Ngwlɛ Yilɛ 1 - NYANMIƐN NDƐ'N 1998

Zerizalɛm lɛ-man janvuɛ kun

¹ Klɔ bɔ laa i su sran'm be sɔnnin sa kpanngbangban, b'ɔ yo sro'n, yɛ ɔ'a tɔ srolo yɛ! Cuekee! Klɔ'n bɔ laa i yɛ ɔ sie mɛn kun nga mun'n, klɔ bɔ laa ɔ lɛ nyrun tra klɔ'm be kwlaa'n, yɛ andɛ be miɛn i sufuɛ'm be kɛ be di junman yɛ. ?Ɔ yo sɛ yɛ ɔ'a ka aika sa-a? Cuekee!

² Kɔnguɛ'n, ngwlɛ'n yɛ ɔ yi-ɔ, i nyinmuɛn'n ɔ gua sa puu. Be b'ɔ nin be trali janvuɛ'n, kun sa fɔnvɔ-mɛn i. Be kwlaa be wieli i wanndi, b'a tu bé nyin b'a wɔ i .

³ Zidafuɛ mun'n, kɛ be ko wun nyrɛnnɛn'n yɛ be wunnin i-ɔ. Kanga nga be flɛ-mɛn i kanga'n yɛ be su di-ɔ. B'a tra be lomuɛn b'a ɔ nvle wie nun. Be o be nga be si-man Nyanmiɛn'n be afiɛn, nán wunmiɛn kaan sa yɛ be ko de-ɔ. Be yalɛ klefuɛ'm bé su be su, be waan nán be nyan bé ti nɔn nzue, be mian-mian bé sa fii!

⁴ Siɔn i atin'm b'a yo sa nvuɛn-nvuɛn-nvuɛn siɛn'n, sran fi ba-man lɛ kun kɛ ɔ wa di cɛn. Klɔ gua'n ɔ'a tɔ sɔ srololo! I Nyanmiɛn nyrun jranfuɛ'm be fɛfɛ-man ngowa. I talua'm be wla'n ɔ ti bowa dan. Nanwlɛ, klunngbɔ'n ɔ'a yi Siɔn lele ɔ'a kpe nun.

⁵ Zerizalɛm i kpɔfuɛ'm be yɛ b'a kwla-a. B'a nyan manndran. I sa tɛ beblebe b'ɔ yo be'n ti, Anannganman ɔ'a kɛn i ase. I mma'm be yɛ be kpɔfuɛ'm be ´kankan be ´dun mmua be nyrun yɛ, be ´ko fa be yo be kanga .

⁶ Siɔn i anyrunnyan like'n kwlaa yɛ b'a fa be be su fa kɔ yɛ. I famiɛn i awlo lɔ sran dandan'm be ´kɔ sa ɔ waan flete wie bɔ b'a nyan-man ijre b'a di-man bɔ be su wanndi fakafaka koniɛn difuɛ i nyrun'n sa.

⁷ Kɛ Zerizalɛm ´wun nyrɛnnɛn b'ɔ ´wlan daan'n, blɛli yɛ ɔ'a wun kɛ kannzu laa ɔ o fɛ nun-ɔn. Kɛ Zerizalɛmfuɛ'm be kpɔfuɛ'm be fali klɔ'n, bɔ sran fi ɔ'a ba-man be delɛ'n, ɔ yoli be kpɔfuɛ'm be klanman, ɔ kleli be srilɛ.

⁸ Zerizalɛm i sa tɛ nga ɔ'a yo be'n, be ti beblebe sɔ ngbɛn. Ɔ man i ti siɛn'n i wun yo sran'm be tɛ. Ɔ'a yo kɛ bla bɔ ɔ'a yo mannza'n sa. Be bɔ titi be yɛyɛ i'n, be yo i finfin siɛn'n, afin sɛ ɔ ti sran'n, wuun b'a wun kɛ i bo ti ngbɛn. I bɔbɔ'n kusu ɔ su fɛfɛ, ɔ to i nyin blo.

⁹ I mannza mmoja'n wo i tralɛ nun badaa. Sa ng'ɔ juli i su'n ɔ fuli i bɔbɔ nun. I nyin b'ɔ bo i bla-a ɔ'a tɔ. Sran bɔ kun sa ɔ'a fɔnvɔ-mɛn i. Yɛ i waan: «Anannganman, nian nyrɛnnɛn bɔ n wo nun-ɔn, nian kɛ min kpɔfuɛ'n ɔ'a kwla min b'ɔ nyinmɛn-nyinmɛn i wun-ɔn.»

¹⁰ I kpɔfuɛ'n ɔ fɛli i sa sieli i ninnge kpakpa'n kwlaa su. Minniɛn nga Nyanmiɛn tanninnin be kɛ nán be wlu i sua nun'n, be wluli nun i bɔbɔ nyrun lɛ sa weiin .

