Mmla'n 29 - NYANMIƐN NDƐ'N 1998

Like nga Nyanmiɛn yoli mannin Izraɛlfuɛ mun'n

¹ Moiz flɛli Izraɛlfuɛ'm be kwlaa nan ɔ'a se be kɛ: «Like nga Anannganman yoli i Ezipt mɛn'n nun lɔ'n, like ng'ɔ fa yoli Ezipt famiɛn'n nin i mantanfuɛ mun'n, ɔ nin i mɛn'n nunfuɛ mun'n amun wunnin be.

² Sa kekleekle ng'ɔ fa yili be su nin abonuan sa ng'ɔ yoli be'n, ɔ nin atrɛ ng'ɔ yili be'n, amun wunnin be.

³ Sanngɛ kɛ ɔ fɛ i lele b'ɔ ´fa ju ndɛ'n, Anannganman nian man-man amun ngwlɛlɛ kɛ amun fa wun sa sɔ'm be wlɛ. Amun nian wun-man ase, amún su'm be nian ti-man sa.

⁴ Ɔ dunnin amun nyrun mmua aawlɛ flɛnnɛn'n nun, amun tralɛ'm b'a titi-man amún wun, amun ngbabua'm b'a kpɛkpɛ-man amun ja bo.

⁵ Amu'an di-man kpaun, amu'an nɔn-man nzan nin nzan kekle. Anannganman bɔbɔ niannin amun lika kɛ ɔ ´yo nan amu'an si kɛ i yɛ ɔ ti amun Nyanmiɛn'n ti.

⁶ Kɛ e juli lika nga nun wa'n, Siɔn b'ɔ ti Ɛsbɔn famiɛn'n nin Ɔg b'ɔ ti Bazan famiɛn'n be nin e bali alɛ kunlɛ nan y'a kwla be.

⁷ E fali be lika'n e fa mannin Ribɛn akpasua'n, nin Gad akpasua'n, ɔ nin Manase akpasua'n i bue.

⁸ Ɔ man amun `fa aenguɛ nga ɔ nin amun ´trɛ i yɛ'n i nun ndɛ'm bé su, amun `nian su be `nanti nan like kwlaa nga amun ´yo'n ɔ'a yo kpa ɔ'a man amun.»

Anannganman i aenguɛ ng'ɔ nin sran'm be tra'n, ɔ ti sa nanndoliɛ b'ɔ fata kɛ be fa su

^9-10 Amún su kpɛnngbɛn mun, nin amun nyrun mmua dunfuɛ mun, ɔ nin amun awlo bo kpɛnngbɛn mun, nin amun alɛ su kpɛnngbɛn mun, nin amun mma mun, nin amún yi mun, ɔ nin aofuɛ nga amun sike be'n mun, wie'm be ti yie bufuɛ, wie'm be kusu be ti nzue safuɛ, amun kwlaa amun yɛ amun wo Anannganman amun Nyanmiɛn'n i nyrun yɛ.

¹¹ Ndɛkɛn Anannganman amun Nyanmiɛn'n ɔ nin amun wa tra aenguɛ ng'ɔ tali su nda laa'n.

¹² Ndɛkɛn, ɔ ´fa amun yo i nvle nunfuɛ mun, yɛ i kusu ɔ ´yo amun Nyanmiɛn kɛ ɔ kan kleli amun'n sa yɛ kɛ ɔ tali nda kleli amun nannan Abraam, nin Izaak, ɔ nin Zakɔb be sa.

¹³ Aenguɛ sɔ'n, nán ɔ nin amun kunngba yɛ ɔ ´tra-a, nda ng'ɔ ta'n, nán amun kunngba yɛ ɔ ´ta amun-ɔn.

¹⁴ Ɔ ti amun bɔ amun wo Anannganman amun Nyanmiɛn'n i nyrun wa ndɛ'n, ɔ nin be nga be nun-man wa ndɛ yɛ'n be liɛ.

¹⁵ E Ezipt lɔ tranlɛ'n yoli amun nyrun. Kɛ e ´sin nvle-nvle'm be nun'n ɔ yoli amun nyrun.

