Mmla'n 28 - NYANMIƐN NDƐ'N 1998

Nyanmiɛn waan ɔ ´yo Izraɛlfuɛ'm be ye

¹ Sɛ amun nyin yi Anannganman amun Nyanmiɛn'n, nan amun fa mmla nga n ´fa man amun ndɛ yɛ'n be su'n, sɛ amun nian bé su nanti'n, Anannganman amun Nyanmiɛn'n ɔ ´yo man amun nvle'n i dan ´tra mɛn'n nun nvle'm be kwlaa kpan.

² Sɛ amún nyin yi Anannganman amun Nyanmiɛn'n, ye fanunfanun ng'ɔ ´yo amun'n be yɛ:

³ Sran ng'ɔ tran klɔ'n, ɔ ´yo i ye, sran ng'ɔ tran blo'n, ɔ ´yo i ye.

⁴ Amun ´wu ba kaka, amun fie'm be ´yo kpa, amun nnɛn'm be kusu, i nannin o, i bua o, i boli o, be ´wu ba kpanngban.

⁵ Ndidiɛ ninnge nga amun fa be sie amun gbogbo nin kpongbo be nun'n, be su wie-man le.

⁶ Amun ninnge'm be kwlaa bé bo bolɛ nin be agualiɛ'n ɔ ´yo ye.

⁷ Anannganman ɔ ´yo man amun kpɔfuɛ nga be nin amun ´ba alɛ kunlɛ'n, be su nyan-man jranwlɛ. Be balɛ'n su be ´fa atin kunngba, sanngɛ be kɔlɛ'n su'n, be wanndi be fa atin nso.

⁸ Anannganman amun Nyanmiɛn'n ɔ ´nian amun tanngannin'm bé nun ninnge'm be su. Yɛ kusu like kwlaa nga amún yo'n, ɔ ´yo ye amun sa nun. Ɔ ´yo amun ye mɛn nga ɔ'a fa man amun'n nun.

⁹ Sɛ amun fa mmla nga Anannganman amun Nyanmiɛn'n ɔ fa mannin amun'n bé su'n, nan amun nanti atin ng'ɔ kle amun'n bé su'n, ɔ ´fa amun nvle'n ´yo i liɛ klonglo, afin ɔ tali nda sɔ.

¹⁰ Kɛ mɛn'n nun nvle'm be ´wun kɛ Anannganman i dunman'n yɛ ɔ o amún su'n, kpɛkuun be ´sa amun nyan.

¹¹ Anannganman ɔ ´yo man amun nyan ninnge kpanngban lika ng'ɔ tali amun nannan'm be nda kɛ ɔ ´fa man amun'n i nun. Amun ´trɛ, amun nnɛn'm be ´trɛ, amun fie'm be ´yo kpa.

¹² Anannganman ´tike i ninnge kpakpa'm bé su ´man amun. Ɔ ´tike nyanmiɛn su nzue'n, kpɛkuun kɛ nzue tɔlɛ blɛ'n ɔ ju'n, ɔ ´tɔ i nan ninnge nga amun ´yo be'n be yo ye. Amun ´bo nvle sunman be bosia, sanngɛ amun liɛ'n, amun su usa-man afɛ le.

¹³ Sɛ amun fa Anannganman amun Nyanmiɛn'n i mmla nga n ´fa man amun ndɛ yɛ'n bé su'n, nan amun nian bé su nanti'n, Anannganman man amun yɛ amun ´dun mmua nvle'm be kwlaa be nyrun-ɔn, amun su ka-man siɛn. Amun ´tran nvle'm be ti su, amun su tran-man bé bo.

¹⁴ Nán amun yaci mmla nga n ´fa man amun ndɛ yɛ'm be lɛ kɛ amun ´nian bɛ nin fama. Nán amun fa bé wun ko man like uflɛ kɛ amun ´sɔ be.