¹¹ Izraɛlfuɛ'm be kwlakwla be su kplin. Be sa sin ɔ'a bubu be bé nuan nun aliɛ bɔ be nyɛn-mɛn i'n ti. Be ninnge kpakpa mun'n, be fa toli aliɛ kɛ ɔ ko yo nan b'a nyan wunmiɛn kan'n ti. Zerizalɛm waan: «Anannganman, nian kɛ m'an sokpa-a!»

*

¹² Ɔ se ekun kɛ: «Amun kwlaa bɔ amun sin wa'n, amun `nian! ?Afɛ ng'ɔ nin min liɛ'n sɛ'n, amu'an wun wie le? Kɛ Anannganman fɛli i ya dan'n, ɔ kleli min nun.

¹³ Ɔ jran nglo lɔ toli sin yili min su, ɔ yo man sin sɔ'n ɔ yra min owie nun lɔ fiaan! Ɔ suali mín bo aya, ɔ finndinnin min yili i lɔ. Ɔ man sran fi mantan-man min, n wo nyrɛnnɛn nun sa tititi.

¹⁴ Sa tɛ nga n yoli'n, ɔ'a fa kaci kɛ aya nyanman sa, ɔ'a sie i go, ɔ'a fa wla min kɔmin. E Min'n man n lɛ-man wunmiɛn kun. Sran ng'ɔ yili be kɛ be nin min be wa kun'n, n jran be nyrun-ɔn ɔ yo-man ye.

¹⁵ Sonja nga be o mín sa nun'n, e Min'n ɔ'a kpla be ɔ'a yi i lɔ. Ɔ yiali alɛ kunfuɛ kpanngban kɛ be nin min gbanflɛn'm be wa kun. E Min'n ɔ'a cuɛn min bɔ n ti Zida i wa bla'n min nun kɛ be fa cuɛn vinyi mma i nzue'n sa.

¹⁶ I ti yɛlɛ muɛn bɔ n kplo bɔ min nyinma ɔ'a blo mín ti nun kankankan'n. Min fɔnvɔfuɛ'n b'ɔ ko man min wunmiɛn'n, ɔ'a wanndi min. Min mma'm be liɛ a wie, min wunmiɛn ju-man min kpɔfuɛ'n i liɛ'n nun.

*

¹⁷ Siɔn tinngɛli i sa, sran fi ɔ'a sɔ-man nun nan se kɛ ɔ ´fɔnvɔ i. Anannganman seli nvle nga be mantan Izraɛlfuɛ'm be lɛ'n kɛ be nin be be `nyɛn i. Zerizalɛm i wun yo nvle kun nga'm be tɛ siɛn'n.

*

¹⁸ Nga Anannganman yoli'n, i su-ɔ, afin ndɛ ng'ɔ kannin'n, m'an fa-man su. Amun bɔ amun o wa'n, amun `sie amun su tie. Amun `nian afɛ ng'ɔ o mín su'n. B'a tra min talua nin min gbanflɛn mun lomuɛn b'a ɔ mɛn wie nun.

¹⁹ N flɛli be nga laa be klo min'n lele ngbɛn. B'a yi min ase. Min Nyanmiɛn nyrun jranfuɛ mun nin min afɔtuɛ manfuɛ mun bɔ be ´kunndɛ aliɛ be ´di nan b'a nyan wunmiɛn kan'n, be wuli klɔ nun.

²⁰ Anannganman, nian min nyrun bɔ n ´wun i-ɔ. Min anwlɛn'n ɔ'a kpɔtɔ min klun. Min akunndan'n ɔ'a sanngan min klun sa mlɔnmlɔn nyin kekle bɔ n yoli'n i dunman nun. Alɛ'n ɔ'a di min mma mun klɔ gua'n su. Kɛ a wlu sua'm be nun'n ɔ waan be bɔ b'a wu'n be sua-a.

²¹ Kɛ n ´fɛfɛ'n be tili, sanngɛ sran kun sa ɔ'a fɔnvɔ-man min. Min kpɔfuɛ'm be kwlakwla be tili i kɛ sa ɔ'a nyan min. Sa nga wɔ man ɔ nyannin min'n, kɛ be tili'n, be klun'n jɔli dan. Cɛn nga a kɛnnin i ndɛ'n, yo mɛn i sɔ cɛn liɛ'n ɔ ju. Man ɔ ju nan be `yo kɛ min sa .

²² Nán ɔ́ wla fi be klun wi'n su. Sa nga a fa yoli min'n, mín nyin kekle'n ti-ɔ, fɛ i sɔ sa'n yo be wie. M'an kplin lele min anwlɛn ba'n ɔ yo min ya siɛn'n.»