Ngwlɛ Yilɛ 4 - NYANMIƐN NDƐ'N 1998

Sa ng'ɔ wa ju Zerizalɛm nvle'n i su'n i ti ngwlɛ yilɛ

¹ Ɔoo! ?Kɛ ɔ o yɛ'n, sika ɔkwlɛ'n ɔ'a kpa? ?Kɛ ɔ o yɛ'n, sika ɔkwlɛ jrɛiin'n ɔ'a saci? ?Kɛ ɔ o yɛ'n, Nyanmiɛn i sua i nun yɛbuɛ'm be tru klɔ'n nun anngɔnda'm be kwlaa be su? Cuekee!

² Siɔnfuɛ'm bɔ be ti kɛ sika ɔkwlɛ jrɛiin sa'n, yɛ andɛ b'a yo wannzo kɛ fa talie ngbɛn wie sa yɛ ! Cuekee!

³ Ɔliɛ nsoso mun bɔbɔ be man be mma'm be nyɔnflɛn. Sanngɛ min nvle i nun mmla mun be klunwi liɛ'n nga b'a yo'n ɔ waan klɔnsoklo bɔ be o aawlɛ flɛnnɛn nun lɔ'n sa.

⁴ Nzue we'n ɔ'a kun ba nɔnman'm be lele be taaman'n ɔ'a mantan. Ba kanngan'm be sun awe lele ngbɛn, sran fi fa-man aliɛ kɔnndɔnman bɔ kun kle-man be.

⁵ Sran nga b'a di aliɛ kpakpa'n lele ɔ'a ka be nun'n, a ´nian-an b'a glɔ awe'n dunman nun. Be nga bɔ kɛ ɔ fin be kaan nun lele sika ɔkwlɛ'n i nun yɛ be la kondo'n, a kɔ ´nian-an, be jin ofuɛ'n su be su kunndɛ like.

⁶ Sodɔmfuɛ'm be nunnunlɛ'n ɔ yoli be nyinma bulɛ kun nun. B'a wun-man bé wun yowlɛ bɔ mlɔnmlɔn. Sanngɛ be sa tɛ liɛ'n fɛ i wun wɔ, afin min nvle nunfuɛ'm be sa tɛ liɛ nga be yoli'n, ɔ ti dan tra be liɛ'n .

⁷ Famiɛn'm bɔ laa be ti saun Nyanmiɛn nyrun'n, bɔ fiɛn kaan sa nun-man bé wun'n, famiɛn'm bɔ laa be wunnɛn ba sa'n, sɛ i waan ɔ loko'n ɔ loko kɛ likɛ'n, bɔ be nyrun'n ɔ ti sa mlanmlanmlan'n,

⁸ siɛn'n b'a lu ble kɛ bunnde. A wun be-ɔ a wun-man be sran wlɛ kun. Be wunnɛn kplo'n bɔ cɛ yɛ ɔ sɛ be owie'n su-ɔ. Be kplo sɔ'n ɔ'a yo kokloko kɛ bui sa.

⁹ Be nga alɛ'n ɔ dili be'n, be wulɛ liɛ'n ɔ flunman tra be nga bɔ b'a wiewie lele b'a tra wiewielɛ su bɔ awe'n man be wu'n.

¹⁰ Ɔliɛ bla ta bɔ be klo-man be mma mun aɔwi'n, be bɔbɔ be tɔnnin be mma mun kplɔkplɔkplɔ! Be fa be yoli nnɛn be dili awe dan bɔ bli be nun'n i dunman nun .

*

¹¹ Anannganman fali ya dan. I sɔ ya ble liɛ'n, ɔ yoli i su like. Ɔ sɔli sin nuan fa yili Siɔn klɔ'n nun, sin'n ɔ yrali Siɔn klɔ'n mlɔnmlɔn, like fi ɔ'a ka-man lɛ.

¹² Sɛ laa sran wie seli kɛ: «Cɛn kun Izraɛlfuɛ'm be kpɔfuɛ'm be ´sin Zerizalɛm anuan nun be ´wlu klɔ'n nun,» famiɛn kun sa su fa-man, klɔ sran kun sa su fa-man.

¹³ Sa yalɛ'n b'ɔ juli'n, ɔ fin Nyanmiɛn i nuan ijɔfuɛ'm bé sa tɛtɛ'n nin Nyanmiɛn i nyrun jranfuɛ'm be aeliɛ tɛtɛ'n. Afin sran nga be ti sran kpa mun'n, Nyanmiɛn i sran sɔ'm be trali be klɔ'n nun be kunnin be.

¹⁴ Yɛ be kɔ klɔ'n nun sa du du du kɛ anyansifuɛ mun sa. Ɔ nin bé wun mmoja'n, be kan be tralɛ'n ɔ yo-man ye.

¹⁵ Kɛ be ´tɔtɔ be ba'n, sran'm be kpan kɛ: «Amun `cia bé wun! Sran nga be ´ba lɛ'n be ti fiɛn. Amun `cia bé wun ! Nán amun kan be!» Be wanndi sa ngbɛn be wun-man lika nga be wɔ-ɔ. Sɛ be ju nvle wie nun'n, lɛfuɛ'm be se kɛ: «Sran kɛ nga sa mun'n nán e mɛn liɛ nun wa yɛ be ka-a.»

¹⁶ Anannganman fali ya, ɔ man be boli je. Ɔ'a nian-man be lɔ kun. B'a bu-man Nyanmiɛn nyrun jranfuɛ'm be sran kun, nan se kɛ sran oke mun.

*

¹⁷ E waan wuun sɛ mɛn uflɛ wie nun sran'm be ´ba e delɛ o. Y'a kplongblo e nyinma'n lele y'a fɛ ngbɛn. Y'a nian, y'a nian, e klun fɛfɛfɛ, kpɛkuun sran fi ɔ'a ba-man e delɛ .

¹⁸ Be nian e su. E lɛ-man atin e fite kɔ-man e klɔ. Kannzu e blɛ liɛ'n ɔ'a mantan, yɛ ɔ'a ju yɛ, awieliɛ'n ɔ'a wie ye!

¹⁹ E yalɛ klefuɛ'm bé wun yo mmlɛ tra anunman nyin b'ɔ tu sin nglo lɔ'n. Be fuan e sin oka'm bé su. B'a sua-sua e wun aya aawlɛ flɛnnɛn nun sa trutrɛɛ.

²⁰ Sran nga Anannganman guɛli i ti su ngo b'ɔ fɛ i sieli é su'n, i b'ɔ man e wla'n gua ase'n, e seli e klun lɔ kɛ: «Bian nga, sɛ ɔ tran e su'n, e ´nyan tranwlɛ'n wie be nga'm be afiɛn!» I sɔ sran liɛ'n, ɔ'a tɔ e kpɔfuɛ'm be kunman'n nun .

*

²¹ Edɔmfuɛ mun, amun li man amun klun jɔ, amun `bo sro. Sanngɛ fɔ bulɛ'n ɔ wa tɔ amun su wie. Ɔ ´yo kɛ nzan sa, amun ´nɔn ´bo. Amun ´kpɛ bé bo nyanman nun .

²² Siɔnfuɛ mun, amun sa tɛ'n i nuan akatua'n ɔ'a wie yia. Be su tra-man amun lomuɛn kɔ-man mɛn wie nun kun. Edɔmfuɛ mun, amun sa tɛ liɛ'n i nuan akatua i manlɛ blɛ'n yɛ ɔ'a ju-ɔ. Sa tɛtɛ nga amun yoli'n, be ´bo i jɔ .