Mmla'n 7 - NYANMIƐN NDƐ'N 1998

Nyanmiɛn kpali Izraɛl sieli i ngunmin

¹ Anannganman amun Nyanmiɛn'n ɔ ´fa amun wlu mɛn nga amun wa ko fa'n nun. Ɔ ´kankan nvle nga be o yɛ'n be bo amun nyrun: Ɛtfuɛ, Girgazfuɛ, Amɔrfuɛ, Kanaanfuɛ, Ferezfuɛ, Evfuɛ, yɛ Zɛbisfuɛ mun. Be sɔnnin tra amun, yɛ be lɛ wunmiɛn tra amun.

² Sɛ Anannganman amun Nyanmiɛn'n fa be man amun nan amun kwla be'n, amun `nunnun be mlɔnmlɔn. Nán amun nin be tra aenguɛ, nán amun si be aunnvuɛ.

³ Nán amun nin nvle sɔ nunfuɛ mun amun ja amun afiɛn bla. Nán amun fa amún wa bla man bé wa yasua kɛ ɔ jɛ i. Yɛ nán amun ja bé sa nun bla man amún wa yasua.

⁴ Sɛ amun yo sɔ'n, be ´cuɛn amun mma bla nin amun mma yasua mun, be ´fa be wlɛ i amuɛn sɔlɛ nun, kpɛkuun be ´kaci be sin si Anannganman. Yɛ sɛ ɔ yo sɔ kusu'n, Anannganman'n ´fa ya dan kpa amun wun, kpɛkuun ɔ ´nunnun amun ndɛndɛ kpa.

⁵ Ng'ɔ fata kɛ amun yo'n yɛ: amun `bubu be amuɛn sɔwlɛ mun, amun `bubu be yɛbuɛ nga be takali mun'n, ɔ nin be ninnge nga be sɔ be mun'n, yɛ amun `yra be amuɛn mun.

⁶ Afin amun ti nvle kun bɔ Anannganman amun Nyanmiɛn'n kpali amun sieli amun ngunmin. Ɔ kpali amun nvle nga be o asiɛ wunmuan'n su'n be kwlakwla be nun kɛ amun yo i liɛ klonglo.

Nán amun saci Anannganman i aenguɛ ng'ɔ nin amun trali'n

⁷ Nán kɛ amun sɔnnin tra nvle'm be kwlakwla ti yɛ Anannganman fali amun mɛntɛnnin i wun-ɔn. I kpa'n bɔ amun yɛ amun ti nvle'm be nun kaan nin-ɔn.

⁸ Sanngɛ kɛ Anannganman klo amun'n ti'n, yɛ aenguɛ ng'ɔ nin amun nannan'm be trali'n i su bɔ i waan ɔ ´nian'n ti, ɔ yili amun Ezipt lɔ fiteli. Kɛ ɔ ´yo sɔ'n, wuun amun wo kanga nun, i tinmin bɔ be jrɛn i nyrun ɔ yo-man ye'n ti, ɔ deli amun Ezipt famiɛn'n i sa nun.

⁹ I sɔ'n ti, amun `si kɛ Anannganman amun Nyanmiɛn'n yɛ ɔ ti Nyanmiɛn nin-ɔn. Nyanmiɛn sɔ'n ɔ ti nanwlɛfuɛ, ɔ nin sran mun tra aenguɛ. Sɛ be klo i nan be fɛ i mmla'm be su'n, i kusu ɔ nian aenguɛ ng'ɔ nin be trali'n su yɛ ɔ si be aunnvuɛ lele fa wlu be anunman'm be mma liɛ'm be nun lele ju be akpasua akpi su.

¹⁰ I kpɔfuɛ'm be kusu ɔ ka lɛ tu be fɔ, ɔ sisi-mɛn i bo, ɔ `yo man be wu. Sran ng'ɔ kpɔ i Anannganman'n, ɔ yaci cɛ-mɛn i, ɔ ka lɛ tu i fɔ.

¹¹ I sɔ'n ti, ndɛ nin mmla fanunfanun nga n ´fa man amun ndɛkɛn yɛ'n, amun `nian be su, yɛ amun `fa bé su.

¹² Sɛ amun fa amún su sie mmla sɔ'm bé bo nan amun nian be su, nan amun fa bé su'n, Anannganman kusu ɔ ´nian aenguɛ ng'ɔ nin amún si'm be trali'n su, yɛ ɔ ´yo amun ye, afin ɔ tali be nda.

