Mmla'n 34 - NYANMIƐN NDƐ'N 1998

Moiz i wulɛ ndɛ

¹ Moiz fɛli i Moab lika kpɛtɛkplɛɛ'n nun lɛ ɔ fuli Nɛbo oka'n su. Oka sɔ'n i kpɔlɛ bɔ be flɛ i Pisga b'ɔ o Zeriko i ndɛnman su'n i li su yɛ ɔ fuli-ɔ. Anannganman fali mɛn'n b'ɔ o lɛ'n i wunmuan kleli i. Lika ng'ɔ fa be kleli i mun be yɛ: lika ng'ɔ fɛ i Galaad b'ɔ fa kpɛn Dan'n,

² Nɛftali lika wunmuan'n, ɔ nin Efraim nin Manase be lika'n, ɔ nin Zida lika b'ɔ fɛ i lele fa ju Mediterane jenvie'n wun lɔ'n,

³ ɔ nin mɛn i ngua lɔ lika'n, ɔ nin Zeriko asa'n b'ɔ o Zurdɛn'n i kongo'n nun lɔ'n lele fa ju Zɔar'n. Zeriko i dunman kun ekun yɛlɛ Mme Klɔ.

⁴ Anannganman seli i kɛ: «Mɛn nga n tali Abraam, nin Izaak, ɔ nin Zakɔb be nda kɛ n ´fa man be osu nunfuɛ mun'n yɛ ɔ o lɛ-ɔ. M'an fa kle wɔ, sanngɛ a su ju-man lɔ.»

⁵ Anannganman i sufuɛ Moiz wuli Moab mɛn'n nun lɛ kɛ Anannganman fa kannin'n sa.

⁶ Nan Anannganman ɔ'a sie i Moab lɔ kongo'n kun nun Bɛt-Pɛɔr ndɛnman lɛ. Sran fi ɔ'a wun-mɛn i asieliɛ'n lele ndɛ.

⁷ Moiz dili afuɛ ya afuɛ ablaɔn yɛ ɔ wuli-ɔ. Kɛ ɔ ´wu sɔ'n, wuun ɔ tɛ wun ase kpa. I wunmiɛn ɔ'a kpɛ-man su le.

⁸ Izraɛlfuɛ'm be sunnin Moiz cɛn ba ablasan Moab lika kpɛtɛkplɛɛ'n nun lɔ, i sin yɛ i sɛ'n wieli-ɔ.

⁹ Ngwlɛlɛ wawɛ'n ɔ trannin Nɛn i wa Zozie i nun afin Moiz fɛli i sa'n fuɛli i su. Ɔ man Izraɛlfuɛ'm bé nyin yili i. Be niannin ndɛ nga Anannganman kan kleli Moiz'n su be yoli.

¹⁰ Kɛ ɔ fɛ i lɛ'n, Nyanmiɛn nuan ijɔfuɛ bɔ Anannganman jran sa ɔ nin i koko yalɛ kɛ Moiz liɛ'n sa'n, b'a wun-mɛn i sɔ Izraɛl mɛn'n nun kun.

¹¹ Abonuan sa mun nin atrɛ nga Anannganman sunmɛnnin i kɛ ɔ ko yo be Ezipt mɛn'n nun lɔ'n be yoli dan. Ɔ yoli be Ezipt famiɛn'n, nin i mantanfuɛ mun, ɔ nin sran'm be kwlaa be nyrun.

¹² Moiz yili i tinmin i nglo Izraɛlfuɛ'm be kwlaa be nyrun.