Mmla'n 4 - NYANMIƐN NDƐ'N 1998

Nyanmiɛn i mmla'n su falɛ

¹ Siɛn'n, Izraɛlfuɛ mun, amun `tie mmla fanunfanun nga n fa kle amun'n, amun `fa be su. I liɛ, amun ´tran nguan nun, kpɛkuun mɛn nga Anannganman amun nannan'm be Nyanmiɛn'n fa mannin amun'n, amun ´ko fa.

² Ndɛ nga n fa sie amun nyrun'n, nán amun kpɛ wie gua nun, nán amun yi wie ase. Sanngɛ amun `nian Anannganman amun Nyanmiɛn'n i nuan ndɛ nga n fa sie amun nyrun'n su.

³ Like nga Anannganman yoli i Baal-Pɛɔr i ndɛ'n nun'n, amun bɔbɔ amun wunnin i. Ɔ kunnin sran nga be sɔli Baal-Pɛɔr'n mun .

⁴ Amun nga kusu bɔ amun fali bé wun mantannin Anannganman amun Nyanmiɛn'n, amun kwlakwla yɛ amun tɛ o nguan nun yɛ.

⁵ Amun si kɛ mmla fanunfanun nga Anannganman min Nyanmiɛn'n fa mannin min'n yɛ n kusu n fa kleli amun-ɔn. Sɛ amun ju mɛn nga amun ´kɔ i falɛ yɛ'n nun lɔ'n, amun `nian be su `fa nanti.

⁶ Sɛ amun fa bé su nan amun nian bé su fa nanti'n, sɛ nvle kun nga'm be nunfuɛ'm be ti mmla sɔ'm be nun ndɛ mun'n, be ´si kɛ amun ti ngwlɛlɛfuɛ nin akunndanfuɛ mun. Nga be ´se'n yɛlɛ kɛ: «Nvle dan nga i nunfuɛ'm be si ngwlɛlɛ o, be si sa o!»

⁷ ?Nvle nga be ti dandan bɔbɔ'n, be nun onin cɛ yɛ i amuɛn'm be mɛntɛn i dan kɛ Anannganman e Nyanmiɛn'n bɔ blɛ kwlaa nga e flɛ i'n ɔ mantan ye'n sa-a?

⁸ ?Nvle dan onin cɛ yɛ i mmla fanunfanun'm be kpa ti kɛ mmla nga n ´fa sie amun nyrun ndɛkɛn yɛ'n sa-a?

Nyanmiɛn i wun nglo ng'ɔ yili i Orɛb oka'n su lɔ'n

⁹ Sanngɛ amun `nian amún wun kpa cɛn kwlakwla kɛ ɔ ´yo nan amún wla ɔ'a fi-man sa nga amun bɔbɔ amun wunnin be'n ti. Nán man be fin amun akunndan nun fite le. Amun `fa kle amun mma mun nin amun anunman mun.

¹⁰ Nán amún wla fi cɛn nga amun jrannin Anannganman amun Nyanmiɛn'n i nyrun Orɛb lɔ'n i su. Ɔ seli min kɛ: «Flɛflɛ sran mun man be bla min wun wa. N ´kan ndɛ kle be nan be nyin ɔ'a yi min titi kɛ be o Kanaan asiɛ'n su wa'n. Be kusu ndɛ nga n kan'n, ɔ fata kɛ be fa kle be osu nunfuɛ mun.»

¹¹ Amun bali amun wa jrannin Orɛb oka'n i bo lɛ. Kɛ ɔ ´yo sɔ'n, wuun oka'n ti sin ngunmin, sin sɔ'n ɔ jaso lele ju nyanmiɛn su lɔ. Aosin tritri kpa nin nyanmiɛn ble tuun kpa be sin yia oka'n.

¹² Anannganman ijɔ kleli amun sin sɔ'n nun. Amun tili i ijɔlɛ'n, sanngɛ amu'an wun-mɛn i nyrun'n, i nɛn'n kunngba yɛ amun tili-ɔ .

