Nyanndra Mun 11 - NYANMIƐN NDƐ'N 1998

¹ Toe nga be fa di ndrunmun'n, Anannganman nyin ci i. Toe ng'ɔ ti kpa'n yɛ ɔ klo i-ɔ .

² Tutre'n i sinma yɛlɛ nyannzuɛn. Akunndan'n kusu ti wun ase kanfuɛ'm be liɛ.

³ Sran nga be di nanwlɛ'n, nanwlɛ'n su yɛ be su-ɔ. Gblɛfuɛ'm be kusu be gblɛ'n yɛ ɔ kun be-ɔ.

⁴ Jɔlɛ dilɛ cɛn nun'n, anyanbeun'n yo-man like fi ye. Sanngɛ nanwlɛ dilɛ'n ɔ de be wie'n i nuan nun .

⁵ Nanwlɛ nga nanwlɛ difuɛ'n ɔ di'n, ɔ siesie i nyrun atin'n klanman, klunwifuɛ'n kusu i klunwi'n dunman nun ti ɔ ti mlinfuɛ.

⁶ Nanwlɛfuɛ'm be nanwlɛ nga be di'n, ɔ de be, klunwifuɛ'm be kusu be gblɛ nga be kpɛ'n, be bɔbɔ be ´ko tɔ nun.

⁷ Like nga klunwifuɛ'n sunnzun kɛ ɔ ´yo'n, kɛ ɔ ko wu'n, wuun ɔ'a wie. Anyanbeun ng'ɔ fɛ i wla'n gua su kɛ ɔ ´nyɛn i'n, ɔ ka ase.

⁸ Nyrɛnnɛn'n ɔ san klun-ufuefuɛ'n i wun, kpɛkuun klunwifuɛ'n ɔ'a ko kpɛn i osu.

⁹ Sran ng'ɔ nin Nyanmiɛn b'a bu'n, ɔ fɛ i nuan'n mlin i wiengu mun. Ngwlɛlɛ'n kusu, ɔ de be nga be nantilɛ'n ti kpa'n.

¹⁰ Kɛ klun-ufuefuɛ'm be di ye'n, ɔ ti klɔ wunmuan'n i aklunjuɛ. Klunwifuɛ'm be kusu kɛ be wu'n, srilɛ yɛ be sri be-ɔ.

¹¹ Sran kpa'm be fa be nuannzue klanman be man klɔ'n i kɔmin su, yɛ klunwifuɛ'm be kusu be fa bé nuan nun tɛ'n be bo klɔ.

¹² Sran ng'ɔ kɛn i wiengu wun ndɛ tɛ'n, wuun i sɔ sran liɛ'n wun-man sa wlɛ. Sran ng'ɔ si ngwlɛlɛ'n, ɔ ijɔ-man finfin.

¹³ Sran ng'ɔ tɔn i wiengu suɛn sin'n, i sɔ sran liɛ'n yiyi ndɛ bo. Sran ng'ɔ ti ndɛ-ɔ ɔ fa sie i klun'n, be lafi i su-ɔ ɔ yo ye.

¹⁴ Nvle ng'ɔ lɛ-man sunianfuɛ'n, ɔ bo. Sanngɛ sɛ afɔtuɛ manfuɛ'm be sɔn'n yɛ ɔ ti kpa-a.

¹⁵ Sran nga i wiengu usa afɛ b'ɔ jran nun'n, ɔ mian. Sran ng'ɔ yo-mɛn i sɔ'n, i wun ti i fɔuun!

¹⁶ Bla ng'ɔ ti klanman'n, be kannvun i. Yasua ng'ɔ ti like yofuɛ'n, ɔ nyɛn i wun.

¹⁷ Sran nga i klun ti ufue'n, i bɔbɔ wun kpa yɛ ɔ ´yo i lɛ-ɔ. Sran nga bɔ i klun yo wi'n, ɔ yo i bɔbɔ i wun tɛ.

¹⁸ Like nga sran tɛfuɛ'n yo'n, ɔ nyan-man su. Sran nga kusu bɔ kpa'n yɛ ɔ yo sin'n, kannzɛ ɔ yo sɛ san ɔ ´nyan su le .

¹⁹ Nian, kpa yolɛ'n ɔ man be nguan tɛnndɛn. Sran nga kusu bɔ klunwi cɛ yɛ ɔ yo'n ɔ ´wu i nuan wie.

²⁰ Be nga be klun akunndan'n ti-man kpa'n, Anannganman klun jɔ-man bé wun. Be nga be nzuɛn'n ti kpa'n, i sɔfuɛ mun yɛ i klun jɔ bé wun-ɔn.

²¹ Kannzɛ ɔ yo sɛ klunwifuɛ'm be fɔ tulɛ'n ɔ su to fuan-man be. Klun-ufuefuɛ'm be osu'n nun mma'm be liɛ'n, be nyan bé ti. Klunwifuɛ mun ɔ lɛ-man kɛ be su nyan-man be klunwi'n i nuan like.

²² Bla klanman b'ɔ si-man ngwlɛlɛ'n, ɔ ti kɛ sika ɔkwlɛ nga yɛ b'a fa wla kɔkɔti'n i bue nun sa.

²³ Like nga sran kpa'm be kunndɛ kɛ be ´yo'n ɔ ti kunngba, yɛlɛ kpa yolɛ. Like nga kusu bɔ klunwifuɛ'm be gugu kɛ be ´yo'n, ɔ kun Nyanmiɛn i ya.

²⁴ Sran wie o lɛ'n, sɛ ɔ nyan like'n, sran mun yɛ ɔ fa cɛcɛ be-ɔ, sanngɛ kusu ɔ nyɛn i wun. Wie kusu nyɛn i liɛ-ɔ ɔ yo i su anwɛn. Sanngɛ kpɛkuun yalɛ'n di i.

²⁵ Sran nga bɔ i klun ti ufue'n, ɔ nyɛn i klun-ufue sɔ'n i su nvasuɛ. Sran nga b'ɔ mɛn i wiengu nzue'n i kusu ɔ nyan nzue nɔn .

²⁶ Sran nga b'ɔ fɛ i ble liɛ'n ɔ fia'n, sannzan yɛ mɛnfuɛ'm be bo i-ɔ. Sran nga kusu b'ɔ yo i liɛ'n i atɛ'n, bé nuan klanman yɛ be yra be mɛn i-ɔ.

²⁷ Sran nga sa kpa'n yɛ ɔ kunndɛ yo'n, i wun yo Nyanmiɛn fɛ. Sran nga kusu bɔ sa tɛ'n yɛ ɔ kunndɛ yo'n, san ɔ ´nyan sa tɛ'n le.

²⁸ Sran ng'ɔ fɛ i wla'n kwlakwla guɛ i anyanbeun'n su'n, san tɔlɛ yɛ ɔ ´tɔ-ɔ. Klun-ufuefuɛ'm be liɛ'n, be bua kɛ waka nnya sa.

²⁹ Sran nga ndɛnngan yɛ ɔ kpɛ yi i awlo nun'n, ɔ nyan-man like fi. Sinnglinfuɛ'n ɔ ti ngwlɛlɛfuɛ'n i akua.

³⁰ Like nga klun-ufuefuɛ'n yo'n, ɔ mɛn i nguan tɛnndɛn. Akunndanfuɛ'n i nuan nun ndɛ'n ti, sran'm be su i su .

³¹ Sran kpa'n ɔ nyɛn i kpa yolɛ'n su nvasuɛ asiɛ'n su wa. Klunwifuɛ'n nin sran tɛfuɛ'n be kusu san be ´nyan be akatua liɛ .