¹³ Ɔ ´klo amun, ɔ ´yo amun ye, ɔ ´yo man amun ´nyan ninnge kpanngban. Ɔ ´man amun ba kpanngban yɛ amun ´trɛ, amun fie'm be su ninnge'm be ´yo ye, amun ´nyan ble, nin nzan, nin ngo kpanngban. Amun nannin mun, nin amun bua mun, nin amun boli mun be ´trɛ mɛn ng'ɔ tali amun nannan'm be nda kɛ ɔ ´fa man amun'n nun.

¹⁴ Ɔ ´man amun muae ´tra nvle'm be kwlakwla. Yasua ng'ɔ wu-man ba'n, annzɛ bla klun kpanfuɛ'n, annzɛ nnɛn nga be wu-man ba'n, be su wun-mɛn i sɔ amun mɛn'n nun.

¹⁵ Anannganman ´yo man tukpacɛ fi su nyan-man amun, yɛ ɔ ´yo man sa sroesroe nga be juli Eziptfuɛ'm bé su bɔ amun bɔbɔ amun wunnin be'n, be su nyan-man amun, amun kpɔfuɛ'm bé su yɛ be ´tɔ-ɔ.

¹⁶ Amun `nunnun nvle nga Anannganman amun Nyanmiɛn'n fa be man amun'n be kwlakwla. Nán amun si be aunnvuɛ. Nán amun sɔ be amuɛn'm be wie. Sɛ amun yo sɔ-ɔ, amuɛn sɔlɛ ɔ ´tra amun kɛ aya sa.

Anannganman i dunman nun nán an sro nvle sɔ nunfuɛ mun

¹⁷ Wienun-ɔn amun wa se kɛ: «?Nvle nga bɔ be nun sran'm be sɔnnin tra e yɛ nin-ɔn, e ´yo sɛ nan y'a de be lika'n bé sa nun?»

¹⁸ Nán amun sro be. Sa nga Anannganman amun Nyanmiɛn'n fa yoli Ezipt famiɛn'n nin Ezipt mɛn wunmuan'n, man amun wla kpɛn su.

¹⁹ Kɛ Anannganman amun Nyanmiɛn'n ɔ ´yi amun Ezipt lɔ fite'n, amun wunnin nyrɛnnɛn sa dandan ng'ɔ fa yili Eziptfuɛ'm be su'n, amun wunnin atrɛ ng'ɔ yili be mun nin abonuan sa ng'ɔ yoli be mun'n, amun wunnin kɛ sran fi ɔ'a kwla jrɛn-mɛn i nyrun. Sa kunngba sɔ'm be yɛ Anannganman amun Nyanmiɛn'n ɔ wa fa yo nvle nga amun sro be yɛ'n be kwlakwla-a.

²⁰ Amun kpɔfuɛ nga be ka lɛ bɔ be fia amun nyrun'n, ɔ ´fa abɔn dandan mun ´kle be nyrɛnnɛn lele be ´wie wu.

²¹ Nán srɛ kun amun bé wun, afin Anannganman amun Nyanmiɛn'n nin amun o nun. Ɔ ti Nyanmiɛn kun b'ɔ ti dan yɛ ɔ yo sro.

²² Anannganman amun Nyanmiɛn'n ɔ ´fuan nvle sɔ mun amun nyrun kanngankanngan. Amun su kwla bo-man be mɛn'n kpɛ kunngba sa. Ɔ yo sɔ-ɔ, bo nun nnɛn wlɛfuɛ'm be ´sɔn ngboko.

²³ Sanngɛ Anannganman amun Nyanmiɛn'n ɔ ´fa nvle sɔ mun ´wla amún sa nun. Be su wun-man bé wun yowlɛ srɛ b'ɔ ´kun be'n i dunman nun, lele san be ´wie nunnun mlɔnmlɔnmlɔn.

²⁴ Anannganman ´fa be famiɛn mun ´wla amún sa nun. Amun ´yo man be dunman ´mlin asiɛ'n su, be wie fi su jran-man amun nyrun, san amun ´nunnun be.

²⁵ Be amuɛn nga be yoli be mun'n, amun `yi be sin nun, amun `wɔ be nun. Nán amun nyin blo jɛtɛ ufue annzɛ sika ɔkwlɛ nga be o bé amuɛn sɔ'm be wun'n be su. Nán amun fa amuɛn sɔ mun sie amún wun. Sɛ amun yo sɔ-ɔ, ɔ cɛ-man nan amu'an sɔ be, afin be ti tete like Anannganman nyrun.

²⁶ Tete like b'ɔ nunnunlɛ yɛ ɔ nin i fata'n, nán amun fa sie amun sua'm be nun, sɛ ɔ yo sɔ-ɔ, be ´nunnun amun wie kɛ i sa. Amun `bu ninnge sɔ mun kɛ be ti fiɛn, nán amun bu be like mlɔnmlɔn, be nin nunnunlɛ yɛ ɔ fata-a.