¹³ Ɔ kannin aenguɛ nga ɔ nin amun trali'n i ndɛ kleli amun. I waan amun `nian su, nan amun `niɛn i mmla blu b'ɔ klɛli be yɛbuɛ paplaapla nnyɔn su'n be su `nanti.

¹⁴ I blɛ sɔ'n nun yɛ Anannganman waan n `kle amun mmla fanunfanun nga amun ju mɛn nga amun ´kɔ i falɛ lɛ'n nun lɔ'n amun ko nanti su mun-ɔn.

Sa nga Moiz fa sieli Izraɛlfuɛ'm be nyrun'n

¹⁵ Blɛ bɔ Anannganman jrannin sin'n nun ɔ ijɔ kleli amun Orɛb lɔ'n, amu'an wun-mɛn i nyrun'n. I sɔ'n ti kusu, amun `nian amún wun su.

¹⁶ Nán amun yo like wie b'ɔ ti like wie nzɔliɛ amun fa saci amún wun. Nán amun yo like b'ɔ ti amuɛn'm be nzɔliɛ. Nán amun yo like wie b'ɔ ti sran yasua annzɛ bla wie nzɔliɛ,

¹⁷ annzɛ nnɛn'm be nzɔliɛ, annzɛ anunman bɔ be tu be sin'n be nzɔliɛ,

¹⁸ annzɛ nnɛn nga be cuɛn bé wun ase'n be nzɔliɛ, annzɛ jue bɔ be o nzue nun'n be nzɔliɛ.

¹⁹ Amun `nian amún wun su. Sɛ amun man amun nyin su nian nglo lɔ nan amun wun wia'n nin anglo'n, ɔ nin nzraama mun, ɔ nin nyanmiɛn su lɔ ninnge wafa-wafa uflɛ mun'n, nán amun koto bé bo yɛ nán amun su be. Ninnge sɔ'm be ti asiɛ'n su nvle nga'm be kwlaa be liɛ. Anannganman amun Nyanmiɛn'n fa mannin be.

²⁰ Amun liɛ'n, Anannganman bɔbɔ ko fali amun nyrɛnnɛn dan nun Ezipt lɔ bali. I waan ɔ ´fa amun ´fa yo i nvle b'ɔ ti i liɛ klonglo kɛ amun fa ti ndɛ yɛ'n sa.

²¹ Amun dunman nun ti Anannganman fali ya mín wun. Ɔ tali nda kɛ n su kpɛ-man Zurdɛn nzue ba'n nan n su ju-man mɛn klanman bɔ ɔ'a fa man amun'n nun lɔ.

²² Ɔ man n ´wu mɛn nga nun wa, n su kpɛ-man Zurdɛn'n. Sanngɛ amun liɛ'n, amun ´kpɛ Zurdɛn'n amun ko fa mɛn klanman sɔ'n.

²³ I sɔ'n ti, amun `nian amún wun su kpa, nán amún wla fi aenguɛ nga Anannganman amun Nyanmiɛn'n nin amun trali'n su. Nán amun yo like wie b'ɔ ti kɛ like wie nzɔliɛ sa. Anannganman amun Nyanmiɛn'n ɔ tannin amun kɛ nán amun yo sɔ.

²⁴ Afin Anannganman amun Nyanmiɛn'n jue kɛ sin sa, ɔ yra, ɔ ti Nyanmiɛn kun b'ɔ si kwla .

²⁵ Kannzɛ amun cɛ mɛn nga nun wa bɔ amun ´wu ba mun, bɔ amun ´nyan anunman mun'n, sanngɛ nán amun yo like wie b'ɔ ´yo like wie nzɔliɛ b'ɔ ´saci amun-ɔn. Yɛ nán amun yo like fi bɔ Anannganman amun Nyanmiɛn'n ɔ klo-mɛn i b'ɔ fɔkɔ i anwlɛn.

²⁶ Sɛ amun yo i sɔ sa tɛ liɛ'n, amun ´wu ndɛndɛ kpa mɛn nga amun wa kpɛ Zurdɛn'n be ´kɔ i falɛ lɛ'n nun lɔ, n kan nyanmiɛn nin asiɛ'n. Amun su cɛ-man mɛn sɔ'n nun, amun ´nunnun treketreke.

