Mmla'n 25 - NYANMIƐN NDƐ'N 1998

Jɔlɛ i wafa ng'ɔ fata kɛ be di i su'n

¹ Sɛ ndɛ tɔ sran nnyɔn be afiɛn'n nan be fa kɔ jɔlɛ difuɛ'm be ja su'n, nán be bu sran nga i ndɛ'n ɔ yo fɛ'n i fɔ, sanngɛ man be bu ndɛ be yi sran nga i ndɛ yo-man fɛ'n i su.

² Sɛ ɔ fata kɛ be bo sran nga i ndɛ yo-man fɛ'n, man jɔlɛ difuɛ'n ɔ yo man sran sɔ'n ɔ la asiɛ wun, nan be `nian sa ng'ɔ yoli'n su be `bo i bo su i nyrun lɛ.

³ Sanngɛ nán be bo i tra ngble nuan ablanan. Sɛ be tra su'n, wuun sokpalɛ yɛ amun niaan'n ɔ'a sokpa amun afiɛn lɛ-ɔ.

Nannin b'ɔ si ble'n i su ndɛ

⁴ Nannin b'ɔ ´bo ble'n, nán be cici i nuan'n su .

Angboti b'ɔ lɛ-man ba i su mmla

⁵ Sran yasua nnyɔn bɔ be ti aniaan bɔ be tran likawlɛ'n, sɛ kun ɔ'a wu-man ba nan ɔ wu'n, nán man i angboti'n ɔ ko ja awlo uflɛ nun sran. Sanngɛ man yasua'n i niaan bian'n yɛ ɔ jɛ i angboti nin-ɔn.

⁶ Kpɛkuun ba klikli nga be wu i'n, man ɔ yo bian ng'ɔ wuli'n i wa nan be `fɛ i dunman'n be tɔn i. I liɛ'n, sran ng'ɔ wuli'n i dunman'n su nunnun-man Izraɛl mɛn'n nun.

⁷ Sɛ sran ng'ɔ wuli'n i niaan'n waan ɔ jɛ-mɛn i angboti'n, man bla'n ɔ wɔ klɔ'n i anuan'n nun lɔ kan be kan ndɛ lɔ'n, ɔ `ko to kpɛnngbɛn mun nan ɔ `se be kɛ: «Min bian'n waan i niaan'n i dunman'n ɔ mlin. I waan ɔ sin-man i niaan'n i ajalɛ nun ja-man min.»

⁸ Sɛ kpɛnngbɛn'm be flɛ i be kan, nan ɔ fite i nuan kɛ: «Ɛɛn! N waan n fɛ-mɛn i'n,»

⁹ man bla'n wunnge i wun lɔ. Ɔ `yi bian'n i ja ngbabua'n, nan ɔ ti i nuan nzue tɛ i nyrun kpɛnngbɛn'm be nyrun lɛ, kpɛkuun ɔ kan sie su kɛ: «Sran nga i waan i niaan'n i osu'n ɔ nunnun'n, kɛ be yo i sa.»

¹⁰ Kpɛkuun man be flɛ sran sɔ'n i awlo'n kɛ: «Sran bɔ be yili i ja ngbabua'n i awlo .»

Like finlɛ b'ɔ ti-man kpa'n

¹¹ Sɛ sran yasua nnyɔn be su tu ngondin, nan kun nga be su bo i'n i yi'n ba i delɛ'n, sɛ ɔ to i sa'n tra bian'n kun'n i yasua lika'n,

¹² man be kpɛ bla sɔ'n i sa'n, nán be si i aunnvuɛ.

Nanwlɛ dilɛ aata dilɛ'n nun

¹³ Jayɛbuɛ b'ɔ ti-man su'n, bɔ be fa di ndrunmun'n, nán man wie tran amun pata nun.

¹⁴ Nán amun ninnge sunnzunliɛ'n yo nnyɔn-nnyɔn, nán kun yo dan tra kun.

¹⁵ Man amun jayɛbuɛ'n ɔ yo sɛsɛ, man amun ninnge sunnzunliɛ'n ɔ yo sɛsɛ nan amu'an cɛ asiɛ nga Anannganman amun Nyanmiɛn'n ´fa man amun'n su.

¹⁶ Be kwlaa nga be di ndrunmun'n, Anannganman amun Nyanmiɛn'n i nyin ci be.

Amalɛkfuɛ'm be ti Izraɛlfuɛ'm be kpɔfuɛ mun tititi

¹⁷ Nán amún wla fi sa nga amun fin Ezipt lɔ amun ´ba atin'n su'n bɔ Amalɛkfuɛ'm be yoli amun'n.

¹⁸ Kɛ be nian bɔ afɛ'n ɔ'a ti amun'n, be ko bu sali atin'n nun, be fali alɛ'n wlali kokowa bofuɛ bɔ be kasiɛn lɔ'n be sin . B'a sro-man Nyanmiɛn.

¹⁹ I sɔ'n ti'n, amun wa ju mɛn nga Anannganman amun Nyanmiɛn'n ɔ'a fa man amun'n i nun lɔ. Cɛn nga Anannganman amun Nyanmiɛn'n yo man amun di alaje amun kpɔfuɛ nga be mantan amun lɛ'n bé sa nun'n, amun `nunnun Amalɛk i osu'n mɛn'n nun. Nán be bo bé su be di jɔlɛ kun. Nán amun wla fi ndɛ nga.