Naɔm 2 - NYANMIƐN NDƐ'N 1998

¹ Zidafuɛ mun, amun `nian, jasin fɛ bofuɛ kun yɛ ɔ fin oka'm be su lɔ ´ba yɛ. Ɔ ti fɔundi jasin bofuɛ. Amun `di amun cɛn mun, ninnge nga amun fua be kleli Nyanmiɛn kɛ amun ´fa mɛn i'n, amun `fa ko mɛn i. Sran ng'ɔ sin amun su kle amun yalɛ'n, ɔ ba-man kun. Ɔ ba-man kun, i blɛ'n wieli.

² Ninivfuɛ mun, sonja kpakpa'm be nin amun su ba alɛ kunlɛ. Amun `sasa amun fiawlɛ klɔ'n i anuan'n, amun `nian amun atin'm be su, amun `buabua amún wun amun `fa amun wunmiɛn'n kwlakwla nan an nin be an `kun.

³ Amun `nian! Anannganman'n su man Zakɔb i anunman'm be kɔmin su kɛ laa'n sa. Ɔ su man Izraɛl kɔmin su kɛ laa'n sa, afin Izraɛl ti kɛ i vinyi fie sa. Abɔlɛfuɛ'm be kpɔngbɔli vinyi sɔ'n i mma'n, be bubuli vinyi'n bɔbɔ kpɛtɛɛ .

Sran'm b'a wlu Niniv klɔ'n nun b'a fɛn i nun ninnge mun

⁴ Ninivfuɛ'm be kpɔfuɛ'm be sonja mun be nyrɛn'm be ti ɔkwlɛ, bé wun tralɛ'm be blo kankankan. Kɛ be ´kɔ alɛ kunlɛ'n, be kakaklolo'm be sɔ youn kɛ sin sa, a ´nian-an b'a man be ta'm be su.

⁵ Kakaklolo'm be sin akpɔ'm be su nin lika'm be nun kɛ sran bɔ b'a bo fia sa. A wun be sa-a ɔ waan tɛ yɛ b'a sɔ-ɔ. Be sin ndɛndɛ kɛ nyanmiɛn'n su kpa sin sa.

⁶ Niniv famiɛn'n flɛ i sonja kpɛnngbɛn mun, be ´ba'n, wuun be ´bo nvaka. Be kpɔfuɛ'm be wanndi be kɔ talɛ'm bé wun lɔ, be ko fia nyrɛn dan'n i sin.

⁷ E ´ijɔ wa-a, b'a bubu anuan nga bé nyin kaci nzue ba'm be su lɔ'n, kpɛkuun nzue'n ɔ'a saci famiɛn sua'n.

⁸ B'a fa be amuɛn bla bɔ be fa sika ɔkwlɛ yoli'n b'a ɔ. Afanniɛn bla nga be niɛn i su'n, be kplin kɛ auble sa, be fin be wue'n nun.

⁹ Niniv ti kɛ sɛ wie bɔ ɔ'a yi bɔ i nun nzue'n kwlaa su wie utu'n sa. Klɔ'n sufuɛ'm be lɛ wanndilɛ, be kpan flɛ be kɛ: «Amun `jran! Amun `jran!» Sanngɛ be liɛ nga be si i'n yɛlɛ wanndilɛ, sran fi bli-mɛn i nyin niɛn-mɛn i sin.

¹⁰ Be `fɛn jɛtɛ ufue'n nin sika ɔkwlɛ'n. Klɔ'n su aunnyan'n su wie-man le, afin ninnge kpakpa'm be yi klɔ'n piɛ!

¹¹ Be de ninnge mun, be saci-saci be, be fɛn be! Sran'm bé sa sin ɔ'a bubu be, be jran bé ja'm be su-ɔ, ɔ jran-man kun, be usu sa kpɛkpɛkpɛ, kɛ a wun be nyrun'n a si kɛ srɛ kun be .

Niniv yoli kɛ asɔmɔli bɔ b'a kwlɛ i'n sa

¹² ?Asɔmɔli'm be klɔ'n ɔ'a yo sɛ siɛn'n? Laa, asɔmɔli mma'm be nyan be aliɛ lɛ be di. Kɛ asɔmɔli'n ´kɔ koniɛn dilɛ'n, i mma'm be o be olɛ lɛ cɛ sran fi bo-man bé wun tanngɔ.

¹³ Kɛ asɔmɔli'n kun nnɛn mun'n, ɔ titi be nun fa man asɔmɔli bla'n ɔ nin i mma mun. Nnɛn ng'ɔ tra be'n, be yi i lawlɛ'n kpɔkpɔkpɔ.

¹⁴ Anannganman b'ɔ sie mɛn wunmuan'n ɔ kan ndɛ kle Niniv. I waan: «Niniv, e nin wɔ y'a nyɛn i, n wa yra wɔ alɛ kakaklolo mun kɔlikɔlikɔli, be ´kun wɔ asɔmɔli bɔ b'a kpɛ cro'n mun alɛ nun. Ɔ nnɛn tralɛ'n ɔ wa wie mɛn'n nun. Be su ti-man be nga a sunman be'n be ngan kun.»