²⁷ Anannganman ɔ ´yo man amun ´bo sanndi nvle kun nga'm be nun. Amun ´ka kaan sa mɛn nga Anannganman ´fa amun ´kɔ nun sɔ'n i nun lɔ.

²⁸ Kpɛkuun amun ´sɔ amuɛn bɔ sran yɛ ɔ yili be mun. Amuɛn sɔ'm be ti waka annzɛ yɛbuɛ bɔ be wun-man ase, be ti-man sa, be kwla di-man like, be bue ti-man nvan'n. Amun ´sɔ be mɛn sɔ'm be nun.

²⁹ Kpɛkuun amun wa kunndɛ kɛ amun ´mantan Anannganman amun Nyanmiɛn'n. Sɛ amun tu amun klun amun fa amun wun mɛntɛn i kpa'n, yɛ sɛ amun fa amun wla'n kwlaa guɛ i su'n, ɔ ´fɛ i wun ´kle amun.

³⁰ Kɛ sa nga n kannin be ndɛ'n be ´ju amún su, bɔ nyrɛnnɛn ´tɔ amun su'n, amun ´sa amun sin Anannganman amun Nyanmiɛn'n i sin. Amun ´fɛ i ndɛ'm bé su.

³¹ Afin Anannganman amun Nyanmiɛn'n ti Nyanmiɛn kun b'ɔ si aunnvuɛ dan kpa. Ɔ su yi-man amun ase le. Ɔ su nunnun-man amun le. I wla su fi-man aenguɛ ng'ɔ nin amun nannan mun be trali'n su, ɔ tali su nda.

Anannganman klo Izraɛlfuɛ mun

³² Amun `bu sa nga be juli lalafuɛ nun'n i sin nan b'a wu amun'n i akunndan. ?Kɛ ɔ fin cɛn bɔ Nyanmiɛn boli sran jrɛli i asiɛ'n su'n, yɛ kɛ ɔ fɛ i asiɛ'n i bue kun lele b'ɔ ´fa guɛ i bue kun ekun lɔ'n, sa dan kɛ nga sa ɔ'a ju le? ?B'a kɛn i sɔ ndɛ amu'an ti i le?

³³ ?Nvlefuɛ wie'm be o lɛ bɔ b'a ti Nyanmiɛn i nɛn'n sin afiɛn kɛ nga amun fa tili lɛ'n sa kpɛkuun b'a wu-man-an?

³⁴ ?Amuɛn onin yɛ ɔ'a ko de nvle kun nvle uflɛ sa nun kanga nun le-ɔ? Anannganman amun Nyanmiɛn'n ɔ ko fali amun Ezipt lɔ kanga nun bali. I sin nan ɔ'a ko yi amun ɔ'a fite'n, ɔ fali sa kekle mun yili Eziptfuɛ'm be su, ɔ nin be kunnin kunlɛ kpa, ɔ yili atrɛ mun, ɔ yoli abonuan sa mun nin sa sroesroe mun. Sa sɔ'm be yoli amun nyrun.

³⁵ I waan amun `wun i sɔ nan amun si kɛ i kunngba cɛ yɛ ɔ ti Nyanmiɛn nan be fa like fi sunnzun i-ɔ ɔ yo-man ye.

³⁶ Ɔ jrannin nyanmiɛn su lɔ ijɔ kleli amun, yɛ ɔ tikeli sa wie'm be su kleli amun. Asiɛ'n su wa kusu ɔ fɛli i sin dan'n kleli amun. Ɔ ijɔli sin sɔ'n nun amun tili.

³⁷ Ɔ kloli amun nannan mun, yɛ ɔ buli be osu nunfuɛ'm be akunndan sieli, i wunmiɛn b'ɔ lɛ i'n ti ɔ yili amun Ezipt lɔ fiteli.

³⁸ Ɔ fuannin nvle wie'm be nun sran mun, yɛ ɔ fali be mɛn'n mannin amun kɛ amun tran nun. Amun bɔbɔ amun nyinma ta sa sɔ mun kɛ e se yɛ'n. Nvle sɔ'm be dan tra amun liɛ yɛ be nunfuɛ'm be kekle tra amun.

