Mmla'n 31 - NYANMIƐN NDƐ'N 1998

MOIZ I KALELƐ NIN I WULƐ'N Moiz fali Zozie sieli i ja nun

¹ Moiz kannin ndɛ nga kleli Izraɛlfuɛ'm be ekun.

² I waan: «Min afuɛ ya kun afuɛ ablaɔn yɛ m'an di i yɛ. N su kwla dun-man mmua amun nyrun kun. Anannganman kusu seli min kɛ n su kpɛ-man Zurdɛn'n.

³ Anannganman amun Nyanmiɛn'n ɔ ´dun mmua amun nyrun. Ɔ ´nunnun sran nga be o amun nyrun lɔ mun, ɔ ´fa be mɛn'n ´man amun. Sran ng'ɔ ´dun mmua amun nyrun ekun'n yɛlɛ Zozie kɛ Anannganman fa kannin'n sa.

⁴ Sa nga Anannganman fa wlali Siɔn nin Ɔg bɔ be ti Amɔrfuɛ'm be famiɛn'n be nun'n, b'ɔ fa wlali be mɛn'n i nun'n, i kunngba'n yɛ ɔ wa fa wla nvle sɔ'm be nun-ɔn. Ɔ ´nunnun be.

⁵ Anannganman ´fa be ´man amun. Mmla nga m mannin amun'n, amun `nian su sɛsɛ amun ´yo be.

⁶ Amun `jran kekle, amun `tra amun anwlɛn. Nán amun usu be nyrun, nán srɛ kun amun afin Anannganman amun Nyanmiɛn'n ɔ nin amun wo nun, ɔ su kpɔci-man amun. Ɔ su yi-man amun ase.»

⁷ Yɛ Moiz flɛli Zozie Izraɛlfuɛ'm be kwlaa be nyrun lɛ nan ɔ'a se i kɛ: «Jran kekle, tra ɔ anwlɛn, afin wɔ yɛ a wa fa Izraɛl nvle'n a ´wlu mɛn nga Anannganman tali be nannan'm be nda kɛ ɔ ´fa man be'n i nun-ɔn. Wɔ yɛ a ´cɛ nun ´man be-ɔ.

⁸ Anannganman bɔbɔ ɔ ´dun ɔ nyrun mmua. Ɔ ´jran ɔ́ sin. Ɔ su kpɔci-man wɔ, ɔ su yi-man wɔ ase. Ɔ man, nán srɛ kun wɔ, nán usu.»

Afuɛ nuan nso kwlakwla amun kanngan mmla'n

⁹ Moiz klɛli Nyanmiɛn i mmla'n, ɔ fa mannin Nyanmiɛn nyrun jranfuɛ'm bɔ be ti Levifuɛ'n, bɔ be sua Anannganman i alaka'n. Ɔ fa mannin be ɔ nin Izraɛl kpɛnngbɛn'm be kwlaa.

¹⁰ Moiz seli be kɛ: «Afuɛ nuan nso kwlakwla'n, ɔ ti kalɛ yaci cɛlɛ afuɛ'n b'ɔ ti kpata'm be ti cɛn dilɛ blɛ'n,

¹¹ kɛ Izraɛlfuɛ'm be kwlaa be ko ba Anannganman amun Nyanmiɛn'n i nyrun lika ng'ɔ ´kle i nun lɛ'n, amun `kanngan mmla'n kle be man be ti.

¹² Amun `yiayia sran mun, i yasua mun o, i bla mun o, i bakan mun o, ɔ nin aofuɛ nga amun sike be'n, man be ti. Amun `kle be kɛ be `sro Anannganman amun Nyanmiɛn'n, yɛ be `fa mmla'n nun ndɛ'm be sie be klun, yɛ be `nian su be `nanti.

¹³ Kɛ ba nga be nian ti-mɛn i le'n be ´ti'n, ɔ ´kle be kɛ be `sro Anannganman amun Nyanmiɛn'n blɛ kwlaa nga amun ´di i Zurdɛn'n i bue kun lɔ lika nga amun su ko fɛ i lɛ'n i nun.»

Izraɛlfuɛ'm bé sin bɔ be wa kaci si Nyanmiɛn'n i su ndɛ

¹⁴ Anannganman seli Moiz kɛ: «Ɔ wie cɛn'n ɔ'a mantan koko, i ti flɛ Zozie nan amun `ko jran min tannin sua nga n yi min wun nglo nun'n i nyrun lɔ man n kan ndɛ n kle i.» Yɛ Moiz nin Zozie be ko jrannin tannin sua'n i nyrun lɔ-ɔ.

¹⁵ Kpɛkuun Anannganman yili i wun nglo sin wɛnsrɛn kun b'ɔ jaso tiaan sa'n nun. Sin wɛnsrɛn sɔ'n ɔ wa jrannin tannin sua'n i anuan'n nun lɛ.

