Nyanndra Mun 12 - NYANMIƐN NDƐ'N 1998

¹ Sran ng'ɔ kplin su kɛ be tu i fɔ'n, i sɔ sran liɛ'n klo kɛ ɔ ´si akunndan. Sran ng'ɔ klo-man kɛ be tu i fɔ'n, ɔ ti sinnglinfuɛ.

² Sran ng'ɔ yo klun-ufue'n, Anannganman klun jɔ i wun. Sran nga kusu bɔ i klun akunndan'n ti tɛ'n, Anannganman bu i fɔ.

³ Klunwi yolɛ'n ɔ man-man sran i jransuɛ. Klun-ufuefuɛ'm be liɛ'n kɛ be o lɛ'n yɛ be wo-ɔ, be tɔ-man le.

⁴ Bla ng'ɔ ti bla kpa'n ɔ mɛn i wun i kɔmin su. Bla nga kusu b'ɔ gua i wun nyin ase'n, ɔ ti kɛ ngbaciɛ yɛ ɔ su kpaci i owie'n nun sa .

⁵ Sran kpafuɛ mun, sa ng'ɔ ti i su'n yɛ be kunndɛ be yo-ɔ. Sran tɛfuɛ'm be kusu be liɛ'n gblɛgblɛ ninnge mun yɛ be kunndɛ be yo-ɔ.

⁶ Klunwifuɛ'm bé nuan nun ndɛ'n ti kɛ aya sa. Sran ng'ɔ tɔ nun-ɔn, san wulɛ cɛ yɛ ɔ wu-ɔ. Sran kpafuɛ'm be kusu bé nuan waka'n yɛ be fa de sran mun-ɔn.

⁷ Kɛ klunwifuɛ'm be ko wu'n, wuun be liɛ a wie. Sanngɛ sran kpafuɛ'm be awlo bo'n ɔ jin lɛ ca!

⁸ Sran kun bɔ be ´klo i sa lɛ'n, ɔ fin i ngwlɛlɛ b'ɔ si i'n. Sran nga kusu b'ɔ fa sinnzin yolɛ'n fa cici i ti'n, bé nyin ci i sɔfuɛ'n.

⁹ Sɛ sran'm be bu-man wɔ like, nan ɔ li a lɛ wɔ afanniɛn kun b'ɔ su wɔ'n, i li flunman tra kɛ a yo ɔ́ wun kpakpa sanngɛ ɔ́ nuan nun aliɛ bɔ ngbɛn sa'n a nyɛn-mɛn i di-man'n.

¹⁰ Klun-ufuefuɛ'n i nnɛn'm be ndɛ lo i. Klunwifuɛ'n i liɛ'n, like nga be flɛ i aunnvuɛ silɛ'n ɔ si-mɛn i .

¹¹ Sran ng'ɔ di fie'n, ɔ nyan like di, i ku yi. Sran nga i liɛ finfin ninnge'n yɛ i waan be fa mɛn i man ɔ yo'n, i sɔ sran liɛ'n ɔ wun-man sa wlɛ.

¹² Klunwifuɛ'm be ninnge kunndɛlɛ liɛ'n, ɔ ti-mɛn i su. Sanngɛ sran kpa'n, ɔ trɛ i anwlɛn lele yɛ ɔ nyɛn i like liɛ-ɔ.

¹³ Sran tɛfuɛ'n i ato ng'ɔ bua'n, ɔ ti kɛ i bɔbɔ wun aya sa yɛ ɔ sua-a. Sanngɛ sran kpafuɛ'n, man sa'n bɔ tɔ i su sɛ, san ɔ ´fin nun fite.

¹⁴ Kɛ sran kun ´nyan muae'n, ɔ fin i nuan nun ndɛ'n. Junman nga sran kun di'n, i nuan like yɛ ɔ nyɛn i-ɔ.

¹⁵ Sran ng'ɔ wun-man sa wlɛ'n, i nyrun atin'n ti kunngba trelele, sanngɛ sran ng'ɔ ti akunndanfuɛ'n be tu i fɔ-ɔ ɔ fa.

¹⁶ Sran ng'ɔ wun-man sa wlɛ'n, ɔ fa ya ndɛndɛ, sanngɛ sran ng'ɔ ti ngwlɛlɛfuɛ be yo i sa-a ɔ sɔn i nun.

¹⁷ Sran ng'ɔ di nanwlɛ'n, ɔ yo man jɔlɛ difuɛ'm be fɛ-man, atofuɛ'n kusu gblɛ'n yɛ ɔ ti i liɛ-ɔ.

¹⁸ Sran ng'ɔ ´kan ndɛ-ɔ ɔ bu-mɛn i sin'n, i nuan nun ndɛ'n ɔ yra fiaan kɛ kue yɛ b'a fa wɔ sran sa. Akunndanfuɛ'm be kusu kɛ be kan ndɛ sa'n, ɔ klun tɔ nun sa fɔuun!

¹⁹ Sran ng'ɔ di nanwlɛ'n, ɔ lɛ wunmiɛn titi. Ato buafuɛ'n i liɛ'n, ɔ lɛ-man jransuɛ bɔ kaan sa.

²⁰ Be nga be bu akunndan tɛ'n, gblɛ'n wo be anwlɛn'n nun. Be nga kusu bɔ anuansɛ ndɛ yɛ be kan kle sran mun'n, aklunjuɛ'n ti be liɛ.

²¹ Sa tɛ fi sa nyan-man klun-ufuefuɛ'n. Sanngɛ sa tɛtɛ'n kwlaa ti sin yia klunwifuɛ mun .

²² Anannganman i nyin ci gblɛfuɛ mun. Be nga be di nanwlɛ'n be liɛ'n, i klun jɔ bé wun.

²³ Akunndanfuɛ'n ɔ ti ndɛ-ɔ, ɔ tɛ-mɛn i kan. Sran ng'ɔ si-man sa'n, i liɛ ndɛ'n i tilɛ yɛ, i jɔ bolɛ yɛ.

²⁴ Sran ng'ɔ klo junman yolɛ'n yɛ ɔ di kpɛn-ɔn. Ainkuɛn'n kusu i agualiɛ yɛlɛ akua yolɛ.

²⁵ Ngokoɛ'n ɔ yi sran ase. Ndɛ fɛ'n ɔ wla sran fanngan.

²⁶ Atin ng'ɔ ti kpa'n yɛ klun-ufuefuɛ'n ɔ fa kle sran-an. Klunwifuɛ'm be kusu be atin liɛ nga be fa su'n ɔ mlin be bɔbɔ.

²⁷ Nvɛɛfuɛ'n, ɔ nyan nnɛn-ɔn, ɔ kwlɛ-mɛn i nyintɔn. Sɛ be wu wɔ nan a ti like yofuɛ'n i kpa liɛ'n be nyɛn-mɛn i.

²⁸ Nanwlɛ atin'n i su yɛ nguan'n wo-ɔ. I sɔ atin liɛ'n be sin su-ɔ be nyan nguan .