Nyanndra Mun 13 - NYANMIƐN NDƐ'N 1998

¹ Ba ng'ɔ si ngwlɛlɛ'n i si kan ndɛ kle i-ɔ, ɔ fa. Sanngɛ wun tufuɛ'n klo-man kɛ be tu i fɔ.

² Kɛ sran kun ´nyan like kpa di i lɛ'n, ɔ fin i nuan nun ndɛ'n. Gblɛfuɛ'm be liɛ'n ninnge kekleekle mun yɛ bé nyin o su-ɔ.

³ Sran ng'ɔ si i nuan'n sie'n, wuun ɔ si i wun sasa. Sran nga kusu b'ɔ ijɔ-ɔ ɔ lɛ-man kpɛbo'n, san mlinlɛ yɛ ɔ mlin-ɔn.

⁴ Like nga fuɛnfuɛ'n i anwlɛn o su'n, ɔ nyɛn-mɛn i le. Sran ng'ɔ ti juejue'n i liɛ'n, ɔ yo i like liɛ'n lele ɔ nyan su like.

⁵ Gblɛ ndɛ'n, nanwlɛ difuɛ'n klo-mɛn i. Klunwifuɛ'n ɔ fa suɛn'n kuɛkuɛ i wiengu.

⁶ Sran nga b'ɔ nanti nanwlɛ atin'n su'n, nanwlɛ'n fɛ i fia. Klunwi'n kusu ɔ kun klunwifuɛ'n.

⁷ Sran wie yo i wun anyanbeunfuɛ, sanngɛ kusu ɔ lɛ-man like fi. Wie kusu yo i wun yalɛfuɛ sanngɛ ɔ lɛ like kpa.

⁸ Anyanbeunfuɛ'n, sɛ be fuɛ i ti'n, ɔ fɛ i sika fa kpli i ti. Yalɛfuɛ'n i liɛ'n, kɛ ɔ o lɛ'n yɛ ɔ wo-ɔ, sran fi fuɛ-mɛn i ti.

⁹ Sran kpa'm bé wun kpaja be. Be ti kɛ kannin'n b'ɔ kpaja weiin sa. Klunwifuɛ'm be liɛ'n be ti kɛ kannin b'ɔ su nuan'n sa.

¹⁰ Tutre'n i like ng'ɔ o su'n yɛlɛ utre ba kpɛlɛ. Be nga be sie bé su, be ti afɔtuɛ'n, be sa nun yɛ akunndan'n wo-ɔ.

¹¹ Anyanbeun nga i nyanwlɛ'n ti-man weiin'n, ɔ jran-man. Kanngan difuɛ'n ɔ yo-man koklo.

¹² Like nga a lafi su kɛ a ´nyɛn i bɔ a nyɛn-mɛn i'n, ɔ kpɛ anwlɛn. Nga kusu bɔ a sunnzun kɛ a ´yo nan ɔ kpɛn su'n, ɔ wla wɔ fanngan.

¹³ Sran nga be kan ndɛ kle i-ɔ ɔ kpa su'n, ɔ bo kalɛ. Sran nga kusu bɔ be kpɛn i su-ɔ ɔ kpiti'n, ɔ nyan su muae.

¹⁴ Akunndanfuɛ'n i nuan nun ndɛ ng'ɔ kan'n, ɔ man nguan. Ɔ man wie'n ɔ to fuan sran.

¹⁵ Sran ng'ɔ si ngwlɛlɛ'n, be bu i sran. Klunwifuɛ'm be atin'n ɔ ti mlinlɛ atin.

¹⁶ Ngwlɛlɛfuɛ'n ɔ ´yo sa-a, ɔ bu i sin yɛ ɔ yo-ɔ. Sran ng'ɔ wun-man sa wlɛ kusu'n, ɔ yaci-mɛn i sinnzin'n i nglo yilɛ le.

¹⁷ Sran nga i klun yo wi'n, sɛ be sunmɛn i-ɔ, ɔ tɔ sa tɛ'n nun. Sran nga kusu b'ɔ ti sran kpa'n, sɛ be sunmɛn i-ɔ, ɔ siesie ndɛ ye.

¹⁸ Sran nga i waan nán be tu i fɔ'n, ɔ yaci-man yalɛ dilɛ, nyannzuɛn kusu yaci-mɛn i kunlɛ le. Sran nga kusu bɔ be tu i fɔ-ɔ ɔ fa sie'n, be yaci-mɛn i mo yolɛ le.

¹⁹ Like nga sran kun sunnzun kɛ ɔ ´yo, nan ɔ kpɛn su'n, i klun jɔ. Be nga be wun-man sa wlɛ'n, kɛ be se be kɛ be yaci sa tɛ'n i yolɛ'n, ɔ yo be ya sa fiaan.

²⁰ Sran ng'ɔ fɛ i wun mantan ngwlɛlɛfuɛ'n, ɔ kaci ngwlɛlɛfuɛ. Sran nga kusu b'ɔ fɛ i wun mantan sinnglinfuɛ'n, ɔ kaci sinnglinfuɛ.

²¹ Be nga be yo sa tɛ'n, sa yaci-man bé su tɔlɛ le. Muae'n kusu yɛ ɔ ti sran kpa'm be liɛ-ɔ.

²² Klun-ufuefuɛ'n i osu aja'n ɔ ti i anunman'm be liɛ. Klunwifuɛ'm be ninnge'm be kaci sran kpa'n i liɛ.

²³ Yalɛfuɛ'n i fie liɛ ng'ɔ di'n, ɔ fite aliɛ kaka. Sran wie'm be kusu be gblɛ'n ti be wu.

²⁴ Sran ng'ɔ fa-man ngble kɛn-mɛn i wa'n, wuun klolɛ yɛ ɔ klo-mɛn i-ɔ. Sran ng'ɔ klo i wa'n, ɔ jrɛnjrɛn-mɛn i fɔ tulɛ'n wun.

²⁵ Sran kpa'n ɔ di like i ku yi. Klunwifuɛ'n kusu awe'n yɛ ɔ kun i klun lɔ-ɔ.