Mmla'n 5 - NYANMIƐN NDƐ'N 1998

Mmla blu'm be nun flanlɛ

¹ Moiz flɛli Izraɛlfuɛ'm be kwlaa, nan ɔ'a se be kɛ: Izraɛlfuɛ mun, amun `tie mmla fanunfanun nga n ´kan be n ´kle amun ndɛ yɛ'n. Amun `suan be, yɛ amun `nian bé su `nanti.

² Anannganman e Nyanmiɛn'n ɔ nin e trali aenguɛ Orɛb lɔ.

³ Aenguɛ sɔ b'ɔ trali'n, nán é si'm be ngunmin yɛ ɔ nin be trali-ɔ, sanngɛ ɔ nin e nga e o wa yɛ'n bɔ kɛ e ´se yɛ'n é nyin tɛ o su'n, ɔ nin e kwlakwla yɛ ɔ trali-ɔ.

⁴ Oka'n su lɔ'n, Anannganman o sa, amun kusu amun wo sa, yɛ ɔ ijɔli sin'n i afiɛn lɔ kleli amun-ɔn.

⁵ Kɛ ɔ ´yo sɔ'n, wuun n jin Anannganman nin amun be afiɛn, yɛ n kan i nuan ndɛ'n n kle amun-ɔn. Afin kɛ amun wunnin sin'n, srɛ kunnin amun. Amun waan amun fu-man oka'n su lɔ. Anannganman seli amun kɛ:

⁶ «N ti Anannganman ɔ Nyanmiɛn'n. Min yɛ man a tuli Ezipt lɔ blɛ bɔ a tɛ o kanga nun nin-ɔn.

⁷ Nán su like uflɛ fi, san min kunngba cɛ.

⁸ Nán yo amuɛn fi nin like wie fi b'ɔ fa nglo lɔ like, annzɛ b'ɔ fa asiɛ'n su wa like, annzɛ b'ɔ fa nzue b'ɔ o asiɛ'n i bo lɔ nun like.

⁹ Nán koto bé bo, nán su be. Afin n ti Anannganman ɔ Nyanmiɛn yɛ n si kwla. Sɛ sran kun jaso min wun'n, n ´tu i fɔ, n ´tu i nin i mma'm be fɔ lele n fa wlu i anunman'm be mma liɛ'm be nun.

¹⁰ Sanngɛ sran nga be klo min'n, bɔ be fa min mmla'm bé su'n, n ´klo be lele n fa wlu be anunman'm be mma liɛ'm be nun lele fa ju be akpasua akpi su.

¹¹ Nán bo min Anannganman ɔ Nyanmiɛn'n min dunman'n ngbɛn, afin sran ng'ɔ bo min dunman ngbɛn'n, n su yaci-mɛn i lɛ, san n ´tu i fɔ.

¹² Man ɔ wla kpɛn wunmiɛn-delɛ-cɛn'n su, man ɔ yo min liɛ klonglo kɛ n kan kle wɔ'n sa.

¹³ Fa cɛn ba nsiɛn di junman. Junman kwlakwla nga a ko di'n, di i cɛn nsiɛn sɔ'n nun.

¹⁴ Sanngɛ cɛn ba'n i nso sufuɛ'n, ɔ ti min Anannganman ɔ Nyanmiɛn'n min wunmiɛn-delɛ-cɛn. Nán di junman fi cɛn sɔ'n nun. Sɛ wɔ o, sɛ ɔ́ wa yasua o, ɔ́ wa bla o, ɔ́ sa nun junman difuɛ yasua o, ɔ́ sa nun junman difuɛ bla o, ɔ nannin o, wɔ aflunmun o, ɔ nnɛn'm be kwlaa o, aofuɛ ng'ɔ tran wɔ awlo o, nán amun wie fi di junman cɛn sɔ'n nun mlɔnmlɔn. Man ɔ sa nun junman difuɛ, sɛ bla o, sɛ yasua o, be de wunmiɛn kɛ ɔ bɔbɔ sa.

¹⁵ Nán ɔ́ wla fi kɛ a yoli kanga Ezipt mɛn'n nun lɔ yɛ min Anannganman ɔ Nyanmiɛn'n n fali wɔ lɔ n bali-ɔ. Afin sran fi kwla jran-man min nyrun. I sɔ'n ti yɛ min Anannganman ɔ Nyanmiɛn'n n waan a de wunmiɛn wunmiɛn-delɛ-cɛn'n nun nin-ɔn.

