Nyanndra Mun 14 - NYANMIƐN NDƐ'N 1998

¹ Bla ng'ɔ ti ngwlɛlɛfuɛ'n, ɔ siesie i awlo'n. Bla ng'ɔ ti sinnglinfuɛ kusu'n ɔ saci i awlo liɛ'n.

² Sran ng'ɔ nanti klanman nanwlɛ su'n, i nyin yi Anannganman. Sran ng'ɔ nanti-man klanman nanwlɛ su'n, ɔ yo Anannganman i finfin.

³ Sinnglinfuɛ'n i ijɔlɛ nun be wun kɛ ɔ ti wun tufuɛ. Be nga be si akunndan'n bé nuan liɛ'n ɔ sasa be.

⁴ Kɛ nannin nga be di junman'n be nun-man lɛ'n, tanngannin'm be ka lɛ ngbɛn. Kɛ nnɛn'm be wunmiɛn fa ti'n, yɛ be fa nyan aliɛ kpanngban-an.

⁵ Lalofuɛ nanwlɛfuɛ'n ɔ bua-man ato, sanngɛ lalofuɛ gblɛfuɛ'n, ato ble kpa'n yɛ ɔ bua-a.

⁶ Sran ng'ɔ to sran mma'n, ɔ kunndɛ ngwlɛlɛ-ɔ, ɔ nyɛn-mɛn i. Sran ngwlɛlɛfuɛ'n, i sa wlɛ wunlɛ'n ɔ ti pɔpɔ ngbɛn i sa nun.

⁷ Nán fa ɔ́ wun mantan sinnglinfuɛ mun, afin bé nuan nun ndɛ'n ba kun sa su man-man wɔ ngwlɛlɛ.

⁸ Sran ng'ɔ ti akunndanfuɛ'n, ɔ niɛn i wun su kpa. Sinnglinfuɛ'n i sinnzin'n ti ɔ mlin.

⁹ Sɛ sinnglinfuɛ'm be yo sa wie'n, be klo-man kɛ be siesie. Sanngɛ sɛ sran kpa'n ɔ yo sa tɛ wie'n, i klun jɔ-man.

¹⁰ Klunngbɔ ng'ɔ o sran kun klun'n, i bɔbɔ kunngba yɛ ɔ si i-ɔ. I aklunjuɛ'n kusu kɛ ɔ fa ti ju'n, sran kun sa si-mɛn i.

¹¹ Klunwifuɛ'm be awlo'n ɔ bo. Sanngɛ sran kpa'm be liɛ'n ɔ trɛ.

¹² Atin wie o lɛ, an wun i-ɔ ɔ waan ɔ ti kpa, sanngɛ i agualiɛ'n yɛlɛ wie.

¹³ Sɛ sran kun i wla bo'n, ɔ ´sri-ɔ ɔ ´sri ngbɛn, nán kɛ i wla ɔ'a fi i awlaboɛ'n ti-ɔ.

¹⁴ Sran nga i nzuɛn ti-man kpa'n, ɔ fɛ i sa tɛtɛ'm bé su afɛ'n. Sran kpa'n i klun jɔ, sa kpa b'ɔ yo be'n be ti.

¹⁵ Sran nga i bɔbɔ ɔ kwla ukɛ-mɛn i wun'n, ɔ lafi ndɛ kwlaa nga be kan kle i'n su. Sran ng'ɔ si sa'n kusu, ɔ niɛn i ja ng'ɔ tu'n su kpa.

¹⁶ Sran akunndanfuɛ'n ɔ sro sa tɛ yolɛ'n. Ɔ man ɔ yo-man sa tɛ. Sran ng'ɔ ti sinnglinfuɛ'n i liɛ'n, ɔ tu i wun, afin ɔ lafi i bɔbɔ wun su.

¹⁷ Sran ng'ɔ fa ya ndɛndɛ'n, ɔ yo sa sinnzin su. Yɛ sran ng'ɔ bu-man akunndan kpa'n, sran'm be kpɔ i.

¹⁸ Sran nga be bɔbɔ be kwla uka-man be wun'n be like liɛ'n, yɛlɛ sinnzin'n, sanngɛ be nga be ti akunndanfuɛ'n, be si sa.

¹⁹ Klunwifuɛ'm bé nyin gua ase sran kpa'm be nyrun, sran tɛ'm be tran sran kpa'm be anuan'm be nyrun.

²⁰ Yalɛfuɛ'n i janvuɛ'n bɔbɔ kpɔ i, sanngɛ be di-man anyanbeunfuɛ'm be janvuɛ'm be yalɛ.

²¹ Sran ng'ɔ yo i wiengu finfin'n, wuun ɔ'a yo sa tɛ, sran ng'ɔ wun nyrɛnnɛnfuɛ'm be aunnvuɛ'n, i liɛ su ti ye!

²² ?Be nga be bu sa tɛ'n i akunndan'n, be mlin-man? Sran kpa'm be liɛ'n be klun ti ufue yɛ be di nanwlɛ.

²³ Junman kwlaa lɛ mmlusuɛ, sanngɛ ijɔlɛ fiaii'n, ɔ yo man be di yalɛ.

²⁴ Anyanbeun'n ɔ ti akunndanfuɛ'm be kɔmin su manlɛ like. Sinnglinfuɛ'm be ´ka be sinnzin'n nun titi.

²⁵ Sran nga be fɛ i lalofuɛ b'ɔ di nanwlɛ'n, ɔ de sran mun.

²⁶ Sran nga i nyin yi Anannganman'n, ɔ lɛ kisawlɛ cinnjin kpa, afin Anannganman sɛsɛ i mma mun.

²⁷ Bé nyin b'ɔ yi Anannganman'n, ɔ man be nguan tɛnndɛn. Ɔ yo man sa nga be yo-ɔ, be wu ndɛndɛ'n ɔ to fuan be .

²⁸ Sɛ famiɛn kun i sran'm be sɔnnin'n, i sɔ'n ɔ mɛn i anyrunnyan. Sanngɛ sɛ i sran'm b'a sɔn-man'n, ɔ tɔ.

²⁹ Sran ng'ɔ fa-man ya ndɛndɛ'n, ɔ ti ngwlɛlɛfuɛ. Sran ng'ɔ fa ya ndɛndɛ'n, ɔ ti sinnglinfuɛ .

³⁰ Bé wla b'ɔ gua ase'n ɔ yo man be yo juejue, sanngɛ anyinbloɛ ɔ ti kɛ ngbaciɛ b'ɔ o be owie'n nun'n sa.

³¹ Sran ng'ɔ mian-mian yalɛfuɛ mun'n, wuun ɔ su kpɛ Nyanmiɛn b'ɔ yili be'n i nzowa. Sran ng'ɔ si yalɛfuɛ'n i aunnvuɛ'n, ɔ bu Nyanmiɛn sran .

³² Sa tɛ nga klunwifuɛ'n ɔ yo'n ɔ mlin i, sanngɛ sran ng'ɔ ti kpa'n i wie cɛn'n nun bɔbɔ'n, i wla gua ase.

³³ Akunndanfuɛ'n ɔ si ngwlɛlɛ. ?Be kwla wun i sinnglinfuɛ'm be afiɛn?

³⁴ Sa nuan su yolɛ'n ɔ man nvle'n kun b'ɔ o sa'n i kɔmin su, sanngɛ sa tɛ'n ɔ gua nvle nunfuɛ'm bé nyin ase.

³⁵ Famiɛn'n ɔ yi i mantanfuɛ bɔ be si ngwlɛlɛ'n be ayɛ, sanngɛ ɔ fa ya be nga be yo-man sa kpa'n bé wun.