¹⁶ Anannganman seli Moiz kɛ: «Nian a su wa wu. Kɛ a ko wu'n, Izraɛlfuɛ'm be ´ko tu lika nga be wa ko tran nun lɛ'n i nun lɔ amuɛn mun, be sɔ be. Be ´kaci be sin si min. Be ´saci aenguɛ nga e nin be e trali'n.

¹⁷ Kɛ be ko yo sɔ'n, n wa fa ya bé wun, n ´yi be ase, n ´kaci mín sin n ´si be. Nvle kun nga'm be ´nunnun be. Sa yalɛ sunman kpa nin nyrɛnnɛn sa'm be wa tɔ bé su. Kpɛkuun be wa wun i wlɛ kɛ Nyanmiɛn b'ɔ nun-man be afiɛn'n i ti yɛ sa sɔ'm be tɔ bé su nin-ɔn.

¹⁸ Sa tɛ kwlaa nga be yoli'n, bɔ man be yacili min lɛ be fali ninnge wie mun'n ti'n, n ´kaci mín sin n ´si be mlɔnmlɔnmlɔn.

¹⁹ Amun `klɛ jue nga n wa kle amun yɛ'n. Amun `kle Izraɛlfuɛ mun, man be fa yo be jue be to. Man jue sɔ'n ɔ yo min nin Izraɛlfuɛ mun e afiɛn lalofuɛ.

²⁰ N wa fa be n ´kɔ lika nga n tali be nannan'm be nda kɛ n ´fa man be'n i nun lɔ. Lɔ asiɛ sɔ'n ɔ yo like kpa, i kunngba'n o ti nnɛn tawlɛ klanman. Be ´di like be ku ´yi, be ´cɛn cɛn luklɔ-luklɔɔ, be ´tu amuɛn'm be ´sɔ be, kpɛkuun be su bu-man min like kun. Be ´saci aenguɛ nga e nin be trali'n.

²¹ Kɛ be ko yo sɔ bɔ sa yalɛ nin nyrɛnnɛn sa'm be ko tɔ bé su'n, jue nga yɛ ɔ ´yo min nin be e afiɛn lalofuɛ-ɔ. Afin jue sɔ'n ɔ su jaso-man be osu nunfuɛ'm bé nuan nun. Kɛ e ´se yɛ'n bɔbɔ, sa nga bɔ be ju mɛn nga n tali be nda kɛ n ´fa man be'n i nun lɔ-ɔ be ´yo'n, i akunndan ng'ɔ o bé ti nun'n, n si i.»

²² Cɛn sɔ nun'n Moiz kali lɛ klɛli jue sɔ'n, yɛ ɔ fa kleli Izraɛlfuɛ mun.

²³ Kpɛkuun Anannganman seli Nɛn i wa Zozie kɛ: «Jran kekle, tra ɔ anwlɛn, afin wɔ yɛ a ´dun Izraɛlfuɛ'm be mmua yɛ a ´fa be wlu mɛn nga n tali be nda kɛ n ´fa man be'n nun lɔ-ɔ. E nin wɔ e o nun.»

²⁴ Kɛ Moiz wieli mmla wunmuan'n klɛ fluwa kun nun'n,

²⁵ ɔ seli Levifuɛ nga be sua Anannganman i alaka'n be kɛ:

²⁶ «Amun `fa mmla fluwa nga sie Anannganman amun Nyanmiɛn'n i alaka'n i wun lɛ. Man ɔ yo min nin Izraɛlfuɛ mun e afiɛn lalofuɛ.

²⁷ Afin n si kɛ be ti nyin keklefuɛ dan kpa, be bli be-ɔ ɔ bli-man. Nian sunnzun bɔ min nyin tɛ o su'n, nian jasolɛ bɔ be ´jaso Anannganman wun-ɔn. ?Yɛ sɛ be waan m'an wu nin?

²⁸ Amun `yia amun akpasua'm be kwlaa bé su kpɛnngbɛn mun nin amun siefuɛ mun, man n fa ndɛ sɔ mun n sie be nyrun. N kan nyanmiɛn nin asiɛ'n.

²⁹ N si jrɛiin kɛ sɛ n wu'n, ɔ lɛ-man kɛ amun su saci-man. Amun ´yaci atin nga n kleli amun'n i lɛ, amun ´fa uflɛ. Amun ´yo sa tɛtɛ mun Anannganman i nyrun amun ´fa kun i ya. Ɔ man sa yalɛ'n kusu ´tɔ amún su le.»

Moiz i jue'n

³⁰ Moiz kanngannin jue'n i nun ndɛ'n ngba kleli Izraɛlfuɛ'm be kwlakwla. Jue sɔ'n yɛ: