Mmla'n 27 - NYANMIƐN NDƐ'N 1998

IZRAƐLFUƐ'M BE SU DI AENGUƐ NGA BE NIN ANANNGANMAN BE TRALI I SU CƐN Yɛbuɛ nga be takali be Ebal oka'n su'n

¹ Moiz nin Izraɛl kpɛnngbɛn'm be bo ti kun yɛ ɔ kannin ndɛ nga mun kleli Izraɛlfuɛ mun-ɔn, i waan: «Amun `nian mmla nga n ´fa man amun ndɛkɛn yɛ'n su amun `nanti.

² Cɛn nga amun kpɛ Zurdɛn'n nan amun wlu mɛn nga Anannganman amun Nyanmiɛn'n ɔ'a fa man amun yɛ'n nun lɔ'n, amun `kplankplan yɛbuɛ dandan mun, amun `kan be ayre ufue.

³ Kpɛkuun mmla nga n fa sieli amun nyrun'n, i ndɛ'n kwlaa amun `fa klɛ bé su. Kɛ amun ko ju mɛn bɔ Anannganman amun nannan'm be Nyanmiɛn'n seli kɛ ɔ ´fa man amun i nun lɔ'n, amun `yo sɔ. Ɔ ti mɛn kun bɔ i asiɛ'n ɔ yo like ye kpa, i kunngba'n ɔ ti nnɛn tawlɛ klanman.

⁴ Kɛ amun ko kpɛ Zurdɛn'n, amun `fa yɛbuɛ nga n waan amun kplankplan'n, amun `kplan be Ebal oka'n su, kpɛkuun amun `kan be ayre ufue.

⁵ Kpɛkuun amun `kplan Anannganman amun Nyanmiɛn'n i sɔwlɛ kun lɔ. Amun `fa yɛbuɛ nga blalɛ ɔ'a kɛn-mɛn i'n yɛ amun `fa kplan Nyanmiɛn sɔwlɛ sɔ nin-ɔn.

⁶ Amun `fa yɛbuɛ bɔ b'a sɛsɛ-mɛn i wun'n yɛ amun `fa kplan Anannganman amun Nyanmiɛn'n i sɔwlɛ sɔ nin-ɔn. Kpɛkuun amun `yi su tɛ nga be yra be nnɛn'n kɔlikɔli'n be man Anannganman amun Nyanmiɛn'n.

⁷ Yɛ amun `yi bo kun yolɛ i su tɛ mun nan amun `di. Yɛ amun `di cɛn Anannganman amun Nyanmiɛn'n i nyrun lɛ.

⁸ Kpɛkuun amun `fa mmla nga i nun ndɛ'n kwlaa amun `klɛ be yɛbuɛ sɔ'm bé su, man ɔ fite kpa weiin.»

⁹ Moiz nin Nyanmiɛn nyrun jranfuɛ bɔ be ti Levifuɛ mun'n, be bo ti kun. Moiz jrannin be kwlaa be nuan ɔ kannin ndɛ ng'ɔ o yɛ mun kleli Izraɛlfuɛ'm be ngba. I waan: «Izraɛlfuɛ mun, amun `gua bliin nan amun `sie amun su tie Anannganman amun Nyanmiɛn'n i nuan ndɛ'n, nan i mmla nga n ´fa man amun ndɛ yɛ'n amun `nian bé su nanti.

¹⁰ Amun nyin `yi Anannganman amun Nyanmiɛn'n, yɛ amun `fɛ i nuan ndɛ'n nin i mmla nga n fa sieli amun nyrun ndɛkɛn'n be su.»

¹¹ Le kunngba sɔ'n nun'n, Moiz kan kleli Izraɛlfuɛ'm be ekun kɛ:

¹² «Sɛ amun kpɛ Zurdɛn'n, man Simeɔn, nin Levi, nin Zida, nin Isakar, nin Zozɛf, ɔ nin Bɛnzamɛn be jran Garizim oka'n su, nan be yra Izraɛlfuɛ'm be nguan.

¹³ Kpɛkuun man Ribɛn, nin Gad, nin Azɛr, nin Zabilɔn, nin Dan, ɔ nin Nɛftali be kusu be jran Ebal oka'n su, be kan nyrɛnnɛn sa nga be wa ju mun.»

Sannzan blu-nin-nnyɔn

¹⁴ Man Levifuɛ'm be kusu be man be nɛn'n su be kan kle Izraɛlfuɛ'm be kwlaa kɛ:

¹⁵ «Sran ng'ɔ yo waka sran, annzɛ ɔ klo blalɛ fa yi like wie, nan ɔ fa fia lika wie nan ɔ su i'n, nán man ɔ wun ye le. Afin like sɔ bɔ ajuin difuɛ'm be yo'n, Anannganman nyin ci i.» Kpɛkuun man Izraɛlfuɛ'm be kwlakwla be tɛ su kɛ: «Man ɔ yo sɔ!»

¹⁶ «Sran ng'ɔ bu-mɛn i si nin i nin be sran'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

¹⁷ «Sran ng'ɔ tra awɛ'n su ko ja uflɛ i wiengu kun lika liɛ nun'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

¹⁸ «Sran ng'ɔ yo man anyansifuɛ kun to fuɛn i atin'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

¹⁹ «Sran ng'ɔ bu aofuɛ annzɛ aika ba, annzɛ angboti bla be lufle'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

²⁰ «Sran ng'ɔ nin i si i yi be la'n, b'ɔ ti kɛ ɔ'a kuakua i si sa'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

²¹ «Sran ng'ɔ nin nnɛn wie be la kɛ bian nna nin bla nna sa'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

²² «Sran ng'ɔ nin i niaan bla be la'n, sɛ ɔ ti i si i wa o, sɛ ɔ ti i nin wa o, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

²³ «Sran ng'ɔ nin i sia bla be la'n, nán man ɔ wun ye le.» Kpɛkuun man Izraɛlfuɛ'm be kwlaa tɛ su kɛ: «Man ɔ yo sɔ!»

²⁴ «Sran ng'ɔ fia kun i wiengu'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

²⁵ «Sran nga be cɛ i like kɛ ɔ `fa nan ɔ `kun sran wie bɔ ɔ'a yo-man sa fi'n, b'ɔ sɔ nun'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

²⁶ «Sran nga ɔ'a fa-man mmla nga i nun ndɛ'm bé su'n, nan ɔ'a nian-man su ɔ'a nanti-man'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»