Neemi 6 - NYANMIƐN NDƐ'N 1998

Zuif'm be kpɔfuɛ'm be balɛ i nnyɔn su'n

¹ Sanbalat nin Tɔbiza, ɔ nin Gesɛm b'ɔ ti Arabfuɛ'n, ɔ nin e kpɔfuɛ nga'm be tili i kɛ m'an kplan talɛ'n, nan m'an tannintannin i toklo'n ngba. Kɛ ɔ ´yo sɔ'n, wuun n nian wla-man anuan mun bɔbɔ,

² kpɛkuun Sanbalat nin Gesɛm be toli min ngaliɛ kɛ: «Bla man e wun é wun klɔ b'ɔ o Ɔno kongo'n nun lɔ i su lɔ.» Be buli mín wun akunndan tɛ.

³ Yɛ n sunmannin sran kɛ be se be kɛ: «Junman ng'ɔ o min sa nun'n ti-man kaan, n kwla ba-man. Sɛ min waan m ´ba'n, junman'n ´jran.»

⁴ Be toli min ngaliɛ sɔ kpɛ nnan, yɛ n kusu n ko mannin be su tɛlɛ kunngba'n.

⁵ I kpɛ nnun su'n, Sanbalat sunmɛnnin i gbanflɛn'n. Ɔ klɛli fluwa wlɛli i sa nun kɛ ɔ fa blɛ min. Ɔ klɛli fluwa kunngba sɔ'n sinnin lika sunman nun.

⁶ Ɔ klɛli i nun kɛ: «E ti unkun-unkun sran'm be afiɛn kɛ a nin Zuif mun amun klo kɛ amun ´jaso famiɛn'n i wun i ti yɛ a kplan talɛ nin-ɔn. Be waan a klo kɛ a ´yo Zuif'm be famiɛn. E tili ndɛ kunngba'n Gesɛm i nuan nun ekun.

⁷ Nan i sɔ'n ti, a sieli Nyanmiɛn nuan ijɔfuɛ mun kɛ be `kan sin Zerizalɛm kɛ wɔ yɛ a wa yo Zida famiɛn nin-ɔn. Kannzɛ ɔ yo sɛ famiɛn'n ɔ wa ti ndɛ sɔ'n nun le. I sɔ'n ti bla man e ti é wun aniɛn.»

⁸ N sunmannin sran ko tɛli i su kɛ: «Nga a ´kɛn i lɛ'n kwlaa ti ato. A kpɛ ɔ klun yɛ a kan-an.»

⁹ Be kwlaa sɔ'm be waan be ´wlanwlan ye. Be bu kɛ wuun é sa sin ´bubu ye nan e ´yaci junman'n dilɛ. «I ti Nyanmiɛn, wla min fanngan!»

¹⁰ Le kun n ɔli Mɛetabeɛl i wa Dɛlaza i klun ba Sɛmaɛza i awlo lɔ, afin ɔ'a kwla fite-man, ɔ'a ɔ-man min wun lɔ. Ɔ seli min kɛ: «E wɔ Nyanmiɛn i sua'n klun lɔ e ko nyin e su anuan, afin be ba ɔ kunlɛ. Kɔnguɛ yɛ be ´ba ɔ kunlɛ-ɔ.»

¹¹ N tɛli i su kɛ: «N ti-man sran nyrun wanndifuɛ. ?Sɛ sran kɛ min sa ɔ wlu Nyanmiɛn i sua nun'n, nán wulɛ cɛ yɛ ɔ ´wu-ɔ? N wlu-man lɔ!»

¹² N wunnin kɛ nán Nyanmiɛn yɛ ɔ sunmɛnnin i-ɔ. Ndɛ nga i waan Nyanmiɛn fa wlɛli i nuan kɛ ɔ kan kle min'n, kannzu Sanbalat nin Tɔbiza b'a mɛn i sika.

¹³ Be waan be ´yo sɔ nan srɛ kun min nan n nian ng'ɔ kannin'n su n yo, nan n fɔn, nan n dunman tɛ'n wɔ, nan be ´fa gua min nyin ase.

¹⁴ «Min Nyanmiɛn, nán ɔ wla fi Tɔbiza nin Sanbalat be nyoliɛ'm be su. Nán ɔ wla fi ɔ nuan ijɔfuɛ Nɔadia, ɔ nin ɔ nuan ijɔfuɛ kun nga mun bɔ be kunndɛ kɛ be ´wla min srɛ'n be su.»

¹⁵ Talɛ'n wieli Elil anglo'n i le ablaɔn-nin-nnun'n su. I kplanlɛ'n dili cɛn ba ablenun-nin-nnyɔn.

¹⁶ Kɛ e kpɔfuɛ'm be kwlaa be tili'n, srɛ kunnin nvle nga be mantan lɛ'n be kwlaa. Bé nyin guali ase. Be wunnin kɛ Nyanmiɛn fanngan nun yɛ junman sɔ'n wieli-ɔ.

¹⁷ I blɛ sɔ'n nun'n, Zida kpɛnngbɛn'm be nin Tɔbiza be klɛli be wun fluwa kpanngban kpa,

¹⁸ afin Zidafuɛ sunman be nin i bé bo ti kun, be tali be wun nda sa wie su bɔbɔ, afin ɔ ti Arak i wa Sɛkania'n i sia. I klun ba Zosanan kusu jali Berekia i wa Mɛsilam i wa bla'n.

¹⁹ Be yi i ayɛ min nyrun bɔbɔ. Be kan ndɛ nga n kan kle be mun kle i. Yɛ Tɔbiza klɛ fluwa mun ɔ wa wlan-wlan min.