Neemi 9 - NYANMIƐN NDƐ'N 1998

Izraɛlfuɛ'm bé sa tɛ i nanwlɛ dilɛ

¹ Anglo kunngba'n i le ablaɔn-nin-nnan'n su, Izraɛlfuɛ'm be yiali kɛ be ´ci nglɛmun. Be wlali bajɛ tralɛ, be fali ndutre utuli bé ti'n su.

² Ɔ man Izraɛlfuɛ sɔ'm be yacili be nga be ti-man Zuif'm be lɛ, be cuɛnnin be wun kɛ be ´ko di be bɔbɔ bé sa tɛ'n ɔ nin be nannan'm be liɛ'n i nanwlɛ.

³ Be kanngannin Anannganman be Nyanmiɛn'n i mmla fluwa'n nun dɔ nsan kleli be. Kɛ ɔ ´yo sɔ'n, wuun be jin nglo, kpɛkuun be kotoli Anannganman be Nyanmiɛn'n i nyrun, be dili be sa tɛ'm nanwlɛ'm dɔ nsan ekun.

⁴ Zozie, Bani, Kadmiɛl, Sɛbania, Bini, Serebia, Bani, yɛ Kɛnani be jaso jrannin Levifuɛ'm bé jranwlɛ'n su lɔ, nan b'a kpan flɛ Anannganman be Nyanmiɛn'n.

⁵ Yɛ Zozie, Kadmiɛl, Bani Asabnia, Serebia, Ɔdiza, Sɛbania, ɔ nin Pɛtakza bɔ be ti Levifuɛ'n, be seli kɛ: «Amun `jaso be la Anannganman amun Nyanmiɛn'n i ase titi, nán amun yaci i le.» «Man be manman ɔ dunman b'ɔ yo nyɛnmɛn'n. Ɔ dunman'n ti dan tra su, be kwla mɛnmɛn-mɛn i nin bé nuan'n.

Sran'm be kwlaa be Nyanmiɛn b'ɔ be srɛli'n i ndɛ

⁶ Ɔ kunngba yɛ a ti Anannganman nin-ɔn. Wɔ yɛ a yili nyanmiɛn ng'ɔ o nglo yɛ nin-ɔn, ɔ nin ng'ɔ o i sin lɔ nglo mmua kpa lɔ nin-ɔn, ɔ nin i su nzraama mun-ɔn. Wɔ yɛ a yili asiɛ'n nin i su ninnge'n kwlaa-a. Wɔ yɛ a yili jenvie'n nin ninnge kwlaa nga be o nun nin-ɔn, wɔ yɛ a man ninnge'm be kwlaa be nguan-an. Nglo lɔ tinminfuɛ'm be koto ɔ bo.

⁷ Anannganman Nyanmiɛn, wɔ yɛ a kpali Abram-ɔ. Wɔ yɛ man ɔ fin Ir b'ɔ ti Babilɔni* i klɔ'n kun'n i nun fiteli, nan w'a tɔn i dunman kɛ Abraam nin-ɔn.

⁸ A wunnin kɛ ɔ ti nanwlɛfuɛ nan a nin i b'a tra aenguɛ. A seli i kɛ a ´fa Kanaanfuɛ mun, ɔ nin Ɛtfuɛ mun, ɔ nin Amɔrfuɛ mun, ɔ nin Ferezfuɛ mun, ɔ nin Zɛbisfuɛ mun, ɔ nin Girgazfuɛ mun be mɛn'n ´man i osufuɛ mun. Yɛ nga a seli kɛ a ´yo'n, a yoli, afin a ti kpa.

⁹ A wunnin fɛlɛ nga e nannan'm be fɛli Ezipt lɔ'n, a tili be nɛn'n kɛ be kpan flɛli wɔ ndɛma jenvie'n wun lɔ'n.

¹⁰ A yili atrɛ sunman yɛ a yoli abonuan sa dandan Ezipt famiɛn'n, nin i mantanfuɛ mun, ɔ nin i mɛn nunfuɛ mun be ti, afin a wunnin kɛ be su yo e nannan'm be tɛtɛ. Ɔ dunman'n fuli, lele ndɛ ɔ tɛ fu.

¹¹ A kpɛli jenvie nun mannin be. Be nantili aunnyan siɛ'n su jenvie'n i afiɛn be sinnin. Yɛ be nga be su be su'n, a yoli man be mlɔnnin bunman'n nun kɛ yɛbuɛ bɔ b'a yi i nzue dan nun sa.

