Mmla'n 33 - NYANMIƐN NDƐ'N 1998

Moiz boli muae mannin Izraɛlfuɛ mun

¹ Muae nga Moiz b'ɔ ti Nyanmiɛn i sufuɛ'n ɔ bo mannin Izraɛlfuɛ mun ka nan ɔ'a wu'n yɛ. I waan:

² «Anannganman fin Sinai oka'n su lɔ bali. Ɔ fin Seir lɔ jasoli kɛ wia'n sa. Kɛ ɔ o Paran oka'n su lɔ'n, ɔ kpaja weiin i sran'm be su. Kɛ ɔ ´fin lɔ ´ba'n, ɔ nin anz kpanngban yɛ be bali-ɔ. Mmla b'ɔ fa blɛ be'n ɔ jue kɛ sin sa, ɔ o i sa fama nun.

³ Anannganman klo Izraɛl akpasua-akpasua be sufuɛ mun. Ɔ sasa be bɔ be ti i liɛ mlɔnmlɔn'n, ɔ sasa be bɔ be trɛn i bo lɛ kɛ be ´ti i ndɛ'n.

⁴ Mmla nga Moiz fa mannin ye'n, ɔ ti Zakɔb i osu nunfuɛ'm be aja like.

⁵ I nun bɔ Izraɛl kpɛnngbɛn'm be yiali'n, bɔ Izraɛl akpasua-akpasua be sufuɛ'm be yiali'n, yɛ ɔ yoli Izraɛl'n i famiɛn nin-ɔn.

⁶ Moiz kan guali su ekun kɛ: «Man Ribɛn akpasua'n ɔ ka nguan nun. Kannzɛ bɔ i nun sran'm b'a sɔn-man'n, sanngɛ nán man be nunnun.»

⁷ Ɔ kan mannin Zida akpasua liɛ'n kɛ: «Anannganman, tie flɛlɛ bɔ Zida kpan flɛ wɔ'n. Yo man ɔ nin i niaan'm be siesie be afiɛn. B'a fa anwlɛn be su kpli be ti. Sɛ be kpɔfuɛ'm be fa alɛ wla be sin'n, uka be.»

⁸ Ɔ kan mannin Levi akpasua liɛ'n kɛ: «Anannganman a fali ɔ ninnge nga be fa si ɔ klun sa'n a wlali Levi osu nunfuɛ'm bé sa nun. A dun mmua sali be Masa lɔ niannin. A dun mmua buli be fɔ Mɛriba nzue'n nuan lɔ .

⁹ Be si mun nin be nin mun, nin be niaan mun, ɔ nin be mma mun'n, be ndɛ ɔ'a yo-man be cinnjin kɛ ɔ sa. Kɛ bɔ a ti cinnjin bé sa nun'n ti be trali ɔ ndɛ'n nun kpa. Be niannin aenguɛ nga a nin be trali'n su be nantili.

¹⁰ Be yɛ be fa ɔ mmla'n nun ndɛ mun be kle Izraɛlfuɛ mun-ɔn. Ansans b'ɔ bɔn ɔ bue nun fanninfannin'n, be yɛ be fa sie ɔ nyrun nin-ɔn. Be yɛ be yi tɛ bɔ be yra be nnɛn'n kɔlikɔli'n ɔ sɔwlɛ'n su nin-ɔn.

¹¹ Anannganman, nán man be fanngan'n i su kpɛ le. Junman kwlaa nga be fa be sa wla nun'n, man ɔ yo ye. Nán man be nga be jaso bé wun'n be nyan jranwlɛ be nyrun. Sɛ be kpɔfuɛ'm be tɔ'n, nán be kwla bé wun su man kun.»

¹² Ɔ kan mannin Bɛnzamɛn akpasua liɛ'n kɛ: «Bɛnzamɛn ti Anannganman i klofuɛ kpa. Ɔ o Anannganman sa nun, sran fi kwla yo-mɛn i sa. Anannganman niɛn i su titi, ɔ nin i yɛ be tran-an.»

¹³ Ɔ kan mannin Zozɛf akpasua liɛ'n kɛ: «Anannganman yo man Zozɛf i asiɛ'n yo like ye. Bɔlɛ su yaci-man su gualɛ le. Asiɛ'n i bo lɔ nzue'n kusu lualua lika'n.

¹⁴ Wia'n ɔ bo su klanman man fie su ninnge'm be yo ye. Anglo kwlaa i fie'm be ti kpa, waka'm be su.

¹⁵ I lika'n nun oka mun nin kpɔlɛ'm be dunman nun ti i asiɛ'n ɔ yo kpa titi.

¹⁶ Man i asiɛ'n i nun ninnge'm be yo kpa lele tra su. Zozɛf b'ɔ ti i niaan'm be su kpɛn'n, man Nyanmiɛn b'ɔ yili i wun nglo susrɛ nun'n, ɔ yo man ɔ nyan ye.