³⁹ I sɔ'n ti, man amun wun i wlɛ ndɛkɛn, yɛ man ɔ tran amun akunndan nun titi kɛ Anannganman kunngba yɛ ɔ ti Nyanmiɛn nin-ɔn, man amun wun i wlɛ kɛ nyanmiɛn su lɔ o, asiɛ'n su wa o, like fi nin i sɛ-man.

⁴⁰ Ɔ man i mmla nin i ndɛ bɔ n ´fa man amun yɛ'n, amun `fa bé su. I liɛ'n, amun nin amun osu nunfuɛ nga be wa jaso su'n, amun ´nyan ye, yɛ amun nguan nyanman'n ɔ ´yo tɛnndɛn mɛn nga Anannganman amun Nyanmiɛn'n ɔ'a fa man amun mlɔnmlɔn'n i nun.

Zurdɛn i bue kun lɔ fiawlɛ klɔ mun

⁴¹ Yɛ Moiz kpali klɔ nsan sieli be ngunmin Zurdɛn'n i bue kun lɔ wia afiliɛ lɔ-ɔ.

⁴² I liɛ'n, sran nga sanvuɛsa nyɛn i nan ɔ kun sran'n, b'ɔ nán i nyinfu'n, ɔ `wanndi wɔ klɔ sɔ'm be nun kun su nan ɔ `nyɛn i ti.

⁴³ Klɔ sɔ mun'n, kun yɛlɛ Bɛzɛr b'ɔ o aawlɛ flɛnnɛn'n nun lɔ lika kpɛtɛkplɛɛ nun'n, ɔ o Ribɛnfuɛ'm be lika'n nun. Kun ekun yɛlɛ Galaad klɔ nga be flɛ i Ramɔt'n, ɔ o Gadfuɛ'm be lika'n nun. Yɛ kun ekun yɛlɛ Bazan klɔ nga be flɛ i Golan'n, ɔ o Manasefuɛ'm be lika'n nun.

MOIZ I NDƐ'N NNYƆN SU'N B'Ɔ KANNIN'N

⁴⁴ Moiz fali mmla'n sieli i Izraɛlfuɛ'm be nyrun.

⁴⁵ Mmla'n nin atin klelɛ mmla mun, ɔ nin sa'm be nuan su yolɛ mmla mun, Moiz fa be sieli Izraɛlfuɛ'm be nyrun kɛ be fin Ezipt lɔ bali'n.

⁴⁶ Kɛ ɔ ´fa sie be nyrun sɔ'n, wuun be o Zurdɛn'n i bue kun ng'ɔ o Baal-Pɛɔr i nyrun ndɛnman lɛ'n i su. Lika sɔ'n wo Amɔrfuɛ'm be famiɛn nga be flɛ i Siɔn b'ɔ tran Ɛsbɔn'n i mɛn'n nun. Kɛ Moiz nin Izraɛlfuɛ'm be fin Ezipt lɔ bali'n, be kwlali famiɛn sɔ'n.

⁴⁷ Be fɛli i lika'n. Be fali Ɔg b'ɔ ti Bazan'n i famiɛn'n i lika liɛ'n kusu wie. Amɔrfuɛ'm be famiɛn nnyɔn sɔ'm be o Zurdɛn'n sin lɔ wia afiliɛ lɔ lika'n nun laa.

⁴⁸ Izraɛlfuɛ'm be fali lika ng'ɔ fɛ i Arɔɛr b'ɔ o Arnɔn nzue ba'n i nuan lɔ'n lele fa juli Siɔn oka bɔ be flɛ i Ɛrmɔn'n i wun lɔ.

⁴⁹ Lika sɔ'n, ɔ fɛ i Zurdɛn'n sin lɔ lika kpɛtɛkplɛɛ b'ɔ o wia afiliɛ bue liɛ su lɔ'n lele ɔ fa ju jenvie b'ɔ ti njin nzue klakla'n wun lɔ, ɔ ju Pisga oka'n i bo.