Mmla'n 9 - NYANMIƐN NDƐ'N 1998

Nán kɛ Izraɛlfuɛ'm be ti kpa ti-ɔ

¹ Izraɛlfuɛ mun, amun `sie amún su! Zurdɛn'n yɛ amun su wa kpɛ i lɛ-ɔ. Amun ´ko fa nvle bɔ be dandan tra amun liɛ'n, bɔ be nun sran'm be kekle tra amun. Nvle sɔ'm be nun klɔ'm be ti dandan, yɛ bé wun talɛ'm be ti cinnjin kpa, yɛ be ti nglo-nglo.

² Nvle dan sɔ'm be nunfuɛ'm be wie yɛlɛ Anakfuɛ mun, be ti sran jajraajra. Amun si be. Be yɛ be kan be ndɛ kɛ: «?Anak i mma mun'n, wan yɛ ɔ jran be nyrun-ɔn ɔ yo ye-ɔ?» Amu'an ti ndɛ sɔ'n le.

³ Ndɛkɛn'n, man amun si kɛ Anannganman amun Nyanmiɛn'n ɔ ´dun mmua amun nyrun, ɔ ti kɛ sin sa, ɔ yra. I yɛ ɔ wa nunnun be-ɔ. I yɛ ɔ ´gua be nyin ase-ɔ. Ɔ man amun wa fuan be, amun wa kun be ndɛndɛ kpa kɛ Anannganman kan kleli amun'n sa.

⁴ Sɛ Anannganman amun Nyanmiɛn'n ɔ fuan be amun nyrun'n, nán amun di amún nuan se kɛ: «E kpa bɔ e ti'n ti yɛ Anannganman fali e bali kɛ e wa tran mɛn nga nun-ɔn.» Afin nvle sɔ'm be aeliɛ tɛtɛ'n ti yɛ Anannganman ´fuan be amun nyrun-ɔn.

⁵ Nán kɛ amun ti kpa annzɛ amun ti sɛsɛ ti yɛ amun su wa fa be mɛn nin-ɔn. Ɔ ti-man sɔ. Nvle sɔ'm be aeliɛ tɛtɛ'n ti yɛ Anannganman amun Nyanmiɛn'n ´fuan be amun nyrun-ɔn. I waan ɔ ´yo sɔ nan ɔ ´yia nda ng'ɔ tali amun nannan Abraam, nin Izaak, nin Zakɔb'n i nuan.

⁶ Man amun si kɛ sɛ Anannganman amun Nyanmiɛn'n fa mɛn klanman nga man amun kɛ amun tran nun'n, nán kpa yɛ amun ti i ti yɛ ɔ fa mannin amun-ɔn, afin amun ti nyin keklefuɛ.

Amuɛn bɔ Izraɛlfuɛ'm be fali sika ɔkwlɛ be yoli'n

⁷ Nán amún wla fi wafa nga amun fa klɔklɔli Anannganman amun Nyanmiɛn'n aawlɛ flɛnnɛn'n nun lɔ b'ɔ ko fa ya'n su. Man ɔ ka amun klun. Kɛ ɔ fin cɛn bɔ amun fin Ezipt mɛn'n nun lɔ bali'n, bɔ amun ´fa ju lika nga nun wa'n, amu'an yaci-man nyin kekle yolɛ Anannganman su le.

⁸ Orɛb lɔ amun klɔklɔli Anannganman nan ɔ'a fa amún wun ya dan kpa, i osu ti i waan ɔ ´nunnun amun.

⁹ N fuli oka'n su lɔ yɛbuɛ paplaapla nnyɔn'm be falɛ. Aenguɛ nga Anannganman nin amun trali'n, i nun ndɛ'm be klɛ guali yɛbuɛ sɔ'm be su. N trannin lɔ kɔnguɛ nin wia nun cɛn ba ablanan, m'an di-man like, m'an nɔn-man nzue.

¹⁰ Nan Anannganman ɔ'a fa yɛbuɛ paplaapla nnyɔn sɔ mun ɔ'a man min. I bɔbɔ fɛli i sama klɛli be su. Ndɛ nga ɔ jrannin sin nun kɛnnin i oka'n su lɔ'n i nun b'ɔ yiali amun'n, i kwlaa o yɛbuɛ sɔ'm be su.

¹¹ Kɛ cɛn ba klonglo ablanan sɔ'm be sinnin'n yɛ Anannganman fali yɛbuɛ paplaapla mun mannin min-ɔn. Yɛbuɛ sɔ'm be su yɛ aenguɛ nga Anannganman nin amun trali'n i nun ndɛ be o-ɔ.

¹² Ɔ seli min kɛ: «Jaso, kan ɔ́ wun jra, afin ɔ sran nga a fa be Ezipt lɔ bali'n, b'a yo sa tɛ dan. B'a yaci atin nga n kleli be'n lɛ lalaa, b'a klo sika ɔkwlɛ b'a yo amuɛn.»

