Naɔm 1 - NYANMIƐN NDƐ'N 1998

¹ Niniv klɔ'n i wun ndɛ nga bɔ Anannganman fa wlali Naɔm b'ɔ fin Ɛlkɔs, i nuan kɛ ɔ kan'n yɛ. Aolia nun yɛ Nyanmiɛn kan ndɛ sɔ'n kleli i-ɔ.

Anannganman Nyanmiɛn'n yo sro yɛ ɔ ti kpa

² Anannganman'n ti Nyanmiɛn kun b'ɔ si kwla. Be yo i sa-a ɔ yaci cɛ-man, ɔ yo be wie, i ya'n ti-man blɛblɛ. I kpɔfuɛ'm be yo i sa-a ɔ yo be wie. Ɔ yaci cɛ-man be .

³ Anannganman fa-man ya ndɛndɛ, i wunmiɛn'n ti dan. Sran ng'ɔ yo sa tɛ'n, ɔ yaci-mɛn i lɛ ngbɛn. Kɛ ɔ ´sin'n, aunngban dan kun fita, ndutre ng'ɔ ´nanti-ɔ ɔ tu'n, sɛ e ´kwla se'n, yɛlɛ nzue ng'ɔ mlan'n .

⁴ Kɛ ɔ kpan jenvie'n su'n, kpɛkuun jenvie'n ɔ'a wie nun. Ɔ yo man nzue ba dandan'm be wie nun, kpɛkuun Bazan nin Karmɛl lɔ nnya nin ijre'm be glɔ, yɛ Liban lɔ waka nnyrɛ'm be glɔ wie.

⁵ Kɛ ɔ kɛn i wun'n, oka'm be keje, kpɛkuun kpɔlɛ'm be bubu be gua. Kɛ ɔ ´ba'n, asiɛ wunmuan'n keje, asiɛ wunmuan'n nin i su sran'm be kwlaa be usu.

⁶ ?Kɛ ɔ ko fa ya'n, wan yɛ ɔ kwla jrɛn i nyrun-ɔn? ?Blɛ b'ɔ yi i ya dan'n i nglo'n, wan yɛ ɔ kwla jrɛn i nyrun-ɔn? I ya'n ɔ jue kɔ i nyrun kɛ sin sa. Yɛbuɛ tanda mun bɔbɔ ɔ kpaci be nun.

⁷ Anannganman'n ti kpa. Awlaboɛ blɛ nun'n, i sin yɛ be fia-a. Be nga be fiɛ i fɔnvɔ'n bo'n, ɔ nian be lika .

⁸ Sanngɛ i kpɔfuɛ'm be liɛ'n, kɛ nzue ba dan kun yi gua b'ɔ kata asiɛ'n su b'ɔ nunnun lika'n sa, ɔ wa nunnun be. Ɔ ´fa be kɔ aosin tuun'n nun.

Zida nin Niniv be ngaliɛ mun

⁹ ?Nguɛ akunndan yɛ an bu i Anannganman wun-ɔn? I yɛ ɔ nunnun amun kpɔfuɛ mun treketreke-ɔ, be su mianmian-man amun kun.

¹⁰ B'a yo kɛ owie bɔ b'a to b'a bla be wiengu'n sa, be nɔn nzan lele ɔ'a ti be. Be ´yra kɛ ijre kee kpa'n sa .

¹¹ Niniv, ɔ lɔ yɛ akunndan tɛ bufuɛ b'ɔ sunnzun Nyanmiɛn nin tɛ'n fin-ɔn .

¹² Anannganman se Zidafuɛ'm be kɛ yoo: «Man amun kpɔfuɛ'm be sɔn kaka kpa, man be nyan wunmiɛn kpa, sanngɛ be ´nunnun sekeseke, be nun kun sa su ka-man. N toli afɛ'n n yili amun su, sanngɛ n su yo-mɛn i sɔ kun .

¹³ Zidafuɛ mun, amun liɛ'n, m ´bubu waka nga be fa wlali amun kɔmin'n nun, kpɛkuun n ´de amun, n ´kpɛkpɛ jrɔkɔ nga be fa cili amun'n be nun .»

¹⁴ Ninivfuɛ mun, Anannganman ɔ'a fua a kle amun. I waan: «Amun su nyan-man osufuɛ fi b'ɔ ´suan amun dunman nin-ɔn. Amun amuɛn sua'n nun amuɛn mma nga amun fali waka yɛ be sɛli'n nin nga amun fali blalɛ yɛ be yoli'n, n ´saci be. Kunman nga be ko sie amun nun'n, n su kpɛ. N su kpɛ, afin amun ti-man like fi min nyrun kun.»