Neemi 13 - NYANMIƐN NDƐ'N 1998

Neemi i ninnge ng'ɔ kacili be'n

¹ I blɛ sɔ nun'n, be kanngannin Moiz fluwa'n Izraɛlfuɛ'm be nyrun. Ɔ ti klɛwa i nun kɛ ɔ fata-man kɛ Amɔnfuɛ nin Moabfuɛ'm be wlu Nyanmiɛn i nvle'n nun mlɔnmlɔn le,

² yɛlɛ kɛ laa kɛ Izraɛlfuɛ'm be ´ba'n, b'a kpa-man be atin, b'a man-man be aliɛ nin nzue. I kpa'n bɔ Moabfuɛ'm be mannin Balaam sika kɛ ɔ bo be sannzan, sanngɛ sannzan sɔ'n Nyanmiɛn man ɔ kacili muae .

³ Kɛ e tili mmla sɔ'n, e fuannin aofuɛ'm be kwlaa Izraɛl nvle'n nun.

⁴ Kwlaa nan ɔ'a yo sɔ'n, Eliasib b'ɔ ti Nyanmiɛn nyrun jranfuɛ'n, bɔ be kpɛli i kɛ ɔ nian Nyanmiɛn i sua'n i sua ba'm be su'n, kɛ ɔ nin Tɔbiza be ti osufuɛ'n ti,

⁵ ɔ fali sua ba dan kun mɛnnin i. Sua sɔ'n i nun yɛ be sie ndidiɛ ninnge nga be fa yi sraka'n, nin ansans, nin Nyanmiɛn i sua'n nun kpongbo mun-ɔn. I kunngba'n, i nun yɛ be sie ble, nin nzan lɔflɛ, nin ngo'm be blusu nga be fa man Levifuɛ mun, nin anuan su nianfuɛ mun, nin jue tofuɛ, ɔ nin Nyanmiɛn nyrun jranfuɛ mun nin-ɔn.

⁶ Kɛ ɔ ´yo sɔ'n, wuun n nun-man Zerizalɛm, afin kɛ Artaksɛrksɛs b'ɔ ti Babilɔni famiɛn'n ɔ trannin bia'n su'n, i afuɛ ablasan-nin-nnyɔn'n su'n, n sali n sin i wun lɔ.

⁷ Kɛ afuɛ'n ɔ wa wie'n, famiɛn'n mannin min atin, nan m'an ba Zerizalɛm. Yɛ n wunnin kɛ Eliasib ɔ'a fa Nyanmiɛn i sua'n nun sua ba'n kun ɔ'a man Tɔbiza. Sa tɛ nga Eliasib yoli i lɛ'n,

⁸ ɔ kunnin min ya kpa, nan m'an yi Tɔbiza i bo ninnge mun m'an fite.

⁹ N yoli man be yoli sua ba'm be saun, nan m'an fa Nyanmiɛn i sua'n nun ninnge mun m'an sie be osu'n nun. N fali ndidiɛ ninnge nga be fa yi sraka'n nin ansans'n n sieli be osu'n nun.

¹⁰ N tili i ekun kɛ ninnge ng'ɔ fata kɛ be fa man Levifuɛ mun'n, b'a fa man-man be, nan Levifuɛ mun, nin jue tofuɛ'm b'a wanndi b'a ɔ be klɔ'm be su sɛsɛsɛ.

¹¹ N ijɔli jɔlɛ difuɛ mun yɛ n usali be kɛ: «?Ɔ yo sɛ ti yɛ Nyanmiɛn i sua'n ka ngbɛn sa-a?» Nan m'an yia Levifuɛ mun nin jue tofuɛ mun, nan m'an sie be be osu'n nun.

¹² Kpɛkuun Zidafuɛ'm be kwlaa be fali ble'n, ɔ nin nzan lɔflɛ'n, ɔ nin ngo'n i blusu'n be bali kan be sie ninnge'm be lɛ'n .

¹³ N sieli Selemia b'ɔ ti Nyanmiɛn nyrun jranfuɛ'n, nin Zadɔk b'ɔ ti fluwa klɛfuɛ'n, ɔ nin Pɛdaza b'ɔ ti Levifuɛ'n be kɛ be nian sua ba nga be sie ninnge nun'n be su. N fali Matania i wa Zakir i klun ba Anan n ukali be su. Be kwlaa sɔ'n, sran'm be di be wun lalo kɛ be ti sran kpa. Be yɛ n seli be ekun kɛ be cɛ ninnge'n nun be man be niaan mun-ɔn.

¹⁴ «Min Nyanmiɛn, man ɔ́ wla kpɛn sa kpa nga n yoli'n su. Nán ɔ́ wla fi sa nga n yoli i ɔ sua'n i ti'n i su le. Nán ɔ wla fi ɔ sulɛ wafa nga n siesieli'n su. Ɔ klolɛ'n ti yɛ n yoli i sɔ-ɔ.»

¹⁵ Blɛ kunngba sɔ nun'n, n wunnin kɛ Zida nvle nun sran wie'm be cuɛn be vinyi mma i nzue'n yɛ be sua be ble'n wunmiɛn-delɛ-cɛn'n nun. Wie'm be fa aflunmun'm be sua nzan nin vinyi mma, nin figie mma, annzɛ trɔ uflɛ. Be fa ba Zerizalɛm wunmiɛn-delɛ-cɛn'n nun. Cɛn nga be ´yo be ninnge'm be atɛ sɔ'n, n ijɔli be.