¹⁶ Amun wunnin be tete ninnge mun, amun wunnin be amuɛn bɔ be fa waka, annzɛ yɛbuɛ, annzɛ jɛtɛ ufue annzɛ sika ɔkwlɛ yɛ be fa yi be'n.

¹⁷ Ɔ man nán amun nun sran kun, yasua annzɛ bla, nán awlo bo fi, nán akpasua fi, ɔ yaci Anannganman e Nyanmiɛn'n ɔ ko su nvle sɔ'm be amuɛn mun. Nán amun nun sran fi yo kɛ waka bɔ i mma'm be ti duwlɛ'n sa.

¹⁸ Sran ng'ɔ ti ndɛ nga'n, nán ɔ lɛkɛ i wun se kɛ: «Kannzɛ sɛ n yo nyin kekle lele n guɛ i ti nin i bo'n, sa fi su nyan-man min,» afin sɛ sran kun saci sran uflɛ ti nun'n fa ukɛ i bɔbɔ su'n,

¹⁹ Anannganman su yaci cɛ-mɛn i. Ɔ ´fɛ i wun ya dan kpa, ɔ ´fa sa yalɛ nga be kan be ndɛ fluwa nga nun'n ɔ ´yi i su. Ɔ ´nunnun i dunman asiɛ'n su.

²⁰ Anannganman ɔ ´yo man ɔ ´wun nyrɛnnɛn. Ɔ ´yi i Izraɛl akpasua'm be nun. Sa yalɛ nga be kan be ndɛ mmla bɔ be ti klɛwa fluwa nga nun'n, Anannganman ´fa yi i su. Kɛ Anannganman nin be nuan sɛli su sɔ-ɔ.

Sa nga Nyanmiɛn waan ɔ ´fa yi Izraɛlfuɛ'm be su'n, ɔ ´yo

²¹ Amun mma'm be akpasua nga be wa jaso su kasiɛn'n, ɔ nin aofuɛ nga be fin mmua'n, be wa wun sa kekleekle nga be ju mɛn nga su'n.

²² Be ´wun kɛ lika'n ɔ'a yo kɛ ɔ'a yra sa sufru nin njin'n ti. Ɔ man be di nun fie-ɔ ɔ yo-man ye, nan ´se kɛ aliɛ yɛ be ´nyɛn i nun-ɔn. Be ´wun kɛ ijre fi su fi-man kɛ Sodɔm, nin Gomɔr, nin Adma, ɔ nin Zɛbɔim bɔ Anannganman fali ya nunnunnin be'n be blɛ su sa.

²³ Nvle kun nga'm be nunfuɛ'm be usa bé wun kɛ: «?Ɔ yo sɛ ti yɛ Anannganman yoli mɛn nga sɔ-ɔ? ?Ɔ yo sɛ ti yɛ ɔ fɛli i nunfuɛ'm bé wun ya dan kɛ nga sa-a?»

²⁴ Kpɛkuun be ´tɛ bé su kɛ: «Aenguɛ nga be nannan'm be Nyanmiɛn'n nin be trali blɛ nga b'ɔ yi be Ezipt lɔ ´fite'n, b'a di-man su.

²⁵ Be ko sɔli amuɛn mun, be kotoli bé bo, kusu wuun be si-man amuɛn sɔ mun laa. Anannganman kusu ɔ'a man-man be atin kɛ be sɔ be.

²⁶ I ti yɛ ɔ fali ya mɛn sɔ'n i wun nan ɔ'a fa sa yalɛ nga be kɛn i wun ndɛ fluwa nga nun'n wa yi i su nin-ɔn.

²⁷ Ɔ fuannin i nunfuɛ'm be mɛn liɛ'n nun ya su. Ya'n ɔ yoli dan, ɔ man ɔ fali be yili i mɛn uflɛ nun, yɛ be tɛ o nun ndɛ lɛ.»

²⁸ Nvialiɛ nun like mun'n, Anannganman e Nyanmiɛn'n i kunngba cɛ yɛ ɔ si be-ɔ. Like nga kusu b'ɔ tikeli bé su kle ye'n, be ti e nin e osu nunfuɛ mun e liɛ tititi kɛ ɔ ´yo nan y'a nanti mmla nga nun ndɛ'm bé su'n ti.