Neemi 12 - NYANMIƐN NDƐ'N 1998

Nyanmiɛn nyrun jranfuɛ nin Levifuɛ mun be nuan

¹ Nyanmiɛn nyrun jranfuɛ nin Levifuɛ nga be nin Sealtiɛl i wa Zorobabɛl, ɔ nin Zozie be bali'n be yɛ: Sɛraza, Zeremi, Ɛsdras,

² Amaria, Malik, Atis,

³ Sɛkania, Rɛɔm, Mɛremɔt,

⁴ Ido, Ginɛtɔi, Abiza,

⁵ Mizamɛn, Maadia, Bilga,

⁶ Sɛmaɛza, Zozarib, Zɛdaɛza,

⁷ Sali, Amɔk, Ilkiza, ɔ nin Zɛdaɛza. Be yɛ be ti be niaan Nyanmiɛn nyrun jranfuɛ'm be kpɛnngbɛn Zozie i blɛ su-ɔ.

⁸ Levifuɛ'm be yɛ: Zozie, Binii, Kadmiɛl, Serebia, Zida, ɔ nin Matania. Matania ɔ nin i niaan'm be yɛ be jran jue tofuɛ'm be nyrun kɛ be ´to Nyanmiɛn manmanlɛ jue mun nin-ɔn.

⁹ Bakbikia nin Ini, ɔ nin be niaan'm be yɛ be sɔ jue'n su-ɔ. Be tran Matania'm be nyrun ndɛnman su.

¹⁰ Zozie wuli Zozakim, Zozakim wuli Zozada,

¹¹ Zozada wuli Zonatan, Zonatan wuli Zadia.

¹² Zozakim blɛ su'n, Nyanmiɛn nyrun jranfuɛ'm be awlobo kpɛnngbɛn mun yɛ: Sɛraza awlobo liɛ'n yɛlɛ Mɛraza, Zeremi liɛ'n yɛlɛ Anania.

¹³ Ɛsdras liɛ'n yɛlɛ Mɛsilam, Amaria liɛ'n yɛlɛ Zosanan.

¹⁴ Mɛliki liɛ'n yɛlɛ Zonatan, Sɛbania liɛ'n yɛlɛ Zozɛf, Arɔm liɛ'n yɛlɛ Adna.

¹⁵ Mɛrazɔt liɛ'n yɛlɛ Ɛlkai.

¹⁶ Ido liɛ'n yɛlɛ Zakari. Ginɛtɔn liɛ'n yɛlɛ Mɛsilam.

¹⁷ Abiza liɛ'n yɛlɛ Zikri. Mɛnzamɛn nin Mɔadia be liɛ'n yɛlɛ Piltai.

¹⁸ Bilga liɛ'n yɛlɛ Samia, Sɛmaɛza liɛ'n yɛlɛ Zonatan.

¹⁹ Zozarib liɛ'n yɛlɛ Matnai, Zɛdaɛza liɛ'n yɛlɛ Izi.

²⁰ Salai liɛ'n yɛlɛ Kalai, Amɔk liɛ'n yɛlɛ Ebɛr.

²¹ Ilkiza liɛ'n yɛlɛ Asabia, Zɛdaɛza liɛ'n yɛlɛ Nɛtaneɛl.

²² Eliasib nin Zozada, nin Zosanan, ɔ nin Zadia be blɛ su yɛ be klɛli Levifuɛ'm be kpɛnngbɛn'm be dunman mun-ɔn. Nyanmiɛn nyrun jranfuɛ'm be liɛ, be klɛli i lele juli Dariis b'ɔ ti Pɛrs famiɛn'n i blɛ su.

²³ Be klɛli Levifuɛ'm be awlobo kpɛnngbɛn'm be dunman be nyoliɛ fluwa'n nun lele juli Eliasib i wa Zosanan i blɛ su.