¹⁶ Tirfuɛ nga be tran Zerizalɛm'n be kusu, be fa jue annzɛ aata ninnge uflɛ mun ba, be yo be atɛ wunmiɛn-delɛ-cɛn'n nun Zidafuɛ'm bé sa nun Zerizalɛm lɛ.

¹⁷ N ijɔli Zida kpɛnngbɛn mun. Yɛ n usali be kɛ: «?Kɛlɛ amun si kɛ wunmiɛn-delɛ-cɛn'n i finfin nga amun yo'n ɔ ti sa tɛ dan yɛ amun yo-ɔ?

¹⁸ ?Nán like nga amun nannan'm be yoli b'ɔ man Nyanmiɛn man sa yalɛ tɔli e nin klɔ nga e su nin-ɔn? ?Yɛ amun ´yo wunmiɛn-delɛ-cɛn'n finfin nan i ya'n `tɔ Izraɛlfuɛ'm be su ekun-ɔn?»

¹⁹ Kɛ ɔ fɛ i lɛ'n, n yoli man kɛ lika'n ´yo kɛ ɔ ´dun bɔ wunmiɛn-delɛ-cɛn'n ɔ'a ju'n, be nyin Zerizalɛm anuan mun. San wunmiɛn-delɛ-cɛn'n sin yɛ be tike be ekun-ɔn. N sieli min gbanflɛn'n wie mun anuan'm be nun kɛ nán be kplin su kɛ be fa trɔ fi wlu klɔ'n nun wunmiɛn-delɛ-cɛn'n nun.

²⁰ Ninnge fanunfanun atɛ yofuɛ'm be lali Zerizalɛm klɔ'n sin kpalɛ kun annzɛ kpalɛ nnyɔn su.

²¹ N ijɔli be kpa. Yɛ n usali be kɛ: «?Ɔ yo sɛ ti yɛ amun la talɛ'n sin-ɔn? Sɛ amun yo i sɔ ekun'n, n ´yo man be tra amun.» Kɛ ɔ fɛ lɛ'n, b'a ba-man wunmiɛn-delɛ-cɛn'n nun kun.

²² Yɛ n seli Levifuɛ'm be kɛ be yo bé wun saun nan be nian anuan'm be su wunmiɛn-delɛ-cɛn'n nun. I liɛ'n, sran'm be su yo-man wunmiɛn delɛ cɛn'n i finfin kun. «Min Nyanmiɛn! Man ɔ́ wla kpɛn min su sa nga n yoli i lɛ'n ti. Wɔ bɔ wɔ aunnvuɛ silɛ'n lɛ-man sin'n, nian min lika.»

²³ I blɛ sɔ nun'n, n wunnin kɛ Zuif wie'm b'a ja Asdɔd, nin Amɔn, ɔ nin Moab bla mun.

²⁴ Be mma'm be bue be kan Asdɔd aniɛn'n, annzɛ nvle uflɛ'm be aniɛn mun, sanngɛ be si-man Zuif aniɛn'n kan.

²⁵ N ijɔli be nan m'an bo be sannzan. N boli sran sɔ'm be nun wie mun, n tutuli be timuɛn mun. N yoli man be tali Nyanmiɛn i nda be seli kɛ be fa-man bé wa bla be man-man aofuɛ'm bé wa yasua mun kun, be ja-man aofuɛ'm bé wa bla mun be man-man bé wa yasua mun kun, yɛ be bɔbɔ be ja-man aofuɛ'm bé wa bla mun kun.

²⁶ N seli be kɛ: «Nán sa nga b'ɔ man Salomɔn b'ɔ ti Izraɛl famiɛn'n ɔ fɔnnin'n yɛ? Nvle kpanngban nga be o mɛn'n nun'n, famiɛn'n wie fi nin i sɛ-man. I Nyanmiɛn'n klo i, i ti ɔ sieli i Izraɛl'n wunmuan'n i su famiɛn, sanngɛ ɔ nin i sɔ'n ngba'n, nvle nun bla mun man ɔ fɔnnin .

²⁷ Nán e ti i kɛ amu'an ja nvle nun bla kun, afin ɔ ti tɛ dan e Nyanmiɛn'n i nyrun.»

²⁸ Eliasib b'ɔ ti Nyanmiɛn nyrun jranfuɛ'm be su kpɛn'n, i wa Zozada i wa'm be nun kun i sia yɛlɛ Sanbalat b'ɔ fin Bɛt-Ɔrɔn'n. I ti n fuɛnnin i.

²⁹ «Min Nyanmiɛn, nán ɔ́ wla fi su kɛ be yoli ɔ sɔlɛ junman'n i finfin. Nán ɔ́ wla fi su kɛ aenguɛ nga a nin ɔ nyrun jranfuɛ nin Levifuɛ'm be trali'n be yoli i finfin ekun.»

³⁰ N fuannin aofuɛ'm be kwlaa Izraɛlfuɛ'm be afiɛn. Nyanmiɛn nyrun jranfuɛ nin Levifuɛ'm be junman wafa nga be siesieli i laa kɛ be ´yo'n, n siesieli i osu'n nun. Be nun kunngun be trannin be osu'n nun.

³¹ Yie nga be siesieli i kɛ i blɛ ju-ɔ, be ´man'n, ɔ nin fie su aliɛ klikli ng'ɔ fite'n i manlɛ'n, n siesieli be i osu'n nun. «Min Nyanmiɛn, man ɔ́ wla kpɛn min su, nan yo min ye.»