi Anannganman'n ɔ man ngwlɛlɛ. Sɛ a dun mmua kan ɔ wun ase'n, yɛ a ´nyan nyrun-ɔn.