²⁴ Asabia nin Serebia, nin Kadmiɛl i wa Zozie bɔ be ti Levifuɛ'm be kpɛnngbɛn'n, be nin be niaan mun, be yɛ be to Nyanmiɛn i manmanlɛ nin i ayɛ yilɛ jue mun-ɔn. Be tran Levifuɛ kun nga'm be nyrun ndɛnman su. Be niannin nga David b'ɔ ti Nyanmiɛn i sran'n ɔ siesieli'n su yɛ be yoli-ɔ.

²⁵ Matania, Bakbikia, Abdias, Mɛsilam, Talmɔn, ɔ nin Akib be ti anuan su nianfuɛ. Be yɛ be nian ninnge siewlɛ nga be o Nyanmiɛn i sua'n i anuan'm be wun lɛ'n be su-ɔ.

²⁶ Be dili be junman liɛ'n Zozadak i wa Zozie i klun ba Zozakim i blɛ su. Kɛ ɔ ´yo sɔ'n, wuun Neemi ɔ ti nvle siefuɛ'n, wuun Ɛsdras kusu ti Nyanmiɛn nyrun jranfuɛ nin mmla klefuɛ.

Zerizalɛm talɛ'n i nglo yilɛ

²⁷ Kɛ be ´yi Zerizalɛm talɛ'n i nglo'n, be ko yiali Levifuɛ'm be lika nga be tran nun'n i kwlaa nun kɛ be bla Zerizalɛm be wa di cɛn'n wie. Be flɛ be kɛ be wa to jue, be bo aaba ndɛ nin jru, nin aluku be manman Nyanmiɛn.

²⁸ Jue tofuɛ'm be fin klɔ nga be mantan Zerizalɛm'n be su be bali. Wie'm be fin Nɛtofa klɔklɔ'm be su,

²⁹ ɔ nin Bɛt-Gilgal, ɔ nin Gɛba, nin Azmavɛt asa'n su be bali.

³⁰ Nyanmiɛn nyrun jranfuɛ'n nin Levifuɛ'm be yoli bé wun saun. Be yoli Izraɛlfuɛ'm be saun, be yoli anuan'm be saun, yɛ be yoli talɛ'n i saun.

³¹ N yoli man Zida famiɛn i awlo lɔ sran dandan'm be fuli talɛ'n su, yɛ m buli jue tofuɛ'm be nun akpasua dandan nnyɔn. Akpasua kun fin talɛ'n i fama su, be ɔli Wla Guawlɛ anuan'n i ndɛnman.

³² Ose nin Zida famiɛn'n i awlo lɔ sran dandan'm be bue su be su.

³³ Azaria, Ɛsdras, Mɛsilam,

³⁴ Zida, Bɛnzamɛn, Sɛmaɛza, ɔ nin Zeremi be su be su.

³⁵ Nyanmiɛn nyrun jranfuɛ'm be su be su, awɛ o be sa nun. Zakari nin i niaan'm be su Nyanmiɛn nyrun jranfuɛ'm be su. Zakari ti Zonatan i wa. Zonatan i si'n yɛlɛ Sɛmaɛza, Sɛmaɛza liɛ'n yɛlɛ Matania, Matania liɛ'n yɛlɛ Mise, Mise liɛ'n yɛlɛ Zakir, Zakir liɛ'n yɛlɛ Azaf.

³⁶ Zakari i niaan mun yɛlɛ Sɛmaɛza, Azareɛl, Milalai, Gilalai, Maai, Nɛtaneɛl, Zida, ɔ nin Anani. David b'ɔ ti Nyanmiɛn i sran'n, i jue tolɛ ninnge nga ɔ man be yoli'n, ɔ o be sa nun. Ɛsdras b'ɔ ti mmla klefuɛ'n, ɔ dun mmua akpasua sɔ'n i nyrun.

³⁷ Kɛ be juli Nzue Ba anuan'n su'n, kpɛkuun David i klɔ'n i fuwlɛ nga be fa kɔ lɔ'n ɔ'a tran be nyrun ndɛnman su. Kɛ be ´sin klɔ'n i talɛ'n su'n, David i famiɛn sua'n wo be ngua. Be nanti juli Nzue anuan'n b'ɔ o wia afiliɛ'n su lɔ.