¹² Wia nun'n, a dun mmua be nyrun, sin wɛnsrɛn'n ɔ ja tiaan yɛ ɔ kle be atin nin-ɔn. Kɔnguɛ a dun mmua be nyrun, sin taaman'n ɔ ja tiaan yɛ ɔ kpaja atin nga be sin su'n su-ɔ.

¹³ A fin nyanmiɛn su lɔ jrali Sinai oka'n su. A kannin ndɛ kleli be. A kleli be sa nuan su yolɛ mmla mun, ɔ nin mmla nga be ti nanwlɛ mun. A fali atin klelɛ mmla mun, nin ɔ ndɛ kpakpa mun sieli be nyrun.

¹⁴ Wɔ man ɔ sufuɛ Moiz kleli be wunmiɛn-delɛ-cɛn* b'ɔ ti wɔ liɛ'n, nin ɔ ndɛ mun, nin wɔ atin klelɛ mmla mun.

¹⁵ Kɛ awe kunnin be'n, a mannin be nyanmiɛn su lɔ kpaun be dili. Kɛ nzue we kunnin be'n, wɔ man nzue fin yɛbuɛ nun fiteli, be nɔnnin. Wɔ man be bali mɛn nga a tali nda kɛ a ´fa man be'n, i falɛ .

¹⁶ Kpɛkuun e nannan'm b'a kan-man bé wun ase. Be yoli nyin kekle, b'a fa-man ɔ mmla'n su.

¹⁷ Bé nyin ɔ'a yi-man wɔ. Bé wla fili atrɛ fanunfanun nga a yili be'n. Be kpali be bɔbɔ bé su kpɛn. Be waan san be ´sa be sin Ezipt lɔ be ko yo kanga ekun. Sanngɛ ɔ liɛ'n, a ti Nyanmiɛn kun bɔ a yaci sa tɛ'n cɛ. A si aunnvuɛ, sran yo wɔ annvɔ. A fa-man ya ndɛndɛ, ɔ klun-ufue liɛ'n be kan-man, ɔ man w'a yi-man be ase.

¹⁸ Be kloli sika ɔkwlɛ be fa yoli nannin b'ɔ ɔ'a kpɛ cro'n, kpɛkuun be waan: ‹Izraɛlfuɛ mun, amun Nyanmiɛn ng'ɔ fali amun Ezipt lɔ bali'n yɛ!› Nanwlɛ be wɔli wɔ safle dan.

¹⁹ Sanngɛ wɔ aunnvuɛ silɛ dan'n ti w'a yi-man be ase aawlɛ flɛnnɛn'n nun. Wɛnsrɛn b'ɔ kle be atin wia nun'n, ɔ nin sin b'ɔ kpaja be nyrun kɔnguɛ'n b'a kpɔci-man be le.

²⁰ A fali ɔ Wawɛ'n mannin be kɛ ɔ kle be ngwlɛlɛ. W'a yaci-man ɔ mani'n be fa manlɛ le. A mannin be nzue kɛ be nɔn.

²¹ A niannin be lika aawlɛ flɛnnɛn'n nun afuɛ ablanan. B'a mian-man like fi wun. Be tralɛ'm b'a titi-man, bé ja'm b'a wunwun-man.

²² A fali mɛn nin nvle mun mannin be. Be fali mɛn nga be mantan be lɛ'n mun. Siɔn b'ɔ ti Ɛsbɔn famiɛn'n i mɛn'n, ɔ nin Ɔg b'ɔ ti Bazan famiɛn'n i mɛn'n.

²³ Yɛ a mannin be osu kpanngban kpa kɛ nyanmiɛn su lɔ nzraama mun sa. Yɛ a fali be wluli mɛn nga a seli bé nannan'm be kɛ ɔ ´yo be liɛ'n nun.

²⁴ Be mma'm be wluli mɛn sɔ'n nun nan b'a fa. Wɔ man Kanaanfuɛ mun bɔ be ti mɛn sɔ'n nunfuɛ'n, b'a nyan-man jranwlɛ be nyrun. A fali Kanaanfuɛ sɔ'm be famiɛn nin be bɔbɔ mannin be kɛ be fa nga be klun klo'n yo be.

²⁵ Be fali klɔ nga talɛ si be wun'n mun ɔ nin asiɛ bɔ be yo like ye'n mun. Be fali sua bɔ ninnge kpakpa'm b'a yi be'n mun, nin nzue gbo bɔ b'a dun mmua kpɛ be'n mun, nin vinyi fie mun, nin olivie fie mun, ɔ nin waka nga be di be mma'n i sɔ kpanngbangban. Be dili like kpa be ku yili, be yoli sa lɔklɔlɔklɔɔ, be dili fɛ ɔ klun-ufue'n ti.

