Mmla'n 32 - NYANMIƐN NDƐ'N 1998

¹ Nyanmiɛn su lɔ lika mun, amun `sie amún su amun `tie ndɛ bɔ n su wa kan'n. Asiɛ, ɔ kusu tie mín nuan ndɛ'n.

² Man like nga n kle sran mun'n, ɔ yo kɛ nzue yɛ ɔ su tɔ sa. Man min ndɛ nga n kan be mun'n, be yo kɛ nglɛmun bɔlɛ'n b'ɔ gua'n sa. Man be yo kɛ nzue b'ɔ gua nnya'm be su'n sa. Man be yo kɛ nzue b'ɔ gua ijre'm be su'n sa.

³ N wa yi Anannganman i dunman'n nglo. Amun `manman e Nyanmiɛn'n.

⁴ I yɛ ɔ ti kɛ yɛbuɛ sa i yɛ n talo i-ɔ, sa ng'ɔ yo be'n be ti kpa lele tra su. I atin'm be ti seiin. Ɔ ti Nyanmiɛn kun b'ɔ kaci-man, ɔ di-man ndɛ kwlɛ. Ɔ yo sa'n i nuan su sɛsɛsɛ, ɔ di nanwlɛ.

⁵ Sɛ b'a saci'n, ɔ fin-mɛn i, ɔ fin be lika. Be ti nvle kun bɔ be ti tɛ lele tra su, gblɛ'n ɔ'a yi be piɛ.

⁶ ?Amun waan amun fa amun sa tɛ sɔ'n guɛ i Anannganman su? Amun lɛ-man akunndan. ?Nzu sran yɛ be sinnzin'n cɛnnin sɔ-ɔ? ?Ɔ ti-man amun si? ?Nán i yɛ ɔ jrali amun-ɔn? ?Nɛ́n i yɛ ɔ fali amun fa yoli i nvle nin-ɔn?

⁷ Man amún wla kpɛn sa ng'ɔ juli laa'n bé su. Amun `bu lalafuɛ blɛ'n i akunndan. Amun `usa amún si mun man be koko lalafuɛ nun sa mun kle amun. Amun `usa kpɛnngbɛn mun man be kan wie kle amun.

⁸ Kɛ Nyanmiɛn b'ɔ o like kwlakwla ti su'n ɔ cɛcɛli asiɛ'n nun mannin nvle-nvle mun'n, ɔ klekleli be awɛ mun tɔuun . Ɔ niannin Izraɛlfuɛ'm be nuan'n su yɛ ɔ fa cɛcɛli be-ɔ.

⁹ Anannganman i like liɛ ng'ɔ nyɛnnin i'n yɛlɛ Izraɛlfuɛ mun. Ɔ fali Zakɔb i osu nunfuɛ mun yoli i bɔbɔ liɛ.

¹⁰ Aawlɛ flɛnnɛn'n nun lɔ yɛ ɔ ko fiteli Izraɛl'n i su-ɔ, lika sɔ'n nun lɔ'n, nnɛn mun yɛ be ti be kpanlɛ-ɔ. Ɔ ko fali Izraɛl, ɔ niɛnnin i lika, ɔ sɛsɛli i. Ɔ niɛnnin i su kpa kɛ be fa nian be nyinma ba'n su sa.

¹¹ Kɛ anunman nyin'n fa tu sin i sua'n su, b'ɔ kle i mma'm be tulɛ'n, kɛ ɔ tinngɛ i ndɛwa'n nun b'ɔ fa be sie su'n, i kunngba'n yɛ Anannganman fa yoli Izraɛl-ɔ .

¹² Anannganman kunngba yɛ ɔ dunnin mmua i nyrun-ɔn, amuɛn fi ɔ'a ukɛ-mɛn i.

¹³ Ɔ man ɔ trannin lika kpɔlɛkpɔlɛ'm be su ɔ man ɔ dili fie'm bé su aliɛ'n, ɔ man ɔ nɔnnin yɛbuɛ'm be nun awɛma nzue'n, ɔ man ɔ nyannin ngo dili. Ngo sɔ'n, ɔ fin kpangba'm be nun.

¹⁴ Ɔ nɔnnin nannin mun nin bua'm be nyɔnflɛn nzue'n. Ɔ dili bua nga b'a kpɛ cro nin Bazan lɔ bua nene mun, ɔ nin boli nga be ti lowa kpa'n be nnɛn'n. Ɔ dili ble'n i kpafuɛ'n. Ɔ nɔnnin vinyi mma'n i nzue'n b'ɔ yɛlɛ nzan'n.

¹⁵ Kɛ Izraɛl dili i sɔ like'n, bɔ i ku'n yili'n, b'a sɔn-mɛn i su kun. Kɛ ɔ wa cɛnnin b'ɔ yoli mlanmlan'n, kpɛkuun i Nyanmiɛn i ase yilɛ nun-ɔn, kusu wuun Nyanmiɛn yɛ ɔ yili i-ɔ. Ɔ yoli Nyanmiɛn i finfin, kusu wuun i yɛ ɔ sɛsɛ i-ɔ.

¹⁶ Izraɛlfuɛ'm be fali nvle wie'm be nun amuɛn mun fɔkɔli i anwlɛn, be yoli tete sa mun ɔ man ya kunnin i.

¹⁷ Mmusu bɔ nán Nyanmiɛn yɛlɛ be'n, yɛ be sɔ be-ɔ. Amuɛn uflɛ nga b'a ju su bɔ bé si'm b'a si-man be laa'n, bɔ be bɔbɔ kusu be si-man be'n, yɛ be sɔ be-ɔ .

¹⁸ «Izraɛl, ɔ́ wla fili ɔ sasafuɛ bɔ i yɛ ɔ wuli wɔ'n. Ɔ wla fili Nyanmiɛn bɔ i yɛ ɔ mannin ɔ nguan'n.»

¹⁹ Kɛ Anannganman wunnin kɛ i wa yasua mun, nin i wa bla sɔ'm be fɔkɔ i anwlɛn'n, kpɛkuun bé wun ɔ yoli i tɛ.

²⁰ Yɛ i waan: «N ´kaci n sin si be, yɛ n wa nian sa ng'ɔ wa ju be su'n. Be nyin yi-man min.

²¹ Kɛ bɔ be fali like ngbɛn-ngbɛn nga be ti-man Nyanmiɛn'n be fa fɔkɔli min anwlɛn b'ɔ man ya kunnin min'n ti'n, n kusu n ´yo man be nyin ´ci nvle kun b'ɔ ti-man nvle kpa'n, yɛ n ´yo man nvle bɔ i nunfuɛ'm be si-man ngwlɛlɛ'n be ´fita be anwlɛn su.

²² Min ya'n ɔ'a jue kɛ sin sa. Ɔ yra like mun lele ɔ kpɛn blɔlɔ lɔ. Ɔ yra asiɛ'n nin aliɛ b'ɔ fin nun fite'n. Ɔ yra lele kpɛn oka'm be takawlɛ'n i bo lɔ.

²³ N ´fa sa yalɛ sunman n ´yi bé su. N ´wie min ta mma'n kwlakwla bé wun to.

²⁴ Awe'n ɔ ´kpɛn bé su, be ´glɔ, jɛkuajo nin tukpacɛ tɛtɛ'm be ´yo be. Kpɛkuun n ´yo man nnɛn wlɛfuɛ wie'm be wlu be nun, yɛ wuo nga be lɛ bɔyre'm be ´ka be.

²⁵ Be ´fa tokofi be ´kun sran mun klɔ nun atin'm be nun. Sran nga be o awlo'm be nun'n, be kusu, srɛ'n ɔ ´kun be kpo. Wie'n su yaci-man sran fi lɛ, i gbanflɛn mun o, i talua mun o, i ba nɔnman mun o, i oke mun o, ɔ ´wlu be kwlakwla be nun.

²⁶ N waan wuun n ´nunnun be mlɔnmlɔn nan be dunman'n mlin mɛn'n nun.

²⁷ Like ng'ɔ jrannin min'n, yɛlɛ be kpɔfuɛ'm be finfin bɔ be yo min'n. Be kwla-man be kpɔfuɛ mun. Kɛ ɔ wa yo lɛ'n, kpɛkuun be kpɔfuɛ sɔ mun be ´si be wue nun be ´se kɛ: ‹Anannganman ɔ'a yo-man like fi, e bɔbɔ yɛ e kwlali be-ɔ.›

²⁸ Izraɛlfuɛ'm be di ngwlɛlɛ'n i yalɛ, be lɛ-man akunndan fi.

²⁹ Sɛ ɔ ti kɛ be si ngwlɛlɛ'n, wuun be ´fa sunnzun ase be ´wun sa ng'ɔ wa ju'n.

³⁰ ?Sran kunngba cenje kwla fuan sran akpi? ?Sran nnyɔn cɛ be kwla fuan sran akpi blu? N ´tɛ su kɛ: Ɛɛn! Sɛ min Anannganman bɔ n ti kɛ yɛbuɛ sa bɔ be talo min'n, sɛ n fa be n wla be kpɔfuɛ'm be sa nun'n, be kwla yo be sɔ.

³¹ Afin be kpɔfuɛ'm be bɔbɔ be si kɛ be sasafuɛ'n nin be liɛ'n be ti-man kun.

³² Be sran bɔ be fali be'n yɛlɛ Sodɔmfuɛ mun nin Gomɔrfuɛ mun. Be ti kɛ vinyi bɔ i mma'm be yo wi, bɔ duwlɛ o nun'n sa.

³³ Be nzan'n ɔ ti kɛ wuo bɔyre sa, ɔ ti kɛ poponde bɔyre sa.

³⁴ Sa nga m'an gugu kɛ n ´fa yo be'n, m bɔbɔ min kunngba yɛ n si-ɔ.

³⁵ Cɛn nga be nunnunlɛ blɛ'n ko ju'n, m bɔbɔ n ´tu n klunngbɔ'n, yɛ n ´tua be kalɛ. Sa yalɛ blɛ sɔ'n nun-man mmua kun. Be tɔlɛ blɛ'n ɔ'a mantan koko.»

³⁶ Anannganman wa jrɛn i nvle'n i sin. Ɔ wa si i sran'm be aunnvuɛ. Afin ɔ wun i kɛ be lɛ-man fanngan kun, yɛ be lɛ-man sran b'ɔ ´jran be sin-ɔn.

³⁷ Ɔ ´usa be kɛ: «?Amun amuɛn bɔ be sasa amun'n, be o ninfan siɛn'n?

³⁸ Amuɛn sɔ mun'n, be yɛ amun yi tɛ man be nin-ɔn, be yɛ amun gua nzan man be nin-ɔn. ?Be o nin? Be `jaso nan be `de amun e! Be `jaso nan be `sasa amun e!

³⁹ Siɛn'n, amun `nian, m bɔbɔ min kunngba cɛ yɛ n de sran-an ɔ yo ye-ɔ. Like wie fi nun-man lɛ, san min. M bɔbɔ min yɛ n yo man sran wu-ɔ. M bɔbɔ min yɛ n yo man sran nyan nguan-an. M bɔbɔ min yɛ n yo man sa yalɛ nyan sran-an. Min bɔbɔ min yɛ n yo man ɔ jaso i su-ɔ. Sran fi kwla de-man sran kun mín sa nun.

⁴⁰ M man mín sa'n su nglo yɛ n se kɛ: N wo nguan nun tititi.

⁴¹ N wa si min kue'n, n ´fa tu min kpɔfuɛ'm be fɔ. N wa tu min klunngbɔ bé su, like nga be yoli min'n, n wa yi m ´man be.

⁴² Min tokofi'n ɔ wa di nnɛn. Min cua'm be ´nɔn mmoja'n lele ɔ ´bo be kɛ nzan sa. Be bɔ m boli be kannin'n, be bɔ n trali be lomuɛn'n, ɔ nin kpɛnngbɛn bɔ n ´kpɛ bé ti'n, be mmoja'n yɛ be ´nɔn i sɔ-ɔ.

⁴³ Nvle-nvle mun, amun `bo ndɛ man Anannganman i nvle'n. Anannganman su tu i sufuɛ nga be kunnin be'n bé klunngbɔ'n. Ɔ su tu i kpɔfuɛ'm be fɔ. Ɔ'a yaci i mɛn'n i nunfuɛ'm bé wun sa'n ɔ'a cɛ be.»

⁴⁴ Moiz nin Nɛn i wa Zozie be wa toli Izraɛlfuɛ mun, nan b'a kanngan jue sɔ'n i nun ndɛ mun b'a kle be.

⁴⁵ Kɛ Moiz kannin Anannganman i nuan ndɛ'n i kwlaa kleli Izraɛlfuɛ mun wieli'n,

⁴⁶ ɔ seli be kɛ: «Ndɛ nga m'an kɛn i ndɛ yɛ'n, man ɔ yo amun cinnjin. Amun `kan kle amun osu nunfuɛ mun. Man be nian mmla nga su be nanti.

⁴⁷ Nán ndɛ sɔ'n yo amun nyrun ndɛ finfin, afin i yɛ ɔ´yo man amun ´nyan nguan-an, i yɛ ɔ ´yo man amun ´cɛ mɛn nga amun wa kpɛ Zurdɛn'n amun ´ko fa'n i nun lɔ-ɔ.»

Moiz i wulɛ i su bolɛ ndɛ

⁴⁸ Cɛn kunngba sɔ nun'n, Anannganman seli Moiz kɛ:

⁴⁹ «Fu Abarim'm be oka nga be flɛ i Nɛbo'n, b'ɔ o Moabfuɛ'm be mɛn'n nun Zeriko ndɛnman'n i su. Fu su nan nian Kanaan mɛn'n bɔ m'an fa man Izraɛlfuɛ mun kɛ be fa yo be liɛ'n.

⁵⁰ Kɛ a ko fu oka sɔ'n su'n, a wa wu a ´ko to wɔ nannan'm be lɔ kɛ ɔ niaan bian Aarɔn fa wuli Ɔr oka'n su lɔ'n bɔ kɔ toli i nannan'm be lɔ'n sa.

⁵¹ Amun yoli nyin kekle mín su Izraɛlfuɛ'm be nyrun Kadɛs lɔ Mɛriba nzue'n wun lɛ Zin aawlɛ flɛnnɛn'n nun lɔ. Amun yoli man m'an yi-man min wun m'an kle-man Izraɛlfuɛ'm be kɛ min nzuɛn nin klɔ sran liɛ'n ti-man kun. I sɔ'n ti,

⁵² ɔ nyinma'n ɔ ´gua mɛn sɔ'n i wun, sanngɛ ɔ́ ja su tia-man mɛn sɔ bɔ n ´fa man Izraɛlfuɛ mun'n i nun lɔ.»