³⁸ Jue tofuɛ akpasua nnyɔn su'n fin talɛ'n i bɛ su yɛ ɔ ba-a. E nin sran kun nga mun e nanti talɛ'n su yɛ e su be su-ɔ. E sinnin kpaun tɔnwlɛ lɛ klɔ'n i sasawlɛ sua'n b'ɔ o lɛ'n i wun lɛ. E ɔli kan talɛ'n ti gbaun lɛ'n.

³⁹ I sin e sinnin Efraim anuan'n su, ɔ nin Zekana anuan'n su, nin Jue anuan'n su, e buli Ananeɛl i sasawlɛ sua'n, ɔ nin Mea i sasawlɛ sua'n be wun, e juli Bua anuan'n su. E ko jrannin bisua'n i anuan'n nun.

⁴⁰ Jue tofuɛ akpasua nnyɔn'm be jrannin Nyanmiɛn i sua'n nun. N kusu e nin jɔlɛ difuɛ nga be nin min ba'n e jrannin,

⁴¹ kpɛkuun Nyanmiɛn nyrun jranfuɛ Eliakim, Maazeza, Mɛnzamɛn, Mise, Ɛlzɔenai, Zakari, ɔ nin Anania be boli awɛ'n.

⁴² Maazeza, Sɛmaɛza, Eleazar, Izi, Zosanan, Malkiza, Elam, ɔ nin Ezɛr, be kusu be o lɛ wie. Jue tofuɛ'm be toli jue. Zizrakza yɛ ɔ jin be nyrun-ɔn.

⁴³ Le kun sɔ'n, e yili sraka kpanngban, yɛ e dili cɛn bɔbɔ, afin sa nga Nyanmiɛn yo mɛnnin i sran mun'n, ɔ man be klun jɔli dan. Bla nin ba kanngan'm be ngba yɛ be klun jɔli sɔ nin-ɔn. Be tili Zerizalɛmfuɛ'm be aklunjuɛ kplanlɛ'n mmua.

Nyanmiɛn nyrun jranfuɛ nin Levifuɛ'm be aliɛ nga mmla'n kleli'n

⁴⁴ I blɛ sɔ nun'n, be sieli sran wie mun kɛ be `nian sua nga be fali ndidiɛ ninnge nga be fa yi sraka'n, nin fie'm bé su mma klikli'n, ɔ nin blusu'm be gua nun'n i su. Nyanmiɛn nyrun jranfuɛ'm be aliɛ nga mmla'n kleli kɛ be man be'n, kɛ be ko fɛ i klɔ'm be su be ba'n, sran nga be sieli be'n be yɛ be sɔ nun yɛ be fa sie i sua'm be nun-ɔn. Yɛ be yɛ be nian su-ɔ. Zidafuɛ'm be klun jɔli junman nga Nyanmiɛn nyrun jranfuɛ mun, nin Levifuɛ'm be dili'n su.

⁴⁵ Nyanmiɛn nyrun jranfuɛ mun, nin Levifuɛ'm be dili be Nyanmiɛn i junman'n, yɛ be dili sran nin ninnge'm be saun yolɛ junman'n. Jue tofuɛ mun, nin anuan su nianfuɛ'm be kusu be niannin siesielɛ nga David nin i wa Salomɔn be siesieli'n su.

⁴⁶ Kɛ ɔ fɛ i lalafuɛ nun'n, David nin Azaf be blɛ su'n, jue tofuɛ'm be nyrun jranfuɛ'm be o lɛ, be tinngɛ Nyanmiɛn i ayɛ yilɛ nin i manmanlɛ jue mun.

⁴⁷ Zorobabɛl nin Neemi be blɛ su'n, Izraɛlfuɛ'm be kwlaa be man jue tofuɛ nin anuan su nianfuɛ'm be like liɛ ng'ɔ fata kɛ be fa man be cɛn kwlakwla'n. Be fa ng'ɔ ti bɔ be sie i ngunmin man Nyanmiɛn'n, be fa man Levifuɛ mun yɛ Levifuɛ'm be kusu be fa ng'ɔ ti Aarɔn osu nunfuɛ'm be liɛ'n be fa man be.