Nyrɛnnɛn sa nga Nyanmiɛn waan ɔ ´fa yi bé su'n

¹⁵ Sɛ kusu amu'an ti-man Anannganman amun Nyanmiɛn'n i aniɛn'n, sɛ amu'an fɛ-mɛn i mmla nga n ´fa man amun ndɛ yɛ'n bé su'n, sɛ amu'an nian-man be su b'a nanti-man'n, nyrɛnnɛn sa ng'ɔ wa ´ju amún su'n yɛ:

¹⁶ Sran ng'ɔ tran klɔ'n, sa yalɛ ´nyɛn i, sran ng'ɔ tran blo'n, sa yalɛ ´nyɛn i kusu.

¹⁷ Amun su nyan-man ndidiɛ ninnge sie-man amun gbogbo nin amun kpongbo'm be nun.

¹⁸ Amun su wu-man ba kaka, amun fie'm be su yo-man ye, amun nannin mun, nin amun bua mun, ɔ nin amun boli'm be su trɛ-man.

¹⁹ Ninnge nga amun ´yo be'n, bé bo bolɛ nin be agualiɛ'n ɔ ´yo tɛ man amun.

²⁰ Like kwlaa nga amun fɛ i ajalɛ kɛ amun ´yo'n, Anannganman ɔ ´fa nyrɛnnɛn, nin afɛ, ɔ nin sannganlɛ ɔ ´yi nun, lele san amun ´wie nunnun sa tɛ yolɛ'n dunman nun nin amun sin bɔ amun kaci sili i'n ti.

²¹ Anannganman ɔ ´yo man tukpacɛ ng'ɔ sa ndɛndɛ su yaci-man amun yolɛ. Tukpacɛ sɔ'n ɔ ´tru gua amun wun lele san ɔ ´kun amun mɛn nga amun ´ko fa'n nun lɔ.

²² Anannganman ɔ ´yo man amun ´yo kokloo. Amun wunnɛn ´trɔ fiaan, ayrɛ ´gua amun wun, jɛkuajo ´tra amun. Amun wunnɛn'n ´kaka amun, ɔ ´susu. Ɔ ´yo man lika'n ɔ ´wu kee, ble nin ɔrz'n be ´wu kee, be ´kplɔ. Sa sɔ'm be kwlakwla be ´tɔ amún su lele san amun ´wie nunnun.

²³ Nzue su tɔ-man kun, asiɛ'n ´yo kekleke kɛ blalɛ sa.

²⁴ Anannganman su tɔ-man nzue'n asiɛ'n su, ndutre nin aunnyan fuɛ'n yɛ Anannganman ´fita gua amún su-ɔ, lele san amun ´wie nunnun.

²⁵ Anannganman ´yo man amun kpɔfuɛ'm be ´kwla amun. Kɛ amun nin be ´ko kun'n, amun ´fa atin kunngba, sanngɛ balɛ'n su amun ´wanndi be ´fa atin nso. Kɛ mɛn'n nun nvle'm be ´wun sa ng'ɔ ´ju amún su'n, ɔ ´yo be sro.

²⁶ Amun fuɛn'm be ´kaci anunman nin nnɛn'm be aliɛ. Kɛ be ´di i sa'n, sran fi su kan-man bé bo.

²⁷ Anannganman ɔ ´yo man yra ng'ɔ tru guali Eziptfuɛ'm be wun'n, i wie ɔ ´yo amun, koko ´yo amun, asiɛn ´gua amun, kpɛkuun klele b'ɔ lɛ-man ayre'n ɔ ´gua amun.

²⁸ Anannganman ɔ ´yo man amun ´bo fia, amun su wun-man sa wlɛ kun, Anannganman ɔ ´wla amun sinnzin.

²⁹ Wia klakla kpa nun'n, amun ´fuafua amún sa kɛ anyansifuɛ'm be sa. Like nga amun ´yo'n, ɔ su yo-man ye amún sa nun. Yalɛ yɛ be ´kle amun sa lelele-ɔ, amún bo ninnge'n yɛ be ´fɛn i sa tititi-ɔ, amun su nyan-man sran b'ɔ ´de amun-ɔn.

