Mmla'n 30 - NYANMIƐN NDƐ'N 1998

Izraɛlfuɛ'm be ´sa bé sin be ´ba Anannganman i sin

¹ Muae nin sa yalɛ'n bé wun ndɛ mun yɛ m'an fa sie amun nyrun lɛ-ɔ. Kɛ sa sɔ'n kwlaa ko ju amún su'n, bɔ Anannganman amun Nyanmiɛn'n ko fa amun ko ɔ mɛn uflɛ'm be nun'n, kpɛkuun muae nin sa yalɛ ndɛ nga n fa sieli amun nyrun lɛ'n ɔ wa kpɛn amun klun.

² Amun wa sa amún sin amun ´ba Anannganman amun Nyanmiɛn'n i sin ekun, amun ´ti i aniɛn'n. Ndɛ nga n ´kan kle amun ndɛ yɛ'n, amun nin amun osu nunfuɛ mun, amun ´fa amun wla'n guɛ i kwlaa'n su, yɛ amun akunndan'n ɔ ´tran su.

³ Anannganman amun Nyanmiɛn'n kusu ɔ man amun wa jaso kanga nun amun ´ba, ɔ ´si amun aunnvuɛ. Mɛn nga ɔ man amun bo sanndili be nun'n, ɔ ko fa amun lɔ ´ba.

⁴ Sɛ bɔ be trali amun ɔli mɛn'n i tiwa lɔ'n, Anannganman Nyanmiɛn'n ɔ ko yia amun lɔ, amun ´ba.

⁵ Ɔ ´fa amun ´ba amun nannan'm be lika'n nun, yɛ amun ´fa. Ɔ ´yo amun kpa, ɔ ´yo man amun ´sɔn tra amun nannan mun.

⁶ Anannganman amun Nyanmiɛn'n i bɔbɔ, ɔ ´yo man amun nin amun osu nunfuɛ mun amun anwlɛn'n ɔ ´yo kpa. Ɔ man amun wa klo i kpa, amun wa fa amun wla'n kwlaa guɛ i su, yɛ amun akunndan'n kwlaa wa trɛn i su, kpɛkuun amun ´tran nguan nun.

⁷ Anannganman amun Nyanmiɛn'n ɔ ´yo man sa yalɛ sɔ'm be kwlaa be ´tɔ amun kpɔfuɛ fanunfanun bɔ be yaci-man amun diin'n bé su.

⁸ Kpɛkuun, amun wa sa amun sin amun ´ba Anannganman amun Nyanmiɛn'n i sin ekun, amun nyin ´yi i yɛ amun ´fɛ i mmla nga n ´fa man amun ndɛ yɛ'n i kwlaa su.

⁹ Anannganman amun Nyanmiɛn'n ɔ ´yo amun kpa, ɔ man amún sa nun ninnge'm be kwlaa be ´yo ye. Amun ´wu ba kpanngban, amun nnɛn'm be ´trɛ, amun fie'm be ´yo kpa. Ye kunngba nga Anannganman yoli amun nannan mun'n, yɛ ɔ ´yo amun-ɔn.

¹⁰ Ɔ ´yo i sɔ sɛ amun sa amun sin bɛ i sin o, yɛ sɛ amun fɛ i nuan ndɛ nin i mmla bɔ be ti klɛwa fluwa nga nun'n be su'n. Ɔ ´yo i sɔ sɛ amun fa amun wla'n kwlaa guɛ i su'n, yɛ sɛ amun akunndan'n kwla trɛn i su'n.

Nyanmiɛn ndɛ'n i sin atin nun-man mmua

¹¹ Mmla nga n ´fa sie amun nyrun ndɛ yɛ'n, ɔ ti-man kekle ngboko tra-man amún wunmiɛn su bɔ amun kwla fa-man su-ɔ.

¹² Ɔ nun-man nyanmiɛn su lɔ nan amu'an se kɛ: «?Wan yɛ e ´nyɛn i b'ɔ ´fu nyanmiɛn su lɔ, nan ɔ'a ko fa ɔ'a blɛ e nan y'a kwla ti y'a fa su-ɔ?»

¹³ Kusu ɔ nun-man jenvie'n i bue kun lɔ nan amu'an se kɛ: «?Wan yɛ e ´nyɛn i b'ɔ ´kpɛ jenvie'n, nan ɔ'a ko fa ɔ'a blɛ e nan y'a kwla ti y'a fa su-ɔ?»

¹⁴ Ɔ ti-man sɔ, ndɛ sɔ'n wo amún wun koko lɛ. Ɔ o amún nuan, ɔ o amun anwlɛn'n nun, i su falɛ'n ti-man lele .

Nguan nun tranlɛ yɛ ɔ ti kpa-a

¹⁵ Amun `nian, nguan nin muae'n yɛ m'an fa sie amun nyrun lɛ-ɔ. Wie'n nin sa yalɛ'n kusu yɛ m'an fa sie amun nyrun lɛ-ɔ.

¹⁶ Ndɛ nga n ´kan kle amun ndɛkɛn yɛlɛ kɛ amun `klo Anannganman amun Nyanmiɛn'n, nan amun `fɛ i atin'n su, nan amun `fɛ i mmla fanunfanun'm bé su. I liɛ'n, amun ´nyan nguan, amun ´trɛ, yɛ Anannganman amun Nyanmiɛn'n ɔ ´yo amun ye lika nga amun su kɔ i falɛ'n nun lɔ.

¹⁷ Sanngɛ sɛ amun kaci amún sin si i'n, sɛ amun nyin ɔ'a yi-mɛn i'n, yɛ sɛ amun ko koto like uflɛ'm bé bo amun sɔ be'n,

¹⁸ i liɛ'n, man n kan kle amun ndɛ, san wulɛ yɛ amun ´wu-ɔ. Amun su cɛ-man lika nga amun su wa kpɛ Zurdɛn'n nzue ba nan amun ko fɛ i lɛ'n nun.

¹⁹ Ndɛ nga n wa kan kle amun ndɛkɛn yɛ'n, nguan'n nin wie'n yɛ m'an ´fa sie amun nyrun lɛ-ɔ. Muae nin sa yalɛ'n yɛ m'an ´fa sie amun nyrun lɛ-ɔ. N bua-man ato. N kan nyanmiɛn nin asiɛ'n. Amun nin amun osu nunfuɛ mun, amun `fa nguan'n nan amun tran nguan nun.

²⁰ Amun `klo Anannganman amun Nyanmiɛn'n, amun `fɛ i nuan ndɛ'n su, amun `fa amún wun mɛntɛn i. I liɛ'n, amun ´kwla tran mɛn ng'ɔ tali amun nannan Abraam, nin Izaak, nin Zakɔb be nda kɛ ɔ ´fa man be'n i nun, yɛ amun ´cɛ.