¹³ Anannganman seli min ekun kɛ: «M'an wun kɛ nvle nga nunfuɛ'm be nyin ti kekle.

¹⁴ Jran man n nunnun be, nan be dunman'm be wie mɛn'n nun. Yɛ n yo man nvle kun ´fin ɔ nun fite. I nunfuɛ'm be ´nyan wunmiɛn tra sran nga mun, yɛ be ´sɔn tra be.»

¹⁵ Yɛ n ´fin oka'n su lɔ n ´jrali-ɔ. M ´ba-a, aenguɛ nga Anannganman nin e trali'n i yɛbuɛ paplaapla nnyɔn'm be o n sa nnyɔn'm be nun. Kɛ ɔ ´yo sɔ'n, wuun sin'n ´jue oka'n su lɔ.

¹⁶ N wunnin kɛ amu'an fɔn Anannganman amun Nyanmiɛn'n i wun sakpa. Afin amun kloli sika ɔkwlɛ amun fa yoli amuɛn, i wafa'n ti kɛ nannin ba sa. Atin nga Anannganman kleli amun'n, amun yacili i lɛ ndɛndɛ kpa, amu'an fa-man su.

¹⁷ Yɛ n fali n sa nnyɔn'n m mannin yɛbuɛ paplaapla nnyɔn'm be su, yɛ n tɛli be ase m bubuli be nun amun nyrun lɛ-ɔ.

Moiz kpatali Izraɛlfuɛ'm bé ti

¹⁸ Kpɛkuun n tɔli nan m'an utu mín nyin ase Anannganman nyrun kɔnguɛ nin wia nun cɛn ba ablanan ekun, m'an di-man like, m'an nɔn-man nzue, afin amun klɔklɔli Anannganman, ɔ man ɔ fali ya amun sa tɛ bɔ amun yoli'n ti.

¹⁹ Afin kɛ n wunnin ya dan nga Anannganman ɔ'a fa bɔ man i waan ɔ ´nunnun amun'n, srɛ kunnin min dan. Sanngɛ Anannganman tili min srɛwa'n cɛn sɔ'n nun ekun.

²⁰ Anannganman fali ya dan kpa Aarɔn wun, i waan ɔ ´kun i, nan m'an srɛ m'an mɛn i wie le kun sɔ'n nun.

²¹ Yɛ sika ɔkwlɛ nannin ba'n b'ɔ ti amún sa tɛ'n i nzɔliɛ'n, n fa yili i sin nun. Kpɛkuun n fufuli nun, n nunkunnin i, nan m'an fɛ i sanmlɛn'n m'an gua nzue b'ɔ fin oka'n su lɔ sonji jra'n nun.

²² Amun klɔklɔli Anannganman Tabeera lɔ, nin Masa lɔ, yɛ Kibrɔt-Atava lɔ, ɔ man ɔ fali ya.

²³ Kadɛs-Barnea lɔ'n, kɛ Anannganman seli amun kɛ amun `wɔ ko fa mɛn nga ɔ'a fa man amun'n, amun yoli nyin kekle. Amu'an fa-man Anannganman amun Nyanmiɛn'n i nuan ndɛ'n su, amu'an lafi-mɛn i su.

²⁴ Kɛ n si amun lele'n, amun nian yaci-man nyin kekle yolɛ'n Anannganman su le.

²⁵ Kɛ Anannganman kannin amun nunnunlɛ ndɛ bɔ n tili'n, n tɔli i nyrun lɛ n utuli mín nyin ase. N kali lɛ kɔnguɛ nin wia nun cɛn ba ablanan.

²⁶ Nan m'an srɛ Anannganman m'an se kɛ: «Anannganman Nyanmiɛn, nán nunnun ɔ sran mun. Be ti ɔ liɛ, a kpɔli be ti afin a ti dan, ɔ tinmin bɔ be jrɛn i nyrun-ɔn ɔ yo-man ye'n ti, a fali be Ezipt lɔ bali.

²⁷ Man ɔ́ wla kpɛn ɔ sufuɛ Abraam, nin Izaak, ɔ nin Zakɔb bé su. Nán nian sran nga'm be nyin kekle, nin be aeliɛ tɛtɛ, ɔ nin be sa tɛ mun.

²⁸ Ɔ yo sɔ-ɔ, mɛn nga a fali e i nun lɔ bali'n, i nun lɔfuɛ'm be wa se kɛ: ‹Anannganman kwla fa-man be kɔ-man mɛn ng'ɔ kɛnnin i ndɛ kleli be'n nun lɔ. Kpɔlɛ yɛ ɔ kpɔ bé ti yɛ i waan ɔ ´fa be ´fite nan be ko wu aawlɛ flɛnnɛn'n nun lɔ-ɔ.›

²⁹ Be ti ɔ sran mun, be ti ɔ liɛ. A fali be Ezipt lɔ bali, sran fi ɔ'a jran-man wɔ.»