Ngwlɛ Yilɛ 3 - NYANMIƐN NDƐ'N 1998

Nyrɛnnɛn wunlɛ nin fɔnvɔlɛ ndɛ

¹ Kɛ be se kɛ sran ɔ'a wun i nyrun'n yɛlɛ min liɛ'n. Ɔ fali ya dan nan ɔ'a bo min nin nyantiaan.

² Kɛ ɔ `fa min wɔ lika ng'ɔ kpaja nun'n, nɛ́n i-ɔ. Aosin nun yɛ ɔ fa min tɔtɔ-ɔ.

³ Kɛ aliɛ'n ´cɛn b'ɔ ´san'n, min bolɛ kunngba yɛ ɔ si i-ɔ.

⁴ Ɔ man m'an yo sa kokloo. Min owie'n ɔ'a wie bubu.

⁵ Ɔ'a fa klunngbɔ nin afɛ'n ɔ'a sisi mín wun kɛ talɛ sa ɔ'a sin ɔ'a yia nun.

⁶ Ɔ'a fa min ɔ'a wlɛ i aosin tuun nun kɛ be bɔ be wuli, be si-man i afuɛ'n be liɛ'n sa.

⁷ I waan ɔ ´sisi mín wun nin talɛ nan nán n nyan fitewlɛ. Ɔ fa jrɔkɔ nɔnnin-nɔnnin cili min.

⁸ M'an kpan kɛ: «Be `de min o, be `de min o,» lele ngbɛn. Srɛlɛ nga n srɛ'n, ɔ tannin i kɔwlɛ'n i atin.

⁹ Ɔ kondo yɛbuɛ dandan mun fa tanninnin min atin'n nan n `fa atin uflɛ su m mlin.

¹⁰ Ɔ bu sa min nyrun kɛ nnɛn sroesroe nga be flɛ urs'n sa. Ɔ fia susrɛ nun kɛ asɔmɔli sa.

¹¹ Ɔ'a kaci min atin mun, ɔ'a titi min nun, ɔ'a yaci min kunngba lɛ.

¹² Ɔ cuɛnnin i ta'n i nyanman nun, ɔ fa sunnzunnin mín wun.

¹³ Kpɛkuun i ta mma'm be san min nvɛn nun bi bi bi!

¹⁴ Sran'm be kwlakwla be srisri min. Aliɛ ba kwlaa nun mín wun flɛn jue mun yɛ be to-ɔ.

¹⁵ Klunngbɔ nin aklunfian ɔ'a fa kun min kpo.

¹⁶ Ɔ yoli man m'an bobo aunnyan n je nun. Ɔ yoli man m'an la kondo ndutre nun.

¹⁷ Ɔ'a yo man like nga be flɛ i fɔundi'n, n si-mɛn i kun. Like nga be flɛ i muae'n, n lɛ-man wie kun.

¹⁸ N seli kɛ: «Min wunmiɛn'n ɔ'a wie, min sunnzunlɛ nun-man Anannganman su kun.»

*

¹⁹ Min nyrɛnnɛn nin min nyrun bɔ n wun i'n, kɛ mín wla kpɛn su'n, ɔ yo kɛ b'a saci like b'a man min sa.

²⁰ Ɔ mlin-man min klun le. I ti mín wla'n ɔ bo!

²¹ Sanngɛ sa nga n waan nán ɔ mlin min klun le'n, sa nga ti bɔ mín wla'n ɔ tɛ o lɛ'n yɛlɛ kɛ:

²² Anannganman i klun-ufue'n ɔ nian wie-man, i sran klolɛ'n ɔ tɛ o lɛ.

²³ Aliɛ kwlaa ng'ɔ cɛn'n, ɔ yi i klun-ufue'n i nglo. Anannganman, nanwlɛ, a nin sran san nun-ɔn, a kpɔci-mɛn i le .

²⁴ N wan yoo: «Anannganman ti min like kpa yɛ m'an nyɛn i-ɔ. Nga ti bɔ mín wla'n ɔ o i su'n yɛ ɔ o lɛ-ɔ.»

²⁵ Sran nga b'ɔ fɛ i wla gua Anannganman su'n, sran ng'ɔ mɛntɛn i'n, nanwlɛ, ɔ yo i kpa.

²⁶ Sɛ sran kun tran diin minndɛ Anannganman kɛ ɔ wa de i'n, i sɔ yolɛ i kpa liɛ ng'ɔ ti'n, nán sa yolɛ-ɔ.

²⁷ Sɛ sran kun wo sa nan i kaan nun sa'm be sɔn i nun'n, i sɔ liɛ'n, i kpa ng'ɔ ti'n, nán sa yolɛ-ɔ.

²⁸ Sɛ Nyanmiɛn sa sran kun nian'n, man ɔ trɛn i ngunmin bɔ diin .

²⁹ Man ɔ kɛn i wun ase lele tratra su, ɔ si-man nga cɛn wie lele Anannganman wa yo-ɔ .

³⁰ I li, ɔ `sie i fuka'n lɛ man be kpaci su, ɔ `yaci i wun lɛ man be kpɛ i nzowa tɛtɛ mun man ɔ ti i.

³¹ Afin e min Anannganman'n, kɛ ɔ o lɛ'n, sɛ ɔ kaci i sin si sran'n, ɔ kaci si-mɛn i sa mlɔnmlɔn .

³² Sɛ ɔ fa kekle yi i sran kun su'n, ɔ si i aunnvuɛ, afin i klun-ufue'n ɔ ti dan tratra su.

³³ Kɛ ɔ fa kekle'n ɔ yi i sran'm bé su'n bɔ be ´fɛfɛ'n, nán kɛ fɛ yɛ ɔ yo i ti-ɔ .