²⁶ Sanngɛ be jasoli ɔ wun. Be kaci bé sin sili ɔ mmla'n. Be kunnin ɔ́ nuan ijɔfuɛ nga be se be kɛ be `sa bé sin be bla ɔ sin'n. Be yoli sa tɛ dan ɔ́ wun.

²⁷ Yɛ ɔ kusu a fali be wlali be kpɔfuɛ'm bé sa nun. Be kleli be yalɛ. Kɛ be ´wun be nyrun'n, be kpan flɛli wɔ. Ɔ kusu a o nyanmiɛn su lɔ a tili. A mannin be defuɛ mun, be deli be be kpɔfuɛ'm bé sa nun.

²⁸ Kɛ be fiteli nun cɛ'n, kisie'n ɔ'a yia-man jɔlɛ'n, wuun b'a bo tɛ yolɛ'n bo ɔ́ wun ekun. Yɛ a fa be wlali be kpɔfuɛ'm bé sa nun ekun kɛ be mian be nun. Be kpan flɛli wɔ ekun. Ɔ kusu kɛ a o Nyanmiɛn su lɔ'n, a tili be kpanlɛ'n, wɔ aunnvuɛ silɛ dan'n ti a deli be blɛ sunman.

²⁹ A jrannin bé wun kɛ be sa be sin be fa ɔ mmla'n su sanngɛ wuntulɛ'n ti b'a tie-man ɔ́ nuan ndɛ'n. Ɔ nuan ndɛ b'ɔ man sran ng'ɔ fa su'n i nguan'n, be yili i blo. B'a kan-man be wun ase, be keteli be anwlɛn'n, bé nyin ɔ'a yi-man wɔ.

³⁰ A dili bé wun amlin afuɛ kpanngban. Ɔ Wawɛ'n suli ɔ́ nuan ijɔfuɛ'm be bo kɛ be `kpɛn bé wla, sanngɛ b'a sie-man bé su be nuan bo. A fali be wlali aofuɛ'm bé sa nun.

³¹ Sanngɛ wɔ aunnvuɛ silɛ dan'n ti w'a nunnun-man be, w'a yi-man be blo, afin a ti Nyanmiɛn kun b'ɔ si aunnvuɛ yɛ ɔ klun ti ufue.

³² Siɛn'n e Min, Nyanmiɛn Kpli b'ɔ kwla like kwlaa yo'n, b'ɔ yo sro'n, Nyanmiɛn b'ɔ nanti aenguɛ b'ɔ nin ye trali'n su'n, Nyanmiɛn b'ɔ si aunnvuɛ'n, kɛ ɔ fɛ i Asiri famiɛn'm be blɛ su lele b'ɔ ´fa ju ndɛ'n, afɛ ng'ɔ tɔli é su e nin e famiɛn mun, nin e famiɛn i awlo lɔ sran dandan mun, nin e Nyanmiɛn nyrun jranfuɛ mun, nin e Nyanmiɛn nuan ijɔfuɛ mun, nin e nannan mun, nin e nvle'n kwlaa'n, afɛ sɔ'n, nán bu i like kaan.

³³ Kɛ e nian sa kwlaa ng'ɔ juli ye su'n, e wun kɛ a yoli ng'ɔ fata'n. E yɛ e fɔnnin-ɔn.

³⁴ E famiɛn mun, nin e famiɛn i awlo lɔ sran dandan mun, nin e Nyanmiɛn nyrun jranfuɛ mun, nin e nannan'm b'a fa-man ɔ mmla'n su. Be kpali ɔ nuan ndɛ'm be su. A mannin be afɔtuɛ, b'a fa-man su.

³⁵ I nun bɔ be lɛ be bɔbɔ be mɛn, bɔ a ´yo be ye wla'n lika tɛtrɛ ɔ nin asiɛ kpa bɔ a fa mannin be'n nun'n, b'a yaci-man be nzuɛn tɛ, b'a su-man wɔ.

³⁶ Asiɛ nga a fa mannin e nannan mun kɛ be di i su ninnge kpakpa mun'n, yɛ y'a yo kanga i nun yɛ.

³⁷ Siɛn'n, e mɛn'n nun ninnge wla'm be ti famiɛn nga wɔ man e su be'n be liɛ, é sa tɛ bɔ e yoli'n ti. Kwlaa nga be klo kɛ be ´yo e nin e nnɛn mun'n, yɛ be yo-ɔ. Y'a wun e nyrun dan.»