Nyanndra Mun 10 - NYANMIƐN NDƐ'N 1998

Sran nin sran be nantilɛ tɛ'n i su nyanndra

¹ Salomɔn i nyanndra. Ba ng'ɔ si akunndan'n ɔ yo man i si klun jɔ dan. Ba ng'ɔ wun-man sa wlɛ'n kusu ɔ wlɛ i nin klunngbɔ.

² Aeliɛ tɛ trɔ'n, be nyan-man su. Sanngɛ aeliɛ kpa'n man be nguan.

³ Anannganman yaci-man sran kpa'n i awe'n nun, ɔ yaci-mɛn i awe'n nun man awe'n kun-mɛn i. Yɛ klunwifuɛ'n kusu, Anannganman fa-man like nga i konvi o su'n mɛn-mɛn i .

⁴ Sran nga i ja kan-man i sa kan-man'n, ɔ di yalɛ. Sanngɛ be nga bé sa waka'n ti kekle'n, be nyan bé wun.

⁵ Sran nga bɔ wawa'n kpɛn-ɔn ɔ kunndɛ aliɛ sie'n, i sɔ sran liɛ'n ɔ ti ngwlɛlɛfuɛ. Sran nga kusu bɔ aliɛ fitelɛ blɛ'n nun ɔ lafi'n, i sɔ sran liɛ'n, ɔ guɛ i si nin i nin bé nyin ase.

⁶ Sran kpa'n, san muae cɛ yɛ ɔ o i wunmuan su-ɔ. Klunwifuɛ'm be kusu, be ´kan ndɛ sa-a, ɔ waan ndɛ kpa yɛ be ´kɛn i lɛ-ɔ.

⁷ Sran kpa sa'n, i dunman liɛ'n ɔ jaso-man bé nuan'n nun le. Sanngɛ klunwifuɛ'm be dunman liɛ'n, ɔ tɔ nzue nun.

⁸ Sran nga be wuli i akunndanfuɛ'n, be kan ndɛ be kle i-ɔ, ɔ ti. Sran nga bɔ jɔlɛ tɛ yɛ ɔ o i nuan'n, ɔ ti mlinfuɛ.

⁹ Sran nanwlɛfuɛ'n, ɔ o i o lɛ bɔ diin cɛ! Sran nga kusu bɔ i atin'n ti-man ndɛnman su'n, sɛ ɔ fia-a, san wunlɛ cɛ yɛ be ´wun i-ɔ.

¹⁰ Sran ng'ɔ fa srongble kan ndɛ'n sɛ sa ´ba-a, ɔ fin i. Sran nga kusu b'ɔ di nanwlɛ'n, sɛ alaje ´ba-a, ɔ fin i.

¹¹ Sran kpa'n i nuan nun ndɛ'n ɔ man nguan. Klunwifuɛ'm be kusu, be ´kan ndɛ sa-a, ɔ waan ndɛ kpa yɛ be ´kɛn i lɛ-ɔ.

¹² Sran kpɔlɛ'n yɛ ɔ nin utre'n ba-a. Sanngɛ sran ng'ɔ klo sran'n, sɛ be yo i sa-a, ɔ yaci i kwlaa cɛ .

¹³ Sran ng'ɔ si ngwlɛlɛ'n, kɛ ɔ ´ijɔ sa'n be wun i, sanngɛ sran ng'ɔ wun-man sa wlɛ'n, ngble'n yɛ ɔ jin i sin'n su-ɔ.

¹⁴ Ngwlɛlɛfuɛ'm be si fa sie, sran ng'ɔ wun-man sa wlɛ'n, i nuan nun ndɛ liɛ'n ɔ fɛ i kɔ mlinlɛ'n nun.

¹⁵ Sikafuɛ'n i anyanbeun'n ɔ sɛsɛ i kɛ klɔ bɔ b'a si i wun nin talɛ'n sa. Yalɛfuɛ'n kusu i like ng'ɔ mlin i'n yɛlɛ i yalɛ'n.

