Ngwlɛ Yilɛ 5 - NYANMIƐN NDƐ'N 1998

Izraɛlfuɛ'm be Nyanmiɛn srɛlɛ

¹ Sa nga ɔ'a ju e su yɛ'n, Anannganman, nán ɔ́ wla fi. Ɔ bɔbɔ nian sokpalɛ bɔ y'a sokpa-a.

² Like ng'ɔ ti e aja like klonglo'n, kɛ e ´se yɛ'n, ɔ o sran wie'm bé sa nun. Sran ngbɛn'm be yɛ be tran e sua'm be nun-ɔn.

³ E lɛ-man si kun. E nin'm b'a ka angboti. Y'a ka e liɛ aika.

⁴ A ´wun kɛ e ´nɔn e bɔbɔ e nzue'n wie'n, wuun y'a yi sika. E bɔbɔ e yie nga y'a ko bu'n, e ´fa wlu klɔ'n nun'n san e ´yi sika.

⁵ E yalɛ klefuɛ'm be yaci-man e ndɛnngan. E lɛ-man wunmiɛn dewlɛ bɔ kaan sa, y'a fɛ siɛn'n.

⁶ E yo Eziptfuɛ mun nin Asirifuɛ'm be atannin nan y'a nyan é nuan nun aliɛ y'a di.

⁷ E nannan'm bɔ be yoli be sa tɛ'n be nun-man nun kun. I sɔ'n kpɛkuun é ti su yɛ bé sa tɛ sɔ'n i trɔ'n ɔ'a taka-a .

⁸ Kanga'm b'a kaci e min, e nyan-man sran nan ɔ'a de e bé sa nun .

⁹ Sɛ e ´kɔ aliɛ kunndɛlɛ'n, be flɛ kɛ e yo e nguan'n i atɛ. Afin alɛ kunfuɛ'm be kpa aawlɛ flɛnnɛn nun'n sa waa.

¹⁰ E wunnɛn'n ɔ yra e fiaan kɛ fur nun yɛ e o sa awe b'ɔ kun ye'n i dunman nun.

¹¹ Be nin Siɔn lɔ bla mun be lali kekle nun. Be nin Zida klɔ'm bé su talua mun be lali kekle nun.

¹² Be trali famiɛn i awlo lɔ sran dandan wie mun be boli be kɔmin. B'a bu-man kpɛnngbɛn oke'm be sran.

¹³ Gbanflɛn'm be sua yɛbuɛ nɔnnin-nɔnnin nga be fa yi ble'n i nzuɛn'n. Yie trɔ nɔnnin-nɔnnin'm be jin yasua kanngan'm bé ti su. Be ´nanti'n, wuun be ´tɔ.

¹⁴ Kpɛnngbɛn'm b'a yaci jɔlɛ diwlɛ lɔ kɔlɛ. Gbanflɛn'm b'a yaci be jru'm be bolɛ.

¹⁵ E si-man like nga be flɛ i aklunjuɛ'n kun. Y'a yaci able'm be silɛ. Y'a yo sɛnvuɛ mun siɛn'n.

¹⁶ E ti sika kle'n ɔ tu tɔli. Sa tɛ nga e yoli'n ti'n, y'a wun nyrɛnnɛn.

¹⁷ Ye anwlɛn b'ɔ ´kpɛ e klun'n, e nyinmuɛn b'ɔ ´jranjran é ti nun'n,

¹⁸ Siɔn oka'n bɔ ɔ'a yo flɛnnɛn'n ti-ɔ. Ɔ'a kaci nsoso'm be kpitawlɛ.

¹⁹ Anannganman, ɔ liɛ kɛ a o lɛ'n, a ti famiɛn manndimaan. Ɔ famiɛn bia'n, kɛ a ti su lɛ'n yɛ a ti-ɔ.

²⁰ ?Nguɛ ti yɛ ɔ́ wla ɔ ´fi é mlɔnmlɔnmlɔn sa-a? ?Nguɛ ti yɛ ɔ waan a ´yi e blo sa tititi nin-ɔn?

²¹ Cuɛn e bla ɔ́ wun Anannganman, man e mantan wɔ. Fɛ nga e di i laa'n, yo man e di i ekun.

²² ?Nan e blo mlɔnmlɔn yɛ a yili-ɔ? ?A ´fa e wun ya lele kpe nun?