Neemi 2 - NYANMIƐN NDƐ'N 1998

Famiɛn'n mannin Neemi i atin kɛ ɔ wɔ Zerizalɛm lɔ

¹ Kɛ Artaksɛrksɛs trannin bia'n su'n i afuɛ ablaɔn'n su'n, Nizan anglo nun'n, n fali nzan'n b'ɔ o famiɛn'n i nyrun lɛ'n nan m'an fa su i. Kɛ ɔ ´yo sɔ'n, wuun min nyrun'n ti mlanwa, yɛ min nyrun mlanlɛ klikli bɔ m ´mlan'n yɛ ɔ o lɛ-ɔ.

² Famiɛn'n usali min kɛ: «?Ɔ yo sɛ ti yɛ ɔ nyrun'n ti mlanwa sɔ-ɔ? Ɔ wunnɛn yo-man ɔ ya. Kɛlɛ klunngbɔ cɛ yɛ ɔ o ɔ klun-ɔn.» N klun tili min.

³ Yɛ n seli famiɛn'n kɛ: «Nannan, man wie wla fi wɔ! Min nyrun bɔ m mlan'n yɛlɛ kɛ b'a bubu klɔ nga be sieli min nannan'm be su'n . Yɛ b'a wɔ i anuan'm be nun.»

⁴ Famiɛn'n usali min kɛ: «?Nguɛ yɛ ɔ waan n yo m man wɔ-ɔ?» Yɛ n srɛli nglo lɔ Nyanmiɛn nin-ɔn.

⁵ N tɛli famiɛn'n su kɛ: «Nannan, n tu kpli, sɛ ɔ ti ɔ klun su'n, yɛ sɛ ɔ klun jɔ min wun'n, man min atin man n wɔ Zida kan min nannan'm be asieliɛ'n wo lɔ'n nan n ko kplan klɔ'n i uflɛ.»

⁶ Kɛ ɔ ´yo sɔ'n, wuun famiɛn'n i yi'n ti i wun lɛ. Yɛ famiɛn'n usali min kɛ: «?A ´di le nnyɛ lɔ? ?Cɛn onin yɛ a ´sa ɔ sin-ɔn?» N kleli cɛn nga n ´ba'n, nan ɔ'a man min atin nan m'an wɔ.

⁷ N seli i ekun kɛ: «Nannan, min waan n ´se wɔ nan a `klɛ fluwa man n `fa ko man nvle siefuɛ nga be o Efrat sin lɔ'n, nan be man min atin man n wɔ Zida lɔ.

⁸ Klɛ kun ekun man n `fa ko man Azaf b'ɔ nian ɔ bo'n su'n, nan ɔ `man min waka nga n ko fa ko yo klɔ wun sasalɛ sua b'ɔ mantan Nyanmiɛn i sua'n i anuan mun'n, ɔ nin waka nga n ko fa ko kplan klɔ'n wun talɛ'n, ɔ nin nga n ko fa ko kplan sua nga n ´tran nun'n.» Famiɛn'n klɛ fluwa sɔ mun mannin min afin min Nyanmiɛn'n jin mín sin.

⁹ Yɛ n ko toli nvle siefuɛ nga be o nzue'n i sin lɔ nin-ɔn, nan m'an fa fluwa'n m'an man be. Famiɛn'n man sonja kpɛnngbɛn wie mun, ɔ nin nnɛn kpanngɔ fufuɛ wie'm be ko sunmannin min.

¹⁰ Kɛ Sanbalat b'ɔ fin Ɔrɔn'n , nin Tɔbiza b'ɔ ti Amɔnfuɛ'n b'ɔ ti Sanbalat i ukafuɛ'n be tili kɛ sran kun su wa yo sa kpa ´man Izraɛlfuɛ mun'n, ɔ'a yo-man be fɛ.

Neemi kplali Zerizalɛm i talɛ'n niannin

¹¹ Kɛ n juli Zerizalɛm'n, n dili le nsan.

¹² I sin n jasoli kɔnguɛ e nin sran wie mun. Kɛ ɔ ´yo sɔ'n, wuun n nian kan-man sa nga Nyanmiɛn waan n yo m man klɔ'n nian kle-man sran fi. Nnɛn kunngba ng'ɔ o mín sa nun'n yɛlɛ nga n fuli su'n.

¹³ N sinnin Kongo'n Nun Lɔ anuan'n nun n fiteli kɔnguɛ, n ɔli nzue ti bɔ be flɛ i Dragɔn'n su lɔ, yɛ n juli kan be gua wla lɔ'n i anuan'n nun lɔ. N ´kɔ'n, wuun n ´nian Zerizalɛm klɔ'n i talɛ'n. N wunnin kɛ i lika'n wie ti buwa yɛ i anuan'm be ti yrawa.

¹⁴ N ɔli n ko juli nzue ti'n i anuan'n wun lɛ yɛ n juli famiɛn'n i fɛtɛ'n i wun lɛ. Nnɛn nga n fu su'n nyan-man sinwlɛ.

¹⁵ I sin n fali Sedrɔn nzue mmuɛ'n kɔnguɛ, n ´kɔ'n, wuun n ´nian talɛ'n, kpɛkuun n sinnin Kongo Nun Lɔ anuan'n nun yɛ n sali n sin-ɔn.

¹⁶ Jɔlɛ difuɛ'm b'a si-man kan n ɔli'n, yɛ b'a si-man sa nga n yoli'n, afin kɛ ɔ ´yo sɔ'n, wuun n nian kan-man ndɛ fi n nian kle-man Zuif mun, ɔ nin Nyanmiɛn nyrun jranfuɛ mun, ɔ nin kpɛnngbɛn mun, ɔ nin mmla su nianfuɛ mun, ɔ nin sran uflɛ nga be o ju-man'n su'n.

¹⁷ Yɛ n seli be kɛ: «Amun `nian nyrɛnnɛn bɔ e o nun-ɔn. Zerizalɛm klɔ'n ɔ'a bubu, i anuan'm b'a yra. Amun man e kplan Zerizalɛm klɔ'n i wun talɛ'n ekun nan e `titi e nyrun nyannzuɛn'n.»

¹⁸ N kannin min sin bɔ min Nyanmiɛn'n jin'n n kleli be, n kannin ndɛ nga famiɛn'n kan kleli min'n n kleli be. Nan b'a se kɛ: «Amun man é bo yo kun nan e kplan!» Yɛ be siesieli bé wun kpa sakpa kɛ be ´di junman sɔ'n.

¹⁹ Kɛ Sanbalat b'ɔ ti Ɔrɔnfuɛ'n, ɔ nin i ukafuɛ Tɔbiza b'ɔ ti Amɔnfuɛ'n, ɔ nin Gesɛm b'ɔ ti Arab'n be tili ndɛ sɔ'n, be srili ye, yɛ be yoli ye fiaan. Be waan: «?Nguɛ yɛlɛ nga amun ´yo i lɛ'n? ?Kɛ ɔ o yɛ'n amun su jaso famiɛn'n i wun?»

²⁰ N tɛli be su kɛ: «Nglo lɔ Nyanmiɛn'n man nga e sunnzun'n ɔ ´yo ye. I sufuɛ yɛlɛ ye, é bo ti kun, e wa bo talɛ'n i kplanlɛ'n bo. Amun liɛ'n, Zerizalɛm lɔ like ti-man amun like. Amun kwla yo-man like lɔ. Be ´kan Zerizalɛm ndɛ-ɔ, be bo-man amun dunman nun.»