³⁰ Sɛ amun nun sran wie tra bla wie ase kɛ ɔ ´jɛ i'n, yasua uflɛ yɛ ɔ ´kunndɛ i-ɔ. Amun ´kplan sua, sanngɛ amun su tran-man nun. Amun ´ta vinyi, sanngɛ amun su ti-mɛn i su mma.

³¹ Be ´kpɛ amun nannin'm be kɔmin amun nyrun lɛ, sanngɛ amun su di-man wie. Be ´wua amun aflunmun mun amun nyrun lɛ, be su yi man-man amun. Amun kpɔfuɛ'm be ´fa amun bua mun, amun su nyan-man sran b'ɔ ´uka amun ɔ de be bé sa nun-ɔn.

³² Be ´fa amun mma yasua mun nin amun mma bla mun be ´man nvle wie nunfuɛ mun amun bɔbɔ amun nyrun lɛ. Amun wa minndɛ be balɛ'n lele ngbɛn, amun su kwla-man sa fi yo .

³³ Nvle nga amun si-man be'n be nunfuɛ'm be ´di amun fie'm be su ninnge nin amun junman'n i nuan ninnge'm be kwlaa. Yalɛ yɛ be ´kle amun sa tititi-ɔ, yɛ mianmianlɛ yɛ be ´mianmian amun-ɔn .

³⁴ Sa sɔ bɔ amun wa wun be'n, be ´wla amun sinnzin.

³⁵ Anannganman ɔ ´yo man yra kannin bɔ be fua-a ɔ wu-man'n, ɔ ´yo amun nannglunman nin amun sɔwa'm bé su. Kpɛkuun yra sɔ'n ɔ ´fa amun wunnɛn wunmuan'n.

³⁶ Anannganman ɔ ´yo man amun bɔbɔ nin amun famiɛn nga amun ´fa sie amún su'n, be ´fa amun kɔ nvle kun bɔ amun nannan'm be si-mɛn i laa nan se kɛ amun bɔbɔ'n, i nun. Amun ´sɔ amuɛn bɔ be ti waka annzɛ yɛbuɛ .

³⁷ Nvle nga Anannganman ´fa amun ´kɔ be nun'n, be nunfuɛ'm bé nuan ´bo bé wun. Be ´srisri amun, be ´yo amun finfin.

³⁸ Amun ´di fie dandan, sanngɛ lalo'm be wie i nun ninnge'm be ´di. Like nga amun ´nyɛn i fie sɔ'm be su'n, ɔ ´yo kaan sa .

³⁹ Amun ´ta vinyi, amun ´niɛn i lika, sanngɛ kakaa'm be ´wie i ngba di, amun su nyɛn-mɛn i mma wie yo-man nzan nan se kɛ amun ´fa wie sie.

⁴⁰ Amun ´ta olivie mun lika'n nun tɔɔn, sanngɛ be mma'm be ´yo akpɔkuɛ, amun su nyɛn i ngo kpakpa-man.

⁴¹ Amun ´wu ba yasua mun nin ba bla mun, sanngɛ be ´tra be, be ´fa be ´yo kanga, be su yo-man amun liɛ .

⁴² Amun fie'm bé su waka nin aliɛ'm be ´yo aɛcɛ'm be liɛ .

⁴³ Aofuɛ nga be ´sike amun'n, be ´nyan nyrun tra amun tititi. Sanngɛ amun liɛ'n, amun ´kan ase tititi.

⁴⁴ Be bɔ amun ko bo be bosia'n, amun yɛ amun wa usa be afɛ-ɔ. Be yɛ be ´sie amun-ɔn, yɛ amun ´yo be sufuɛ.

⁴⁵ Sɛ amu'an ti-man Anannganman amun Nyanmiɛn'n i aniɛn'n, sɛ amu'an fɛ-mɛn i mmla fanunfanun b'ɔ fa mannin amun'n bé su'n, sa yalɛ nga be o lɛ'n be kwlaa be ´ju amún su lele san amun nvle'n ´nunnun.