*

³⁴ Kɛ be ´yo mɛn wunmuan kun nun bisuafuɛ'm be fiaan'n,

³⁵ bɔ be ´yo sran kun i sa ng'ɔ nin klɔ sran fata-man Nyanmiɛn bɔ like fi nun-mɛn i sin'n i nyrun,

³⁶ kɛ be wun nanwlɛ'n jrɛiin bɔ kpɛkuun be di ndɛ kwlɛ'n, ?Kɛlɛ, be bu i kɛ Anannganman o lɔ ɔ wun-mɛn?

³⁷ ?Wan yɛ kɛ ɔ uke i nuan'n kpɛkuun nga i waan ɔ `ju'n ɔ'a ka lɛ ɔ'a ju nin-ɔn ? ?Nán Anannganman-an?

³⁸ ?Sa fɛ o, sa kekle o, nán Anannganman yɛ ɔ man atin yɛ be ju-ɔ?

³⁹ Sran fi lɛ-man atin se-man kɛ: «?Ɔ yo sɛ ti yɛ sa kɛ nga sa ju mín su-ɔ?» ?Sɛ ɔ li a yo sa tɛ lele bɔ sanngɛ a tɛ o nguan nun'n, a fɛ-mɛn i sɔ?

⁴⁰ Nantilɛ nga e nanti'n, man e bu i akunndan nan e `mantan Anannganman.

⁴¹ Kɛ e ´srɛ Nyanmiɛn bɔ e man é sa'n su'n , i kunngba nin-ɔn, sɛ ɔ ti like bɔ be man su-ɔ ɔ yo ye'n, wuun n se kɛ e man e anwlɛn'n su nglo e kle Nyanmiɛn.

⁴² E yoli sa tɛ, e yoli nyin kekle dan. Kɛ ɔ yoli sɔ'n kusu w'a yaci-man a cɛ-man ye.

⁴³ A fali ya kpa, a suli e su. W'a si-man e aunnvuɛ, a kunnin e.

⁴⁴ A fali nyanmiɛn ble'n a katali ɔ́ nyin kɛ ɔ ´yo nan e srɛlɛ'n ɔ'a kwla to-man wɔ lɔ'n ti.

⁴⁵ A yoli man y'a yo finfin, y'a kaci kɛ wla sa nvle kun nga'm bé nyrun.

⁴⁶ E kpɔfuɛ'm b'a nyan nuan, yɛ klɔklɔlɛ yɛ be klɔklɔ ye-ɔ.

⁴⁷ E liɛ'n, nga be yaci i nin ye'n, yɛlɛ sa sroesroe'm bɔ be kun srɛ'n, nin kunman'm be nun tɔlɛ'n, nin e mɛn'n i sacilɛ'n, ɔ nin sa yalɛ b'ɔ tɔ é su'n.

⁴⁸ Sa yalɛ sɔ ng'ɔ tɔli min nvle'n su'n ti, min nyinmuɛn nzue'n ɔ bu sɔ puu!

⁴⁹ Min nyinma'n ɔ'a kaci i liɛ kɛ nzue ti sa. Min nyinmuɛn'n ɔ bu sa ɔ lɛ-man kpɛbo.

⁵⁰ A ´wun kɛ min nyinmuɛn'n ɔ ´kpɛ'n, wuun kɛ Anannganman o nglo lɔ'n ɔ'a kpɛ i nyin ase ɔ'a nian min wa.

*

⁵¹ Sa nga ɔ'a ju min klɔ nun talua'm bé su'n, ɔ ti sa ya dan, n kwla nian-man.

⁵² Be bɔ m'an wun-man sa bɔ n yoli be'n, bɔ sanngɛ be nin min be lɛ i'n, b'a di mín wun koniɛn kɛ anunman yɛlɛ min sa.

⁵³ B'a tra min b'a yi i kunman nun. B'a fa yɛbuɛ b'a nannan i sɔ kunman liɛ'n su .

⁵⁴ Kunman'n nun nzue'n ɔ yili lele ɔ wieli min mɛn. N seli min wun kɛ: «Ɔo! M'an mlin min liɛ.»

⁵⁵ Anannganman, kɛ n wo kunman sɔ'n nun lɔ'n, n kpan flɛli wɔ.

⁵⁶ N seli wɔ kɛ: «Fa ɔ su sie min fɛfɛlɛ'n nin min kpanlɛ'n i bo. Nán bu ɔ́ su nun waka!»

⁵⁷ Kɛ n flɛli wɔ'n, a wunngeli mín wun. A seli min kɛ: «Nán srɛ kun wɔ .»

⁵⁸ Anannganman, a dili min jɔlɛ'n klanman mannin min. A deli min.

⁵⁹ Anannganman, a wunnin yalɛ bɔ be kleli min'n. Nian ndɛ sɔ nun kan man min.

⁶⁰ Sa nga be fa wlali min nun'n, a wunnin i. Gugulɛ tɛ nga be guguli mín wun'n, a wunnin i.

⁶¹ Nzowa nga be kpɛli min'n, Anannganman, a wunnin i. Gugulɛ tɛ nga be guguli mín wun'n, a wunnin i.

⁶² Be nga be kpɔ min'n bé kan ndɛ tɛtɛ mun be wɔ min cɛn kwlakwla, be akunndan bɔ be bu i min wun'n, ɔ ti tɛ.

⁶³ Mín wun flɛn jue mun yɛ be to i sa tititi-ɔ.

⁶⁴ Anannganman, sa nga be fa yoli min'n, nian su yo be wie.

⁶⁵ Bo be sannzan, kete be anwlɛn'n.

⁶⁶ Man ɔ ya'n ɔ tran be su! Nunnun be man be tu mɛn'n nun.