Neemi 11 - NYANMIƐN NDƐ'N 1998

Zuif nga be tran Zerizalɛm'n

¹ Kpɛnngbɛn'm be trannin Zerizalɛm. Be tuli be kun nga'm be wun fɔtɔ. Kɛ be tu sran blu be wun fɔtɔ'n, kun ´tran Zerizalɛm Nyanmiɛn i klɔ'n su, yɛ be ngwlan kun nga'm be ´tran klɔ uflɛ'm be su.

² Be kwlaa nga be waan be ´tran Zerizalɛm'n, sran'm be yoli be mo.

³ Zida klɔ kun nga'm be su'n, sran'm be kali be asiɛ nin be klɔ'm be su. Be sɔfuɛ mun yɛlɛ Nyanmiɛn nyrun jranfuɛ mun, nin Levifuɛ mun, nin Nyanmiɛn i sua'n nun junman difuɛ nga be lɛ su kpɛn mun'n, ɔ nin Salomɔn i sufuɛ mun. Zida kpɛnngbɛn kun nga'm be trannin Zerizalɛm.

⁴ Zidafuɛ nin Bɛnzamɛnfuɛ wie'm be trannin Zerizalɛm. Zidafuɛ mun yɛ: Ataza, Ataza i si'n yɛlɛ Ozias, Ozias liɛ'n yɛlɛ Zakari, Zakari liɛ'n yɛlɛ Amaria, Amaria liɛ'n yɛlɛ Sɛfatia, Sɛfatia liɛ'n yɛlɛ Maalaleɛl. Perɛs osu nunfuɛ mun-ɔn.

⁵ Be wie mun ekun yɛlɛ Maazeza, Maazeza i si'n yɛlɛ Barik, Barik liɛ'n yɛlɛ Kɔl-Oze, Kɔl-Oze liɛ'n yɛlɛ Azaza, Azaza liɛ'n yɛlɛ Zozarib, Zozarib liɛ'n yɛlɛ Zakari, Zakari liɛ'n yɛlɛ Silɔni.

⁶ Perɛs osu'n nunfuɛ nga be trannin Zerizalɛm'n be ti sran kpakpa ya nnan sran ablesiɛn-nin-mɔcuɛ.

⁷ Bɛnzamɛnfuɛ mun yɛ: Sali, Sali i si'n yɛlɛ Mɛsilam, Mɛsilam liɛ'n yɛlɛ Zɔɛd, Zɔɛd liɛ'n yɛlɛ Pɛdaza, Pɛdaza liɛ'n yɛlɛ Maazeza, Maazeza liɛ'n yɛlɛ Itiɛl, Itiɛl liɛ'n yɛlɛ Ezai.

⁸ I wie yɛlɛ Gabai yɛ Salai. Be kwlaa'n be ti sran ya ngwlan sran ablaɔn-nin-mɔcuɛ.

⁹ Zikri i wa Zoɛl yɛ ɔ ti be kpɛnngbɛn-ɔn, yɛ Sɛnia i wa Zida yɛ ɔ ti klɔ kpɛnngbɛn'n i mantanfuɛ-ɔ.

¹⁰ Nyanmiɛn nyrun jranfuɛ mun yɛ: Zozarib i wa Zɛdaza ɔ nin Zakɛn, nin

¹¹ Sɛraza Ilkiza i wa'n. Ilkiza i si yɛlɛ Mɛsilam, Mɛsilam liɛ'n yɛlɛ Zadɔk, Zadɔk liɛ'n yɛlɛ Mɛrazɔt, yɛ Mɛrazɔt liɛ'n yɛlɛ Asitib. Asitib yoli Nyanmiɛn nyrun jranfuɛ kpɛnngbɛn.

¹² Be nin be niaan ya mɔcuɛ ablaɔn-nin-nnyɔn be di Nyanmiɛn i sua'n nun junman. Be wie yɛlɛ Zɛrosam i wa Adaza. Zɛrosam i si yɛlɛ Pɛlalia, Pɛlalia liɛ'n yɛlɛ Amzi, Amzi liɛ'n yɛlɛ Zakari, Zakari liɛ'n yɛlɛ Pasir, Pasir liɛ'n yɛlɛ Malkiza.

¹³ Adaza nin i niaan nga be ti awlo su kpɛn'm be ti ya nnyɔn sran ablanan-nin-nnyɔn. Be wie yɛlɛ Azareɛl i wa Amasai. Azareɛl i si'n yɛlɛ Akzai, Akzai liɛ'n yɛlɛ Mɛsilemɔt, Mɛsilemɔt liɛ'n yɛlɛ Imɛr.

¹⁴ Be niaan sonja kpakpa ya ablaɔn-nin-mɔcuɛ be uka be su. Bé su kpɛn'n yɛlɛ Gedɔlim i wa Zabdiɛl.

