Mmla'n 3 - NYANMIƐN NDƐ'N 1998

Izraɛlfuɛ'm be famiɛn Ɔg i mɛn'n i falɛ

¹ I sin, e blili e ko fali Bazan atin'n. Kpɛkuun Ɔg b'ɔ ti Bazan famiɛn'n nin i sonja'm be kwlakwla be fali alɛ be wa buli e nyrun Edrei lɛ.

² Yɛ Anannganman seli min kɛ: «Nán sro i, m'an fɛ i, nin i sonja mun, ɔ nin i mɛn'n m'an wla ɔ́ sa nun. Sa nga a fa yoli Siɔn b'ɔ ti Amɔr famiɛn'n b'ɔ tran Ɛsbɔn'n laa'n, i kunngba'n yɛ a wa fa yo i-ɔ.»

³ Ɔ man Anannganman e Nyanmiɛn'n ɔ fali Ɔg b'ɔ ti Bazan famiɛn'n nin i sonja'm be kwlakwla wlali é sa nun. E kwlali be, yɛ y'a yaci-man sran be nun ba kun sa lɛ.

⁴ E ja kunngba'n nun lɛ'n, e fali be klɔ'm be kwlaa, ba kun sa ɔ'a ka-man lɛ. E fali Argɔb nvle'n nun klɔ ablesiɛn'm bɔ be o Bazan mɛn'n nun bɔ Ɔg yɛ ɔ sie be'n.

⁵ Klɔ sɔ'm be kwlakwla bé wun ti sisiwa, bé wun talɛ'm be ti nglo-nglo kpa, kpɛkuun be to be anuan'm be nun nin gboklo dandan mun. Klɔ nga bé wun ti-man sisiwa'n be liɛ be kan-man, be sɔnnin kpa.

⁶ E sacili be kwlakwla kɛ e fa yoli Siɔn b'ɔ ti Ɛsbɔn famiɛn'n i liɛ'n sa. E nunnunnin be su sran mun. I yasua o, i bla o, i bakan o, e nunnunnin be ngba.

⁷ Sanngɛ e fali nnɛn mun, yɛ e fɛnnin klɔ'n be nun ninnge mun e fali be ekun.

Galaad mɛn'n i nun cɛlɛ

⁸ Ɔ man i blɛ sɔ nun'n, e fali Amɔr famiɛn nnyɔn'm be lika'm be sa nun. Be tran Zurdɛn'n i wia afiliɛ lɔ Arnɔn nzue ba'n nin Ɛrmɔn oka'n be afiɛn lɛ.

⁹ Sidɔnfuɛ'm be flɛ Ɛrmɔn oka'n kɛ Siriɔn. Amɔrfuɛ'm be kusu be flɛ i kɛ Sɛnir.

¹⁰ E deli lika kpɛtɛkplɛɛ'n nun klɔ'm be kwlaa nin Galaad mɛn'n, ɔ nin Bazan'n i kwlaa lele fa ju Salka nin Edrei bɔ be ti famiɛn Ɔg i mɛn'n nun klɔ mun'n. Klɔ sɔ'm be o Bazan mɛn'n nun.

¹¹ Ɔg b'ɔ ti Bazan famiɛn'n yɛ ɔ ti Rɛfafuɛ'm be kasiɛn b'ɔ kali-ɔ. I li bɔ be sieli i su'n ɔ ti blalɛ. Kɛ e se yɛ'n, ɔ o Raba b'ɔ ti Amɔnfuɛ'm be famiɛn klɔ'n su lɔ. I tɛnndɛn nun'n ti mɛtri nnan, yɛ i tɛtrɛ nun'n ti mɛtri nnyɔn.

¹² I blɛ sɔ'n nun yɛ e fali lika ng'ɔ o Arɔɛr i nglo lɔ Arnɔn nzue ba'n i nuan lɔ nin-ɔn. N kpacili Galaad b'ɔ ti oka-oka lika'n i nun kpla, n fɛli i bue kun m mannin Ribɛnfuɛ mun nin Gadfuɛ'm be osu nunfuɛ mun. N fali lɛ klɔ mun m mannin be.

¹³ Galaad mɛn'n i bue ng'ɔ ka lɛ'n, ɔ nin Ɔg i mɛn'n bɔ yɛlɛ Bazan'n, n fɛli i ngba m mannin Manase akpasua'n i bue. Argɔb lika wunmuan'n nin Bazan lika wunmuan'n, be flɛ be Rɛfafuɛ'm be mɛn.

