Neemi 10 - NYANMIƐN NDƐ'N 1998

Sran'm be sili be wue nun kɛ be ´fa mmla'm be su

¹ Sa ng'ɔ juli ye su'n i kwlaa ti, é nuan yiali ndɛ kun su. Ndɛ sɔ'n e klɛli. E famiɛn i awlo lɔ sran dandan mun, nin e Levifuɛ mun, nin e Nyanmiɛn nyrun jranfuɛ mun, be fali bé sa nuan nzɔliɛ'n sieli su, nan y'a kata su kpan.

² Be nga be dunman o fluwa sɔ'n nun'n, bɔ be fali be sa nuan sieli su'n yɛlɛ Akalia b'ɔ ti siefuɛ'n i wa Neemi, Sedesias,

³ Sɛraza, Azaria, Zeremi,

⁴ Pasir, Amaria, Malkiza,

⁵ Atis, Sɛbania, Malik,

⁶ Arɔm, Mɛremɔt, Abdias,

⁷ Daniɛl, Ginɛtɔn, Barik,

⁸ Mɛsilam, Abiza, Mizamɛn,

⁹ Maazia, Bilgai ɔ nin Sɛmaɛza. Be kwlaa be ti Nyanmiɛn nyrun jranfuɛ.

^10-14 Levifuɛ mun yɛ: Azania i wa Zozie, Binii b'ɔ ti Enadad i osu nunfuɛ'n, Kadmiɛl, ɔ nin be niaan Sɛbania, Ɔdiza, Kɛlita, Pɛlaza, Anan, Mise, Rɛɔb, Asabia, Zakir, Serebia, Sɛbania, Ɔdiza, Bani, nin Bɛnini.

^15-28 Kpɛnngbɛn mun yɛ: Parɛɔs, Pasat-Moab, Elam, Zati, Bani, Bini, Azgad, Bebai, Adɔniza, Bigvai, Adɛn, Atɛr, Ezekias, Azir, Ɔdiza, Asɔm, Bɛzai, Arif, Anatɔt, Nebai, Magpias, Mɛsilam, Ezir, Mɛsezabeɛl, Zadɔk, Zadia, Pɛlatia, Anan, Anania, Oze, Anania, Asib, Alɔsɛs, Pilka, Sɔbɛk, Rɛɔm, Asabna, Maazeza, Asiza, Anan, Ana, Malik, Arɔm, ɔ nin Baana.

²⁹ Izraɛlfuɛ kun nga'm be yɛ: Nyanmiɛn nyrun jranfuɛ mun, nin Levifuɛ mun, nin anuan su nianfuɛ mun, nin jue tofuɛ mun, nin Nyanmiɛn i sua'n nun junman difuɛ bɔ be lɛ su kpɛn mun'n, ɔ nin be kwlaa nga be nin nvle uflɛ'm be tili nun afin be kunndɛ kɛ be ´fa Nyanmiɛn mmla'n su'n, be sɔfuɛ mun nin bé yi, nin be mma bla annzɛ yasua nga be wun sa wlɛ'n.

³⁰ Be ukali e niaan Zuif nga be ti e nun kaklaakla'm be su. E kwlakwla e tali nda yɛ e jrannin su kɛ e ´fa Nyanmiɛn i mmla'm bɔ i sufuɛ Moiz fa mannin ye'n su. E tali nda kɛ e ´fa ndɛ wafa kwlaa nga Anannganman e Min'n kannin'n, yɛ e tali nda ekun kɛ e ´fɛ i mmla'n nin i sa nuan su yolɛ mmla'm be su.

³¹ E tali nda ekun kɛ e fa-man é wa bla mun e man-man aja nvle uflɛ nun, nan e ja-man nvle uflɛ nun bla e man-man é mma mun.

³² E tɛli i ekun kɛ nvle nga be yo aliɛ annzɛ like uflɛ atɛ'n, sɛ be fa ba wunmiɛn-delɛ-cɛn annzɛ e cɛn dilɛ uflɛ wie nun'n, e su to-man. E tɛli i kɛ e ´di fie afuɛ nsiɛn, nan i afuɛ nso su'n, e ´yaci asiɛ'n man ɔ de wunmiɛn. Sɛ é kalɛ o sran su'n, e ´yaci cɛ .

