Neemi 8 - NYANMIƐN NDƐ'N 1998

¹ Anglo nso'n i cɛn klikli'n su'n, be kwlaa be yiali anuan nga be flɛ i Nzue anuan'n i nyrun lɛ gbaun'n nun. Be seli Ɛsdras b'ɔ ti mmla klefuɛ'n kɛ ɔ fa mmla fluwa nga Anannganman man Moiz klɛ mannin Izraɛlfuɛ mun'n bla.

² Ɛsdras b'ɔ ti Nyanmiɛn nyrun jranfuɛ'n ɔ fali mmla'n bali yasua nin bla, nin be kwlaa nga be wun sa wlɛ'n bɔ b'a yia'n be nyrun lɛ.

³ Kɛ ɔ fɛ nglɛmun lele b'ɔ ´fa ju midi su'n, ɔ kanngannin fluwa nun anuan bɔ be flɛ i Nzue anuan i nyrun gbaun'n nun lɛ. Ɔ kanngan kleli yasua nin bla, nin be kwlaa bɔ be wun sa wlɛ'n mun. Sran'm be kwlaa be sieli bé su tieli mmla fluwa i nun ndɛ bɔ Ɛsdras kanngannin'n.

⁴ Be fali waka be boboli lika nglo-nglo kun. I su'n ti kpɛkplɛkpɛ. I su yɛ Ɛsdras jrannin-ɔn, Matitia nin Sema, nin Anania, nin Iri, nin Ilkiza, nin Maazeza be o i sa fama su, yɛ Pɛdaza, nin Mikaɛl, nin Malkiza, nin Asɔm be o i sa bɛ su.

⁵ Kɛ Ɛsdras jin like nglo-nglo su ti'n, kɛ ɔ tikeli fluwa'n su'n, sran kwlaa be wunnin i nan b'a jaso nglo.

⁶ Ɛsdras lali Anannganman Nyanmiɛn kpli'n i ase, kpɛkuun sran'm be kwlaa be mannin bé sa'n su nglo, yɛ be seli kɛ: «Man ɔ yo sɔ! Man ɔ yo sɔ!» I sin be kotoli utuli bé nyin ase Anannganman nyrun.

⁷ I sin Levifuɛ mun, nin Zozie, Bani, Serebia, Zamɛn, Akib, Sabɛtai, Ɔdiza, Maazeza, Kɛlita, Azaria, Zozabad, Anan, ɔ nin Pɛlaza, be tuli Nyanmiɛn i mmla'n bo kleli sran mun. Be jin nglo yɛ be tie-ɔ.

⁸ Be kanngannin Nyanmiɛn i mmla fluwa'n nun weiin-weiin, kpɛkuun be tuli i bo kɛ ɔ ´yo nan sran'm be kwlaa b'a ti nga be kanngannin'n ti.

⁹ Kɛ sran'm be tili ndɛ sɔ'n, kpɛkuun be su sun. Yɛ Neemi b'ɔ ti siefuɛ'n, ɔ nin Ɛsdras b'ɔ ti Nyanmiɛn nyrun jranfuɛ bɔ i kunngba'n ti mmla klefuɛ'n, ɔ nin Levifuɛ nga be tuli mmla'n i bo'n be seli be kɛ: «Ndɛ cɛn'n ti Anannganman amun Nyanmiɛn i cɛn, man nyrun mlanlɛ nin sunlɛ'n wie.»

¹⁰ Be seli be ekun kɛ: «Amun `wɔ amun awlo, amun `di aliɛ kpakpa, yɛ amun `nɔn nzan bɔ be bo-man'n. Amun `ko man be nga b'a tɔn-man like'n be wie. Ndɛ cɛn'n ti e Min'n i liɛ. Nán amun mlan amun nyrun. Aklunjuɛ ng'ɔ fin Anannganman'n, ɔ ´man amun fanngan.»

¹¹ Levifuɛ'm be kusu be fɔnvɔ sran mun, be seli kɛ: «Amun `muan amun nuan. Ndɛ cɛn'n ti Anannganman liɛ. Nán amun mlan amun nyrun.»

¹² Yɛ sran'm be kwlaa be ɔli be awlo nan b'a di like nan b'a nɔn nzan. Be ko mannin sran nga be lɛ-man like diwa'n be wie, yɛ be klun jɔli dan kpa, be dili cɛn, afin be wunnin ndɛ nga be tuli i bo kleli be'n i wlɛ kpa.

Kpata bo tranlɛ cɛn'n

¹³ Kɛ i aliɛ'n cɛnnin'n, Izraɛl awlobo kpɛnngbɛn mun, nin Nyanmiɛn nyrun jranfuɛ mun, ɔ nin Levifuɛ'm be yiali. Ɛsdras o be afiɛn. Be waan ɔ `yiyi mmla nun weiin-weiin kpa kle be.

¹⁴ Be wunnin i mmla sɔ'n bɔ Anannganman man Moiz klɛli'n i nun kɛ anglo nso'n i cɛn dilɛ nun'n, man Izraɛlfuɛ'm be tran kpata'm bé bo.

¹⁵ Cɛn sɔ'n i bo bolɛ nun'n, ɔ fata kɛ be bo i jɔ sin Zerizalɛm nin klɔ'm be kwlaa su. Be `se sran'm be kɛ be `wɔ oka'm be su be `ko kpɛ olivie nga be tali'n i nnya, nin blo olivie nnya, nin mirt nnya, nin mme nnya, ɔ nin waka kwlaa nga i nnya'n ti klanman'n, nan be fa kplan kpata kɛ ɔ ti klɛwa'n sa .

¹⁶ Yɛ sran'm be ɔli-ɔ, nan b'a ko kpɛ nnya-nnya sɔ mun b'a ba. Wie'm be fuli bé sua'm bé ti su nglo gbagblagba'n su yɛ be kplannin be kpata liɛ mun-ɔn. Wie'm be kplannin be liɛ'n be awlo'n i klun lɛ. Wie'm be kplɛnnin i Nyanmiɛn i sua'n i awlo'n nun lɛ Nzue anuan'n i lika gbaun'n nun, annzɛ Efraim Anuan'n i nyrun lɛ gbaun'n nun.

¹⁷ Be kwlaa nga be fin kanga nun bali'n, be kplannin kpata be trannin nun. Kɛ ɔ fin Nɛn i wa Zozie blɛ su lele b'ɔ ´fa ju blɛ nga'n, be nian yo-mɛn i sɔ le. Aklunjuɛ'n yoli dan nan b'a di cɛn bɔbɔ.

¹⁸ Kɛ ɔ fɛ i cɛn klikli'n lele bɔ be cɛn dilɛ'n ´fa wie'n, be kanngannin Nyanmiɛn mmla fluwa'n nun tititi. Be dili le nso, i le mɔcuɛ'n su'n, be kwlaa be yoli anyia dan kpa kun likawlɛ kɛ mmla'n kannin'n sa.