¹⁷ Zozɛf ti kpinndin-kpinndin kɛ nannin tola wie sa. Ɔ lɛ wunmiɛn kɛ awuɛ sa. I wɛ nnyɔn'n yɛ ɔ fa bo nvle mun-ɔn. Ɔ bo be kwlaa lele fa kpɛn mɛn'n i awieliɛ lɔ. I wɛ sɔ'n, kun yɛlɛ Efraim i akpasua su sran kpanngban mun. Kun kusu yɛlɛ Manase i osu nun sran kaka mun.»

¹⁸ Ɔ kan mannin Zabilɔn akpasua liɛ'n kɛ: «Zabilɔn, alɛ kwlaa nga a kun'n man a kwla wɔ kpɔfuɛ mun, nan ɔ klun `jɔ. Isakar kusu, tran ɔ tannin sua'n nun, man ɔ́ wun jɔ wɔ fɔuun.

¹⁹ Amun ´flɛ nvle mun oka'n su. Amun ´nian tɛ yilɛ mmla'n su amun ´yi tɛ. Jenvie'n nun yɛ amun anyanbeun ninnge'm be wa fite-ɔ. Ninnge kpakpa nga amun ´nyan be'n, be fia aunnyan'n nun.»

²⁰ Ɔ kan mannin Gad akpasua liɛ'n kɛ: «Be `la Anannganman b'ɔ mannin Gad i lika tɛtrɛ'n i ase. Gad ti kɛ asɔmɔli bɔ ɔ'a la'n sa. Ɔ nyan nnɛn'n, ɔ ´biɛ i ja ngua wa lele kpɛn i ti lɔ.

²¹ Lika ng'ɔ nyɛnnin i'n, i kpafuɛ'n yɛ ɔ fali-ɔ. Ɔ fali lika ng'ɔ ti bɔ siefuɛ yɛ ɔ `fa'n. Kpɛkuun ɔ dunnin mmua i niaan'm be nyrun. Ɔ yoli sa kpa Anannganman nyrun, ɔ yoli like nga Anannganman kan kleli Izraɛl kɛ ɔ yo'n.»

²² Ɔ kan mannin Dan akpasua liɛ'n kɛ: «Dan ti kɛ asɔmɔli bɔ ɔ'a kpɛ cro'n sa. Kɛ ɔ ´fin Bazan lɔ fite'n, ɔ tu kpɛn.»

²³ Ɔ kan mannin Nɛftali akpasua liɛ'n kɛ: «Anannganman yoli Nɛftali i ye lele bobo su. Ɔ yoli i kpa tra su. Man i lika'n ɔ trɛ lele ju wia atɔliɛ lɔ nin mɛn'n i ngua lɔ lika'n nun.»

²⁴ Ɔ kan mannin Azɛr akpasua liɛ'n kɛ: «Zakɔb i mma'm be nun'n, man Azɛr nyan muae. Man i niaan'm be klo i. Man i olivie ngo'n ɔ sɔn lele nan ɔ nanti nun.

²⁵ Man i klɔ'm be anuan'm be yo blalɛ nin aaba anuan, nan ɔ tran bé sin lɔ fɔun. Ɔ nguan wunmuan'n nun'n, nán man ɔ wunmiɛn'n i su kpɛ.»

²⁶ Moiz kan guali su kɛ: «Izraɛl , like fi nin ɔ Nyanmiɛn'n be sɛ-man. Ɔ fa nyanmiɛn ble'n yo i nnɛn kpanngɔ, kpɛkuun ɔ fu su, ɔ ba ɔ ukalɛ. Ɔ ba kɛ famiɛn sa.

²⁷ Kɛ ɔ fin lalafuɛ nun lele'n, Nyanmiɛn yɛ ɔ ti ɔ fiawlɛ nin-ɔn. I fanngan b'ɔ o lɛ titi'n ti, ɔ sasa wɔ. Ɔ fuan ɔ kpɔfuɛ mun ɔ nyrun. Ɔ se wɔ kɛ: ‹Nunnun be.›

²⁸ Izraɛlfuɛ'm be o be olɛ lɛ bɔ cɛ, sa nyan-man be. Zakɔb i osu nunfuɛ'm be o be liɛ ngunmin. Mɛn nga be o nun'n, ble nin vinyi'n be yo ye lɔ kpa, afin bɔlɛ'n ɔ gua su tititi.

²⁹ Izraɛlfuɛ mun amun liɛ su ti ye. ?Wan yɛ ɔ nin amun sɛ-ɔ? Amun ngunmin yɛ Anannganman deli amun-ɔn. Ɔ ti kɛ amun nyrɛn sa. Ɔ ti kɛ amun tokofi sa bɔ man amun nyan kwlalɛ-ɔ. Sɛ amun kpɔfuɛ'm be ba amun yaci selɛ'n, amun wa tia be amuɛn sɔwlɛ'm be su.»