Mmla'n 8 - NYANMIƐN NDƐ'N 1998

Anannganman tuli Izraɛlfuɛ'm be fɔ aawlɛ flɛnnɛn'n nun lɔ

¹ Ndɛ nga n ´kan kle amun yɛ'n, amun `fa be kwlaa sie, amun `fa bé su nan amu'an ka nguan nun nan amu'an trɛ, nan amu'an ko fa mɛn nga Anannganman tali nda kɛ ɔ ´fa man amun nannan mun'n.

² Nán amún wla fi atin tɛnndɛn nga Anannganman amun Nyanmiɛn'n fali amun sinnin nun aawlɛ flɛnnɛn'n nun lɔ afuɛ ablanan'n. I waan ɔ ´gua amun nyin ase nan ɔ ´sa amun nian. I waan ɔ ´si amun klun lɔ akunndan mun. I waan ɔ ´nian sɛ amun ´fɛ i nuan ndɛ'n su o, annzɛ sɛ o.

³ Ɔ kannin amun ase, ɔ fali awe kleli amun nun. Kpɛkuun mani bɔ amun si-mɛn i laa'n, ɔ fa tali amun. Amun nannan'm b'a si-mɛn i bɔbɔ. I waan ɔ ´yo sɔ nan amu'an si kɛ nán aliɛ kunngba yɛ ɔ man sran nguan-an, nan ndɛ kwlaa ng'ɔ fin Anannganman'n nuan fite'n yɛ ɔ man sran nguan-an.

⁴ Amun tralɛ'm b'a titi-man amún wun le. Amún ja'm b'a wun-man amún bo afuɛ ablanan sɔ'n nun le.

⁵ Ɔ man sɛ Anannganman tu amun fɔ'n, man amun wun i wlɛ kɛ ɔ yo i kɛ sran su tu i wa fɔ sa.

⁶ Amun `fa Anannganman amun Nyanmiɛn'n i ndɛ'm be sie. Amun `fɛ i atin'n su, yɛ amún nyin `yi i.

Kɛ amun ´di ye'n, nán amún wla fi Anannganman

⁷ Mɛn nga Anannganman su fa amun kɔ nun lɛ'n, ɔ ti mɛn klanman. Nzue ba mun nin fɛtɛ'm be o lɔ, nzue ti'm be o lɔ be nyrɛn gua kongo'm be nun nin oka'm bé su.

⁸ Mɛn sɔ'n ti ble, nin ɔrz, nin vinyi, nin figie, nin grenadie, nin olivie, ɔ nin awɛma nzue mɛn.

⁹ Ɔ ti-man mɛn kun bɔ be ´sunnzun aliɛ'n yɛ be ´fa man amun lɔ-ɔ. Like fi su mian-man amun lɔ. Mɛn sɔ'n nun yɛbuɛ'm be nun ti blalɛ ngunmin, yɛ i oka'm bé nun ti aaba ngunmin.

¹⁰ Sɛ amun di like nan amun ku yi'n, amun `la Anannganman amun Nyanmiɛn'n i ase mɛn klanman sɔ'n b'ɔ mannin amun'n ti.

¹¹ Amun `nian amún wun kpa. Nán amún wla fi Anannganman amun Nyanmiɛn'n. Nán amun kpa i ndɛ nin i mmla fanunfanun nga n ´fa man amun ndɛ yɛ'n bé su falɛ'n su.

¹² Sɛ amun nyan like amun di nan amun ku yi'n, sɛ amun kplan sua kpakpa mun be la nun'n,

¹³ sɛ amun nannin mun, nin amun bua mun, nin amun boli'm be trɛ'n, sɛ amun nyan jɛtɛ ufue nin sika ɔkwlɛ kaka'n, sɛ amún sa nun ninnge'm be kwlaa be yo ye'n,

¹⁴ amun `nian amun wun, nán amun tu amún wun. Nán amún wla fi Anannganman amun Nyanmiɛn'n b'ɔ fali amun kanga nun Ezipt lɔ bali'n.

¹⁵ Ɔ fali amun sinnin aawlɛ flɛnnɛn dan sroesroe ɔ nin nun wuo bɔ be lɛ bɔyre kpa ɔ nin nyannglan'm be nun. Ɔ fali amun sinnin lika kee sɔ bɔ nzue nun-man nun'n i nun, sanngɛ ɔ yoli man nzue fin yɛbuɛ kekleke'n nun fiteli yɛ amun nɔnnin.

¹⁶ Mani bɔ amún si'm be si-mɛn i'n, ɔ fa tali amun. Amun Nyanmiɛn i waan ɔ ´gua amun nyin ase nan ɔ ´sa amun nian, yɛ i waan ɔ ´yo amun ye cɛn wie. Nán amún wla fi i su.

¹⁷ Nán amun si amun wue nun se kɛ: «E bɔbɔ e wunmiɛn nin é sa kekle yɛ man e kwla nyannin e wun-ɔn.»

¹⁸ Nán amún wla fi Anannganman amun Nyanmiɛn'n, afin i kunngba cɛ yɛ ɔ kwla man amun wunmiɛn kɛ amun `fa di junman nan amun `nyan like-ɔ. I waan ɔ ´yo i sɔ nan aenguɛ nga ɔ nin amun nannan mun be trali'n ɔ'a taka kɛ ɔ fa taka ndɛ yɛ'n sa.

¹⁹ Sɛ amún wla fi Anannganman amun Nyanmiɛn'n nan amun su amuɛn'm bé su amun sɔ be'n, nan amun koto bé bo'n, n ´kan kle amun ndɛkɛn weiin kpa kɛ amun ´wie wu.

²⁰ Sɛ amu'an ti-man Anannganman amun Nyanmiɛn'n i nuan ndɛ'n, amun ´wu kɛ nvle nga kɛ amun ´ba'n Anannganman yoli man be wuli'n sa.