¹⁶ Sran kpafuɛ'n i like ng'ɔ nyɛn i'n, kpa yɛ ɔ fa yo-ɔ. Sran tɛfuɛ'n kusu i like ng'ɔ nyɛn i'n, tɛ yɛ ɔ fa yo-ɔ .

¹⁷ Sran nga bɔ be tu i fɔ-ɔ ɔ fa sie i klun'n, muae cɛ yɛ ɔ fite su-ɔ. Yɛ sran nga kusu bɔ be kpɛn i su-ɔ ɔ kpiti-man'n, ɔ ti mlinfuɛ.

¹⁸ Sran nga bɔ i wiengu wun kpɔɛ o i klun b'ɔ fia su'n, i sɔ sran liɛ'n ɔ ti gblɛfuɛ. Yɛ sran nga kusu b'ɔ tɔn sran suɛn sin'n, i sɔ sran liɛ'n ɔ ti sinnglinfuɛ.

¹⁹ Sran ng'ɔ ijɔ ngboko'n, ɔ yaci-man sa tɛ yolɛ le. Sran nga kusu b'ɔ ijɔ-man plapla'n, ɔ ti ngwlɛlɛfuɛ.

²⁰ Sran kpa'n i nuan nun ndɛ'n ɔ ti kɛ sika mɔnnɛn'n sa. Sran tɛfuɛ'n kusu i klun akunndan'n ɔ yo-man like fi ye.

²¹ Sran kpa'n i nuan nun ndɛ'n ɔ man sran kaka kpa be fa atin kpa su. Sinnzin wie yɛ be nga be wun-man sa wlɛ'n be wu-ɔ.

²² Kɛ sran kun ´nyɛn i wun sa'n, ɔ fin Anannganman. Ɔ man anyanbeun fin-man sran.

²³ Sa tɛ yolɛ'n ti ngowa like sran ng'ɔ si-man ngwlɛlɛ'n i sa nun. Ngwlɛlɛfuɛ'n kusu i like liɛ b'ɔ si i'n yɛlɛ akunndan.

²⁴ Like nga bɔ klunwifuɛ'n sro i'n i cɛ yɛ ɔ tɔ i su-ɔ. Yɛ like nga kusu bɔ sran kpa'm be kunndɛ'n, Nyanmiɛn man bé sa fua su.

²⁵ Kɛ seke'n ko tu'n, a kunndɛ klunwifuɛ nin-ɔn a wun-mɛn i kun. Sanngɛ sran kpa'm be liɛ'n, be lɛ olui. Be olui'n ti anannganman .

²⁶ Kɛ wawle lomin ɔ nyan be je'n annzɛ sin wɛnsrɛn ɔ wlu be nyinman su'n, kɛ a sunman fuɛnfuɛ'n kɛ ɔ wla wɔ klunngbɔ sɔ-ɔ.

²⁷ Sɛ ɔ nyin yi Anannganman'n, a cɛ mɛn'n nun. Sanngɛ klunwifuɛ'm be nguan liɛ'n be kpɛ i sin.

²⁸ Sa nga klun-ufuefuɛ'm bé nyin o i sin'n, san be ´nyan su aklunjuɛ. Klunwifuɛ'm be sunnzunlɛ nga be sunnzun'n, i kwlaa tɔ nzue nun.

²⁹ Anannganman sasa sran kpa'n kɛ klɔ bɔ b'a si i wun'n sa. Sanngɛ sran nga sa tɛ'n yɛ be waan be fa man be man be yo'n, ɔ nunnun be.

³⁰ Sa fi yi-man sran kpa'n i ase le. Klunwifuɛ'm be liɛ'n, be su cɛ-man mɛn nga nun.

³¹ Sran kpa'n i nuan nun ndɛ'n ɔ ti akunndan nun ndɛ, gblɛfuɛ'n i taaman liɛ'n ɔ nin kpɛlɛ yɛ ɔ fata-a.

³² Sran kpa'n ɔ si ndɛ fɛfɛ kan, klunwifuɛ'm be liɛ'n, ndɛ tɛtɛ'n yɛ ɔ o bé nuan-an.