¹⁵ Levifuɛ mun yɛ: Asib i wa Sɛmaɛza. Asib i si'n yɛlɛ Azrikam, Azrikam liɛ'n yɛlɛ Asabia, Asabia liɛ'n yɛlɛ Bini.

¹⁶ Be kpɛnngbɛn nga be nian Nyanmiɛn i sua'n i sin junman'n i su'n yɛlɛ Sabɛtai nin Zozabad.

¹⁷ Be wie yɛlɛ Mise i wa Matania. Mise i si'n yɛlɛ Zabdi, Zabdi liɛ'n yɛlɛ Azaf. Kɛ be ´srɛ Nyanmiɛn, Matania yɛ ɔ man Nyanmiɛn i manmanlɛ jue'm be su-ɔ, Bakbikia, b'ɔ ti Matania i niaan be nun kun'n ɔ ukɛ i. Be wie yɛlɛ Samia i wa Abda. Samia i si'n yɛlɛ Galal, Galal liɛ'n yɛlɛ Zɛditɛn.

¹⁸ Nyanmiɛn i klɔ'n su Levifuɛ'm be kwlakwla be ti ya nnyɔn sran ablaɔcuɛ-nin-nnan.

¹⁹ Anuan su nianfuɛ mun yɛlɛ Akib, Talmɔn ɔ nin be niaan nga be nian anuan'n su'n. Be ti sran ya ableso-nin-nnyɔn.

²⁰ Izraɛlfuɛ kun nga mun, ɔ nin Nyanmiɛn nyrun jranfuɛ mun, ɔ nin Levifuɛ'm be trannin Zida klɔ kun nga'm be su. Be trannin be asiɛ'm be su sɛsɛsɛ.

²¹ Nyanmiɛn i sua'n nun junman difuɛ nga be lɛ su kpɛn'n be trannin Zerizalɛm i lika nga be flɛ i Ɔfɛl'n nun. Bé su kpɛn mun yɛlɛ Zisa nin Gispa.

²² Zerizalɛm lɔ Levifuɛ'm be kpɛnngbɛn'n yɛlɛ Bani i wa Izi. Bani i si'n yɛlɛ Asabia, Asabia liɛ'n yɛlɛ Matania, Matania liɛ'n yɛlɛ Mise. Izi ti Azaf i osu'n nunfuɛ. Be yɛ be nian Nyanmiɛn i sua'n nun jue tolɛ'n i su-ɔ,

²³ afin famiɛn'n kpɛli jue tofuɛ'm bé wun mmla. Be siesieli kɛ be `tannin be kalɛ cɛn'n kwlakwla.

²⁴ Mɛsezabeɛl i wa Pɛtakza b'ɔ ti Zerak osu'n nunfuɛ'n ɔ nin Zida akpasua sufuɛ'n, ɔ jran Izraɛl nvle'n i nuan famiɛn nyrun.

Zuif nga be tran-man Zerizalɛm'n

²⁵ Zidafuɛ kun nga'm be trannin klɔ nin be sa su klɔ kanngan'm be su. Klɔ sɔ'm be yɛ: Kirzat-Arba nin klɔ nga be o i asa'n su'n, Dibɔn nin klɔ nga be o i asa'n su'n, Zɛkabzeɛl nin klɔ nga be o i asa'n su'n,

²⁶ Zesia nin Mɔlada, nin Bɛt-Palɛt, nin

²⁷ Azar-Sial, nin Beɛr-Seba nin klɔ nga be o i asa'n su'n,

²⁸ nin Ziklag, nin Mɛkɔna ɔ nin klɔ nga be o i asa'n su'n,

²⁹ nin An-Rimɔn, nin Zɔrea, nin Zarmit, nin

³⁰ Zanɔak, nin Adilam ɔ nin be klɔ nga be o be asa'n su'n, nin Lakis nin i klɔ mun, nin Azeka nin klɔ nga be o i asa'n su'n. Be tran Beɛr-Seba nin Inɔm kongo'n be afiɛn.

³¹ Bɛnzamɛn akpasua sufuɛ'm be trannin Gɛba, nin Mikmas, nin Aza, nin Betɛl ɔ nin klɔ nga be o i asa'n su'n,

³² nin Anatɔt, nin Nɔb, nin Anania, nin

³³ Azɔr, nin Rama, nin Gitaim, nin

³⁴ Adid, nin Zɛbɔim, nin Nɛbalat, nin

³⁵ Lɔd, nin Ɔno, ɔ nin ajuin difuɛ'm be kongo'n nun.

³⁶ Levifuɛ nga be ti Zida nvle'n nunfuɛ'm be nun wie'n, be tu ko trannin Bɛnzamɛn nvle'n nun.