Neemi 5 - NYANMIƐN NDƐ'N 1998

Neemi jrannin ndrunmun'n dilɛ'n

¹ Yasua nin bla wie'm be fali ya be niaan Zuif'm be bue bé wun.

² Be wie'm be waan: «E nin e mma mun e sɔnnin. Ɔ fata kɛ be man e ble e di nan y'a nyan nguan.»

³ Be wie'm be kusu be waan: «Sɛ awe kpɛn'n, san e ´fa e fie annzɛ e vinyi fie, annzɛ é sua mun e ´wla aowa nan y'a nyan ble.»

⁴ Yɛ be bue kun waan: «E fie nin vinyi fie'm bé su lapo nga e fa man famiɛn'n, kɛ i tanninlɛ'n ko ju'n, e usa afɛ yɛ e fa tua-a.

⁵ Kusu wuun e nin e niaan mun e kwlakwla e ti mmoja kun. E mma mun nin be liɛ'm be ti kun'n, sanngɛ wuun ɔ fata kɛ e mma'm be yo kanga. E wa bla wie'm be o kanga'n nun kɛ e ´se yɛ'n bɔbɔ. E lɛ-mɛn i yowlɛ uflɛ, afin e fie nin e vinyi'm be ti sran uflɛ liɛ.»

⁶ Kɛ n tili be ndɛ sɔ'n, ɔ nin be klun lɔ akpue bɔ be yi fiteli su'n, n fali ya dan kpa.

⁷ Yɛ m buli akunndan kɛ n ´ijɔ kpɛnngbɛn nin jɔlɛ difuɛ mun trɔ nga be fa jin be niaan'm be ti su'n i dan'n ti. Nan m'an kle anyia cɛn sa sɔ'n ti .

⁸ Kɛ e yiali'n, n seli be kɛ: «?Kɛ ɔ o yɛ'n, sɛ amun bo amun niaan'm be bosia'n, bɔ be wa yi'n, amun yo man be su i bo? Amun `nian, e niaan Zuif nga be yoli bé wun atɛ aofuɛ'm bé sa nun'n, e miannin e nyin nan e bɔbɔ y'a kpɔ bé ti. ?Yɛ amun bɔbɔ yɛ amun yo amun bɔbɔ amun niaan'm be atɛ e ngunmin-ngunmin é sa nun-ɔn?» Be gua lɛ be wun-man kun kan-man.

⁹ Yɛ n seli be kɛ: «Amu'an yo-mɛn i kpa. Ɔ fata kɛ amun nantilɛ'n kle kɛ amun nyin yi e Nyanmiɛn'n, man nvle nga bɔ be ti e kpɔfuɛ'm be yaci e nzowa kpɛlɛ'n.

¹⁰ E nin min niaan nin min sufuɛ mun e sika kalɛ nin ble kalɛ o be su. Man e yaci kalɛ sɔ'n cɛ be.

¹¹ Amun `yi be fie, nin be vinyi fie, ɔ nin be olivie fie, ɔ nin bé sua mun man be. Yɛ mmlusuɛ ng'ɔ fata kɛ amun nyɛn i sika, annzɛ ble, annzɛ nzan, annzɛ ngo nga be fɛli i amún sa nun'm be su'n, amun `yaci man be.»

¹² Be tɛli min su kɛ: «E ´yo nga a kan'n, e ´yi be ninnge nga e fali'n, e usɛ-mɛn i sin like uflɛ.» Yɛ n flɛli Nyanmiɛn nyrun jranfuɛ mun nan m'an yo man sran sɔ'm b'a ta nda be nyrun kɛ ndɛ nga be kannin'n, be nian su yo.

¹³ Yɛ n kpukpuli min tralɛ dan'n nun-ɔn, nan m'an se kɛ: «Sran nga ɔ'a niɛn-mɛn i ndɛ'n su ɔ'a yo-man'n, man Nyanmiɛn kpukpu i nun kɛ nga sa. Man i bɔbɔ i awlo'n nin i bo ninnge'm be fi i sa. Man Nyanmiɛn kpukpu i nun ɔ jrɛ i sa kli!» Be kwlaa be tɛli su kɛ: «Man ɔ yo sɔ!» Nan b'a manman Anannganman. I sin be niannin be ndɛ sɔ'n su be yoli.

¹⁴ Kɛ be sieli min siefuɛ Zida nvle nun'n, b'ɔ fɛ i Artaksɛrksɛs i famiɛn nga be sieli i'n i afuɛ ablaɔn'n su b'ɔ ´fa ju i afuɛ ablasan-nin-nnyɔn'n su'n, afuɛ blu-nin-nnyɔn sɔ nun'n, e nin min niaan mun y'a fa-man lapo sika y'a fa ta-man e wun le.

¹⁵ Be nga be dun mmua yoli nvle siefuɛ'n min nyrun'n, kɛ be ko kle sran'm be yalɛ'n yɛ be kleli-ɔ. Be ´de be aliɛ nan b'a de be nzan, nan b'a de be jɛtɛ ufue mma ablanan. Be sufuɛ mun bɔbɔ be kle sran'm be yalɛ wie. N liɛ'n, n nyin yi Nyanmiɛn i ti m'an yo-man sɔ.

¹⁶ I kpa'n bɔ m bɔbɔ n kplannin talɛ'n wie. Y'a to-man fie fi. Min sufuɛ'm be kwlaa be dili junman'n wie.

¹⁷ Zuif nin be jɔlɛ difuɛ nga n yi bé nuan nun aliɛ'n be ti ya ablenun. Aofuɛ nga be fin mɛn uflɛ'm be nun ba'n, n ka-man be wla-man nun.

¹⁸ Cɛn kwlaa n kun nannin kun, nin bua kpakpa nsiɛn, ɔ nin akɔ mun. Yɛ le blu kwlakwla be blɛ min nzan kaka kpa. Ɔ nin i sɔ'n ngba, cɛn kun sa m'an usa-man like ng'ɔ ti siefuɛ i liɛ'n i osu le, afin junman'n tin sran'm be su.

¹⁹ Min Nyanmiɛn, kwlaa nga n yoli m mannin sran nga mun'n, man ɔ́ wla kpɛn su. Nian su yo min ye .