¹⁴ Manase i wa Zair i osu nunfuɛ'm be fali Argɔb lika wunmuan'n Bazan lika'n nun lɔ lele kpɛn Gesirfuɛ mun nin Maakatfuɛ'm be awɛ'n su. Be fali be dunman sieli lɛ klɔ'm be su. Be flɛ be kɛ Zair klɔ, lele ndɛ be tɛ flɛ be sɔ.

¹⁵ N fali Galaad mɛn'n m mannin Manase i wa Makir i osu nunfuɛ mun.

¹⁶ N fali lika ng'ɔ o Galaad nin Arnɔn nzue ba'n be afiɛn'n m mannin Ribɛnfuɛ mun nin Gadfuɛ'm be osu nunfuɛ mun. Be lika'n i nuan su yɛlɛ Arnɔn nzue ba'n. Zabɔk nzue ba'n kusu ti be nin Amɔnfuɛ'm be awɛ.

¹⁷ Wia atɔliɛ lɔ awɛ liɛ'n yɛlɛ Zurdɛn'n i kongo'n. Ɔ sin Kinerɛt fɛtɛ'n nin jenvie b'ɔ ti njin nzue klakla'n be afiɛn lele fa ju Pisga oka b'ɔ o wia afiliɛ lɔ'n i bo lɔ.

¹⁸ I blɛ sɔ nun'n, n kannin ndɛ kleli amun, n jrannin su, n seli amun kɛ: «Anannganman amun Nyanmiɛn'n fali lika nga mannin amun. Sonja mun, amun kwlakwla amun `fa amun alɛ ninnge mun nan amun `dun mmua amun niaan Izraɛlfuɛ kun nga'm be nyrun.

¹⁹ Amún yi mun nin amun mma kanngan mun, ɔ nin amun nnɛn mun yɛ be ´ka klɔ nga n fa mannin amun'n bé su-ɔ. N si kɛ amun nnɛn'm be sɔnnin.

²⁰ Amun `uka amun niaan mun man Anannganman `man be manndran, man be `nyan mɛn bɔ Anannganman amun Nyanmiɛn'n wa fa man be Zurdɛn'n i bue kun lɔ'n ka nan amu'an sa amun sin lika kunngun nga n fa mannin amun'n be nun.»

²¹ Kɛ ɔ yoli sɔ'n nan m'an se Zozie kɛ: «Sa kwlaa nga Anannganman amun Nyanmiɛn'n fa yoli famiɛn nnyɔn nga be o lɛ mun'n, ɔ yoli ɔ nyrun. Sa kunngba sɔ'n yɛ ɔ ´fa yo mɛn nga a nin be nun famiɛn'm be ´kun mun be kwlaa-a.

²² Nán amun sro be. Anannganman amun Nyanmiɛn'n bɔbɔ yɛ ɔ ´kun amún ti alɛ-ɔ.»

Moiz su kpɛ-man Zurdɛn'n

²³ I blɛ sɔ'n nun'n nan m'an kpata Anannganman'n, n seli i kɛ:

²⁴ «Anannganman, a kleli min weiin kɛ a ti dan nan a kwla sa kwlaa yo. Kɛ n nian nglo lɔ nin asiɛ'n su wa'n, n wun-man amuɛn kun b'ɔ yo sa dandan nga a yo'n wie-ɔ ɔ yo ye-ɔ.

²⁵ Yaci man n kpɛ Zurdɛn nzue ba'n, nan mín nyin mma `gua mɛn klanman ng'ɔ o Zurdɛn'n i bue kun lɔ'n i wun, man n wun i nun oka nglanman mun ɔ nin Liban mɛn'n.»

²⁶ Sanngɛ ya nga Anannganman fɛli i mín wun amun dunman nun'n ti, ɔ seli min kɛ: «Yaci ndɛ ng'ɔ o lɛ'n i kanlɛ man n ti sa.

²⁷ Fu Pisga oka'n su nan nian wia atɔliɛ lɔ lika'n, nian wia afiliɛ lɔ lika'n nin nglo lɔ lika'n, ɔ nin ngua lɔ lika'n, nian be kpa. Sanngɛ Zurdɛn'n liɛ'n, a su kpɛ-man.

²⁸ Sa nga Zozie ko yo'n kan kle i. Wlɛ i fanngan man ɔ yo yakpa, afin i yɛ ɔ wa dun mmua Izraɛlfuɛ'm be nyrun yɛ ɔ ´fa mɛn nga a wa wun i lɛ'n ´man be-ɔ.»

²⁹ Kɛ ɔ yoli sɔ'n, e kali kongo nun lɛ Bɛt-Pɛɔr klɔ'n i nyrun lɛ.