⁴⁶ Sa sɔ'm be ´yo amun nin amun osu nunfuɛ mun amun sa nun kɛ nzɔliɛ sa mlɔnmlɔnmlɔn.

⁴⁷ Blɛ bɔ like kwlakwla ti sin yia amun'n, sɛ amun waan amun tu-man amun klun amun su-man Anannganman amun Nyanmiɛn'n aklunjuɛ su'n,

⁴⁸ amun wa su amun kpɔfuɛ nga Anannganman man be nin amun wa kun'n. Awe nin nzue we ´kun amun. Amún wun tralɛ'n kwlakwla ´wie titi, yalɛ ´di amun. Anannganman ɔ ´sie amun kɔmin'n su blalɛ trɔ lele san ɔ ´wie amun nunnun.

⁴⁹ Anannganman ´yo man nvle wie nunfuɛ'm bɔ amun ti-man be aniɛn'n, be ´fɛ i mɛn'n i bue kun lɔ lele be wa tɔ amún su. Be ´jra amún su kɛ anunman nyin su jra like su sa.

⁵⁰ Sran sɔ'm be like yolɛ ´yo ya kpa. Bé nyin su yi-man kpɛnngbɛn mun. Yɛ kusu be su si-man bakan aunnvuɛ.

⁵¹ Be ´di amun nnɛn mun nin amun fie'm bé su aliɛ mun lele san amun ´wie nunnun. Amun ble, nin amun nzan lɔflɛ, nin amun ngo, nin amun nannin'm be mma mun, nin amun bua'm be mma mun, ɔ nin amun boli'm be mma mun'n, be su yaci-man wie fi lɛ. Yɛ amun bɔbɔ amun ´wie wu.

⁵² Be ´taka be ngblaliɛ mun amun klɔ'm bé sin, yɛ be ´tran lɛ lele be bubu amun klɔ'm bé wun talɛ kpakpa nga be ti nglo-nglo bɔ amun lafi bé su amun mɛn'n nun'n. Be ´yo i sɔ mɛn nga Anannganman amun Nyanmiɛn'n fa mannin amun'n i wunmuan'n nun.

⁵³ Kɛ amun kpɔfuɛ'm be ko kata amun anuan'n, bɔ amun wla ko bo amun wun'n, kpɛkuun amun wa di amun ku sɛ nun ba mun. Ba yasua mun, nin ba bla mun bɔ Anannganman amun Nyanmiɛn'n ɔ'a fa man amun'n, amun ´di be .

⁵⁴ Amun nun yasua kpa ng'ɔ ti wɛtɛɛfuɛ bɔbɔ'n, b'ɔ klo sran'n, i bɔbɔ i niaan'n, nin i bo bla'n, ɔ nin i mma nga be ´kɛ i sa nun'n, bé wun ɔ ´yo i tɛ.

⁵⁵ I wa'm be nnɛn b'ɔ su man-man i fuɛ'm be wie'n i ti yɛ i nyin ɔ ´ci be nin-ɔn. Afin kɛ amun kpɔfuɛ'm be ko kata amun anuan'n, aliɛ kunngba ng'ɔ ko nyɛn i ko di'n i ngba yɛ ɔ o lɛ-ɔ.

⁵⁶ Bla kpa ng'ɔ ti wɛtɛɛfuɛ'n, b'ɔ klo sran'n, bɔ i ja sa kan-man asiɛ'n, i bɔbɔ i wun b'ɔ jɛ i'n, nin i wa yasua, ɔ nin i wa bla'n, bé wun ɔ ´yo i tɛ.

⁵⁷ Kɛ amun kpɔfuɛ'm be ko kata amun anuan'n, bɔ bla'n ɔ nyan-man like di-man'n, ɔ ´fia di ba nɔnman bɔ ɔ'a wu i'n, ɔ nin i sin ninnge'n.