³³ E siesieli kɛ afuɛ nuan'n kwlaa e ´man sika gram nnan, ɔ ti Nyanmiɛn i sua'n i nun junman'n liɛ.

³⁴ Sika sɔ'n, be ´fa wie to kpaun nga be fa sie i Nyanmiɛn nyrun'n, be ´fa wie to sraka annzɛ tɛ nga e su wa bobo be su yɛ be wun ninnge annzɛ be wun nnɛn mun: sraka nga be yi i cɛn kwlaa, tɛ nga be yrɛ i nnɛn'n kɔlikɔli'n, wunmiɛn-delɛ-cɛn tɛ'n, ɔ nin anglo le kun tɛ'n, ɔ nin cɛn dilɛ uflɛ nun tɛ'n, ɔ nin sraka uflɛ nga be yi man Nyanmiɛn'n ɔ nin Izraɛlfuɛ'm be ti kpatalɛ tɛ'n, yɛ be ´fa wie di Nyanmiɛn i sua'n nun siesielɛ junman'n kwlakwla.

³⁵ Nyanmiɛn nyrun jranfuɛ mun, nin Levifuɛ mun, ɔ nin e nga mun, e kwlaa e tuli yie nga mmla'n kle kɛ be trɔ i e Nyanmiɛn'n i sɔwlɛ'n su'n i wun fɔtɔ. Blɛ nga e ko bu yie'n e ko ba'n afuɛ kwlakwla'n, e siesieli i awlobo-awlobo.

³⁶ E waan afuɛ kwlaa e ´fa e fie'n su ninnge klikli'n, ɔ nin e waka'n kwlaa be su mma klikli'n, e ´fa ba Anannganman i sua'n nun.

³⁷ E waan e ´fa e talua ba yasua mun, ɔ nin e nnɛn'm be talua ba mun, e ´fa be ba kɛ ɔ ti klɛwa mmla'n nun'n sa. E ´fa be ba e Nyanmiɛn i sua'n nun, e ´fa be blɛ Nyanmiɛn nyrun jranfuɛ mun bɔ be di e Nyanmiɛn i sua'n nun junman'n. E ´fa e nannin mun nin e bua'm be talua ba mun e ba.

³⁸ E waan e ´man Nyanmiɛn nyrun jranfuɛ mun e sanmlɛn mlɛnnɛnnɛn kpa'n wie, ɔ nin e ndidiɛ ninnge nga be fa yi sraka'n be wie, ɔ nin e waka'm be kwlaa be mma'm be wie, ɔ nin nzan lɔflɛ'n, nin ngo'n wie. E ´fa kɔ e Nyanmiɛn i sua ba'm be nun lɔ. E fie'm be su blusu'n b'ɔ ti Levifuɛ'm be liɛ'n, e waan be bɔbɔ be `wlan-wlan klɔ'n kwlaa su be `fa e junman'n nuan like'm be blusu'n.

³⁹ Man Aarɔn i osu'n nunfuɛ kun b'ɔ ti Nyanmiɛn nyrun jranfuɛ'n ko sunman Levifuɛ nga be dede blusu'n mun. Levifuɛ'm be `fa blusu sɔ'm be blusu be `fa bla e Nyanmiɛn i sua'n nun lɔ sua ba'm be nun, kan be sie ninnge kpakpa'm be lɔ'n.

⁴⁰ Ble, ɔ nin nzan, ɔ nin ngo bɔ be ti sraka ninnge mun'n, man Levifuɛ'm ɔ nin Izraɛlfuɛ kun nga mun be fa be bla sua ba sɔ'm be nun. Lɛ yɛ Nyanmiɛn i sua'n nun ninnge'm be wo-ɔ. Lɛ yɛ Nyanmiɛn nyrun jranfuɛ nga be di i junman'n be wo-ɔ. Lɛ yɛ anuan su nianfuɛ nin jue tofuɛ'm be wo-ɔ. E waan e ´yo sɔ nan y'a kpa-man e Nyanmiɛn i sua'n su.