¹⁶ Bu ɔ́ si nin ɔ́ nin be sran kɛ min Anannganman ɔ Nyanmiɛn'n n kan kleli wɔ'n sa, nan ɔ nguan nyanman'n ɔ'a yo tɛnndɛn nan ɔ wun ɔ'a jɔ wɔ fɔuun mɛn nga min Anannganman ɔ Nyanmiɛn'n fa man wɔ'n i nun'n ti.

¹⁷ Nán kun sran.

¹⁸ Nán kunndɛ bla ɔ́ yi bo, annzɛ bian ɔ́ wun bo.

¹⁹ Nán wua.

²⁰ Nán tɔn ɔ wiengu suɛn.

²¹ Nán man ɔ́ nyin blo ɔ wiengu i like wie su, i yi o, i sua o, i fie o, i sa nun junman difuɛ yasua o, i sa nun junman difuɛ bla o, i nannin o, i aflunmun o, nán man ɔ́ nyin blo wie fi su .»

²² Ndɛ nga Anannganman kan kleli amun kwlakwla oka'n su lɔ'n yɛ ɔ o lɛ-ɔ. Ɔ jrannin sin nin nyanmiɛn ble, ɔ nin aosin ble tuun nun yɛ ɔ kannin-ɔn. Ɔ'a kan-man uflɛ ɔ'a uka-man su. Kɛ ɔ ´kan'n, ɔ kɛnnin i kekle kpa. I sin ɔ klɛli i yɛbuɛ paplaapla nnyɔn su nan ɔ'a fa man min.

Moiz i Nyanmiɛn nin Izraɛlfuɛ'm be afiɛn jranlɛ

²³ Kɛ sin'n fali oka wunmuan'n, bɔ amun tili Anannganman i nɛn'n aosin tuun nun'n, kpɛkuun amun awlobo kpɛnngbɛn mun nin amun kpɛnngbɛn mun be ko toli min,

²⁴ be seli min kɛ: «Kɛ Anannganman e Nyanmiɛn'n i dan fa ti ju'n, ɔ'a fa kle ye, yɛ ɔ'a yi i wun nglo nyannyannyan ɔ'a kle ye. E tili i nɛn'n sin'n nun. Ndɛkɛn y'a wun kɛ kannzu Nyanmiɛn kwla ijɔ kle sran kpɛkuun sran sɔ'n ɔ wu-man.

²⁵ ?Sanngɛ e ´tran lɛ man sin dan nga ɔ di ye? Afin nga, sɛ e ka Anannganman e Nyanmiɛn'n i nɛn'n i tilɛ'n su'n, e ´wu yɛ ɔ o lɛ-ɔ.

²⁶ ?Sran onin bɔ cɛ yɛ ɔ'a ti Nyanmiɛn b'ɔ lafi-man'n i nɛn'n sin nun kɛ e sa bɔ ɔ'a wu-man-an?

²⁷ Nan i ti'n, wunnge Anannganman e Nyanmiɛn'n i wun lɔ, tie ndɛ ng'ɔ ´kan'n, nan i kwlaa ng'ɔ kan kle wɔ'n, kan kle ye. Sɛ e ti'n, e ´fa su.»

²⁸ Anannganman tili ndɛ nga amun kan kleli min'n nan ɔ'a se min kɛ: «N tili ndɛ nga Izraɛlfuɛ'm be kan kleli wɔ'n. Be ndɛ yo fɛ dan.

²⁹ Sɛ ɔ ti kɛ bé nyin yi min sa titi yɛ be fa mín nuan ndɛ'm be kwlaa su'n, wuun nga, be nin be osu nunfuɛ'm be ´nyan ye sa tititi.

³⁰ Kɔ ko se be kɛ be `sa be sin be tannin sua'm be nun.

³¹ Sanngɛ ɔ liɛ'n, tran mín wun wa, n ´kan ndɛ nin mmla fanunfanun nga a ko kle be'n n ´kle wɔ. Sɛ be ju mɛn nga m'an fa man be kɛ be fa'n i nun lɔ'n, man be nanti su.»

³² Moiz seli Izraɛlfuɛ'm be kɛ: «Amun `fa ndɛ nga Anannganman amun Nyanmiɛn'n fa mannin amun'n i su kpa. Nán amun yi i ase.

³³ Amun `fa atin nga Anannganman amun Nyanmiɛn'n kleli amun'n su seiin nan amu'an wu-man, nan amun wun ɔ'a jɔ amun fɔuun, nan amun nguan nyanman'n ɔ'a yo tɛnndɛn mɛn nga amun wa fa'n nun.»