Neemi 1 - NYANMIƐN NDƐ'N 1998

¹ Akalia i wa Neemi i ndɛ'n. Kɛ Artaksɛrksɛs trannin bia'n su'n i afuɛ ablaɔn su'n, Kisle anglo'n nun'n, wuun min Neemi, n wo famiɛn klɔ nga be flɛ i Siz'n su.

Neemi tili Zerizalɛm lɔ jasin'n

² Anani b'ɔ ti min niaan'm be nun kun'n, ɔ nin sran wie'm be fin Zida be bali. N usali be nga be fin kanga nun ɔli'n be osu be sa nun. Yɛ n usali Zerizalɛm klɔ'n i wun ndɛ ekun.

³ Be seli min kɛ be nga be fin kanga nun ɔli'n be tran Zida akpasua'n su lɔ, yɛ be o nyrɛnnɛn nin nyannzuɛn'n nun. Be seli min ekun kɛ Zerizalɛm klɔ'n kusu i talɛ'n wie ɔ'a bu, yɛ be wɔli i anuan'm be nun.

Neemi i Nyanmiɛn b'ɔ srɛli mannin Zuif mun'n

⁴ Kɛ n tili ndɛ sɔ'n, n trannin ase, n sunnin, n trannin awlaboɛ sɔ'n nun n dili le nnyɔn kun. N kpɛli srɛ nun, n srɛli Nyanmiɛn b'ɔ o nglo lɔ'n.

⁵ N seli i kɛ: «Ee! Anannganman, nglo lɔ Nyanmiɛn, Nyanmiɛn Kpli b'ɔ yo sro, wɔ bɔ a nin sran tra aenguɛ-ɔ, a saci-mɛn i'n, wɔ bɔ sran nga be klo wɔ'n, bɔ be fa ɔ mmla'n su'n, a nin be nanti klanman'n,

⁶ nian min, sie ɔ́ su tie min srɛlɛ'n. Kɔnguɛ nin wia su n srɛ wɔ m man ɔ sufuɛ Izraɛlfuɛ mun. N kan Izraɛlfuɛ mun ɔ nin e kwlakwla e sa tɛ'n bɔ e yoli wɔ'n i ndɛ kle wɔ, afin e nin min nannan mun e yoli sa tɛ.

⁷ E fɔnnin ɔ́ wun, y'a fa-man mmla fanunfanun nga a fa mannin ɔ sufuɛ Moiz'n su .

⁸ Sanngɛ man ɔ́ wla kpɛn ndɛ nga a fa wlali ɔ sufuɛ Moiz nuan kɛ ɔ kan kle ye'n su . Ɔ waan sɛ e yo sa tɛ'n, wɔ man e ´bo sanndi nvle uflɛ'm be nun,

⁹ sanngɛ sɛ e kaci ajalɛ'n, sɛ e fa ɔ mmla'm be su'n, nan e fa ɔ ndɛ'm be su'n, kannzɛ be tra ye ɔli asiɛ'n i awieliɛ lɔ'n, a ´ko fa ye ba lika nga a kleli kɛ be `bo ɔ dunman lɛ'n nun .

¹⁰ Be ti ɔ sufuɛ mun, be ti ɔ nvle i nunfuɛ mun. Ɔ kwlalɛ bɔ a kwla'n ɔ nin ɔ tinmin dan'n yɛ man a deli be-ɔ.

¹¹ Min Min, sie ɔ́ su tie min srɛlɛ'n ɔ nin ɔ sran nga be nyin yi wɔ'n be srɛlɛ'n. Man n nyan muae ndɛkɛn, yo man n nyan jranwlɛ bian sɔ'n i nyrun.» I blɛ sɔ nun'n, wuun n ti famiɛn'n i nzan sufuɛ.