⁵⁸ Sɛ amu'an fa-man mmla bɔ be ti klɛwa fluwa nga nun'n i nun ndɛ mun, sɛ amu'an fa-man be amun sie-man'n, sɛ amun nian-man su b'a nanti-man'n, sɛ amun nyin a yi-man sran nga b'ɔ lɛ nyrun, b'ɔ yo sro'n, b'ɔ i dunman yɛlɛ Anannganman amun Nyanmiɛn'n,

⁵⁹ Anannganman ´fa sa kekle mun yi amun nin amun osu nunfuɛ mun amun su. Ɔ ´fa tukpacɛ tɛtɛ kpa mun yi amun su, be su kwla yo-man be ayre.

⁶⁰ Sa ng'ɔ fa yili Eziptfuɛ'm bé su bɔ be yo amun sro'n, ɔ ´fa yi amun su wie, yɛ be ´ka amun wun.

⁶¹ Tukpacɛ nin sa nga Anannganman ɔ ´fa yi amún su'n, i ngba nun-man mmla fluwa nga nun. Ɔ ´fa yi amun su lele san amun ´wie nunnun.

⁶² Amun kpanngban bɔ amun ti kɛ nyanmiɛn su lɔ nzraama'm be sa'n, amun wa ka kaan sa Anannganman amun Nyanmiɛn'n i aniɛn bɔ amu'an ti-man'n ti.

⁶³ Anannganman yoli amun kpa, ɔ man amun trɛli. Ɔ wa wlu amun nun, amun ´wie nunnun, kpɛkuun amu'an jaso mɛn nga amun ´ko fa'n nun.

⁶⁴ Anannganman ´fa amun ´sanndi nvle'm be kwlaa be nun kɛ ɔ fɛ i asiɛ'n i bue kun b'ɔ fa ju i bue kun ekun lɔ'n. Kpɛkuun amun wa sɔ amuɛn wie mun bɔ amun nannan'm b'a si-man be nan ´se kɛ amun bɔbɔ'n . Amuɛn sɔ'm be ti waka nin yɛbuɛ.

⁶⁵ Kɛ amun wo nvle sɔ'm be nun lɔ'n, amún wla su gua-man ase. Amun su nyan-man lika kun bɔ amun ´tran nun amun ´de wunmiɛn-ɔn. Anannganman ɔ ´yo man kokolɛ'n yɛ amun ´koko-ɔ, amun ´nian ninnge mun sa saa, amun wla'n ɔ ´bo.

⁶⁶ Amun ´sende wie'n nin nguan'n be afiɛn. Amun klun'n ´titi amun kɔnguɛ nan ɔ'a titi amun wia nun. Amun su wun-man nga amun o nun-ɔn.

⁶⁷ Sa nga amun ´wun be'n, ɔ nin srɛ b'ɔ ´kun amun dan'n ti'n, nglɛmun amun ´se kɛ: «Man aliɛ san sɔ!» Nnɔsua kusu amun ´se kɛ: «Man lika cɛn sɔ!»

⁶⁸ Anannganman ɔ ´yo man amun ´fu mmeli nun amun ´kɔ Ezipt mɛn'n nun lɔ. Ezipt atin sɔ b'ɔ seli amun kɛ nán amun fɛ kun'n, yɛ amun ´fa su-ɔ. Sɛ amun ju lɔ'n, i yasua o, i bla o, amun ´ko yo amún wun atɛ amun kpɔfuɛ'm bé sa nun nan amun ´kaci kanga, sanngɛ sran fi su to-man amun.

MOIZ I NDƐ KASIƐN NG'Ɔ KANNIN'N

⁶⁹ Anannganman nin Izraɛlfuɛ'm be trali aenguɛ Moab mɛn nun. Ɔ seli Moiz kɛ ɔ siesie aenguɛ sɔ'n i nun sa mun. Aenguɛ klikli nga Anannganman nin be trali Orɛb oka'n su lɔ'n, ɔ nun-man nun. Kasiɛn liɛ'n i nun ndɛ mun yɛ.