Mmla'n 26 - NYANMIƐN NDƐ'N 1998

Fie'm be su like klikli nga be nyan be'n i su ndɛ Izraɛlfuɛ'm be Nyanmiɛn sulafilɛ ndɛ

¹ Cɛn nga amun ju mɛn nga Anannganman amun Nyanmiɛn'n ɔ'a fa man amun kɛ amun fa'n i nun'n bɔ amu'an tran nun'n,

² amun kwlaa amun `fa asiɛ nga Anannganman amun Nyanmiɛn'n fa man amun'n i su mma klikli mun `sie gbogbo kun nun, nan amun `wɔ lika nga Anannganman ko kle kɛ lɛ yɛ ɔ tran'n i nun lɔ.

³ Amun `ko to Nyanmiɛn nyrun jranfuɛ ng'ɔ o lɛ'n, nan amun `se i kɛ: «Mɛn nga Anannganman e Nyanmiɛn'n tali e nannan'm be nda kɛ ɔ ´fa man ye'n, y'a ju nun wa, yɛ e bali Anannganman i kan klelɛ ndɛkɛn-ɔn.»

⁴ Kpɛkuun Nyanmiɛn nyrun jranfuɛ'n ɔ ´fa gbogbo b'ɔ o sran ng'ɔ ɔli'n i sa nun'n, ɔ wa fa jin i Anannganman amun Nyanmiɛn'n i sɔwlɛ'n i nyrun lɛ.

⁵ Kpɛkuun man sran'n ɔ jran Anannganman amun Nyanmiɛn'n i nyrun lɛ, nan ɔ `se kɛ: «Min nannan'n ɔ ti Aramfuɛ, ɔ wlan-wlannin lika'm be nun, ɔ tu tran wa, ɔ tu tran wa. Ɔ wa ɔli Ezipt mɛn'n nun lɔ ɔ nin i sran mun. Kɛ be ´kɔ'n, be ti sran ba nnyɔn kun cɛ, b'a sɔn-man. Be ko trannin lɔ, be trɛli, be yoli nvle dan kun b'ɔ lɛ wunmiɛn.

⁶ Eziptfuɛ'm be kleli e yalɛ, be mianmiannin e. Be fali e yoli be kanga, be man e dili junman kekleekle mun.

⁷ Yɛ e kpan flɛli Anannganman e nannan'm be Nyanmiɛn'n. Anannganman kusu tili e aniɛn'n, ɔ wunnin afɛ nga e o nun'n, ɔ wunnin yalɛ nin nyrɛnnɛn bɔ be ´kle ye'n.

⁸ Ɔ man Anannganman fali e Ezipt lɔ bali. Ɔ ´fa e ´ba'n, sran fi ɔ'a kwla jrɛn-mɛn i nyrun. Ɔ yoli sa sroesroe mun. Ɔ yoli abonuan sa mun. Ɔ yili atrɛ mun.

⁹ Nan ɔ'a fa e ɔ'a ba mɛn nga nun wa. Mɛn sɔ'n i asiɛ'n ɔ yo like ye kpa'n, yɛ i kunngba'n ɔ ti nnɛn tawlɛ klanman.

¹⁰ Ɔ man kusu Anannganman, asiɛ nga a fa mannin min'n i su mma klikli'n yɛ n ´fa blɛ wɔ yɛ.» Kpɛkuun man sran'n ɔ fa ninnge sɔ mun sie Anannganman amun Nyanmiɛn'n i nyrun lɛ, nan ɔ `koto Anannganman amun Nyanmiɛn'n i nyrun.

¹¹ Kpɛkuun amun nin Levifuɛ mun, ɔ nin aofuɛ nga be nin amun tran lɛ mun'n, amun `di cɛn, ye nga Anannganman amun Nyanmiɛn'n ɔ yoli amun nin amun awlofuɛ mun'n ti.

Afuɛ nsan su blusu'n i ndɛ

¹² Afuɛ nuan nsan kwlaa ng'ɔ ju'n, b'ɔ ti blusu yilɛ afuɛ'n, kɛ amun ´yi amun fie su ninnge'm be blusu'n, amun `fa man Levifuɛ mun, nin aika mma mun, ɔ nin angboti bla nga be o amun klɔ'n su'n man be di nan be ku yi.

¹³ Kpɛkuun amun `jran Anannganman amun Nyanmiɛn'n i nyrun, nan amun `se kɛ: «Anannganman, like ng'ɔ ti wɔ liɛ'n, m'an fa-man wie fi m'an sie-man min awlo lɔ. Like nga a kleli kɛ n `fa man Levifuɛ mun, nin aofuɛ mun, nin aika mma mun, ɔ nin angboti bla mun'n, n fa mannin be. M'an yi-man ndɛ nga a kan kleli min'n i wie fi blo, mín wla ɔ'a fi-man wie fi su.

¹⁴ M'an se-man kɛ sɛ ɔ'a tɔ mín su ti nan n ´di. Kɛ fiɛn'n kannin min'n, m'an kan-man blusu sɔ'n. M'an fa-man wie m'an sie-man nziɛ. Anannganman min Nyanmiɛn, n fali ɔ́ nuan su ndɛ'n su, n niannin i kwlaa nga a kannin'n su n yoli.

¹⁵ Ɔ man kɛ a o ɔ tranwlɛ nun nyanmiɛn su lɔ'n, kpɛ ɔ́ nyin nian Izraɛl b'ɔ ti ɔ nvle'n, nan yo i ye. Yo man asiɛ nga a fa mannin ye'n, ɔ yo kpa kɛ a fa tali e nannan'm be nda'n sa. Afin ɔ waan asiɛ sɔ'n, ɔ ´yo like ye kpa, yɛ i kunngba'n ɔ ´yo nnɛn tawlɛ klanman.»

Izraɛl'n ɔ ti Nyanmiɛn i nvle

¹⁶ «Mmla fanunfanun bɔ ndɛkɛn Anannganman amun Nyanmiɛn'n ɔ'a fa man amun kɛ amun fa su'n yɛ be o lɛ-ɔ. Amun `fa be sie, amun `fa amún wla'n kwlaa gua su, yɛ man amun akunndan'n kwlaa tran su.

¹⁷ Ndɛkɛn amu'an yo man Anannganman amun Nyanmiɛn'n ɔ'a ta amun nda kɛ sɛ amun fɛ i atin'n su'n, sɛ amun fɛ i mmla fanunfanun'n kwlaa amun sie, nan amun ti i aniɛn'n, ɔ ´yo amun Nyanmiɛn.

¹⁸ Ndɛkɛn'n, amun kusu amu'an ta nda kɛ amun ´yo i nvle klonglonglo kɛ ɔ fa kannin'n sa, nan amun ´fɛ i mmla'm bé su.

¹⁹ Anannganman amun Nyanmiɛn'n, ɔ klo kɛ amun nyan nyrun. Ɔ klo kɛ amun nvle'n yo dan nan i dunman'n fu, nan i nyrun ba nyan tra nvle ng'ɔ jrali be asiɛ'n su'n be kwlakwla. I liɛ'n, amun ´yo i nvle klonglonglo kɛ ɔ fa kannin'n sa.»