Mmla'n 24 - NYANMIƐN NDƐ'N 1998

Bla nga be yrɛ i'n i su ndɛ

¹ Sɛ sran kun ja bla nan cɛn kun ju kpɛkuun i waan bla'n ɔ'a yo sa wie b'ɔ ti-man su'n, nan i ti ɔ klo-mɛn i kun'n, man ɔ klɛ fluwa wlɛ i sa nun kɛ ɔ'a yrɛ i. I sin man ɔ kan bla'n i bo i awlo'n nun.

² Kɛ bla'n ɔ jaso yasua i awlo'n nun ɔ kɔ'n, sɛ i waan ɔ ko ja bian uflɛ-ɔ ɔ yo ye.

³ Sɛ i sɔ bian liɛ'n waan ɔ klo-mɛn i kun'n, nan ɔ klɛ fluwa wlɛ i sa nun kɛ ɔ'a yrɛ i'n, sɛ ɔ kan bla'n i bo i awlo'n nun'n, wie kusu sɛ bian kasiɛn'n sɔ'n ɔ wu'n,

⁴ bian klikli ng'ɔ dun mmua yrɛli i'n, ɔ lɛ-man atin kɛ ɔ ko fɛ i yo i yi ekun. Kɛ bɔ sran uflɛ nin i b'a la'n, ɔ'a yo fiɛn. Sɛ ɔ yo sɔ'n ɔ ti tete Anannganman nyrun. Nán amun saci asiɛ bɔ Anannganman amun Nyanmiɛn'n wa fa man amun'n.

Sran nga ɔ'a ja bla uflɛ-uflɛ'n i wun ndɛ

⁵ Sran nga ɔ'a ja bla uflɛ-uflɛ'n, nán man ɔ wɔ sonja. Nán be miɛn i kɛ ɔ yo junman uflɛ. Man ɔ trɛn i awlo lɔ afuɛ nuan kun nan ɔ yo man i yi i klun jɔ.

Aowa wlalɛ i wun ndɛ

⁶ Be kwla fa-man sran kun i ble silɛ yɛbuɛ nin'n wla-man aowa, yɛbuɛ ba'n bɔbɔ be kwla fa-man. Sran ng'ɔ fɛ i sɔ'n, wuun be se kɛ ɔ'a fa sran sɔ'n i nguan'n bɔbɔ ɔ'a wla aowa.

Sran je tralɛ i wun ndɛ

⁷ Sɛ amun wun sran kun kɛ ɔ'a trɛ i niaan Izraɛlfuɛ kun je, nan ɔ'a fɛ i ɔ'a yo i kanga'n annzɛ kusu ɔ'a yo i atɛ'n, amun `kun i sɔfuɛ'n. Amun `yi sa tɛ'n amun afiɛn kɛ ng'ɔ o lɛ'n sa.

Kokowe'n i wun ndɛ

⁸ Like nga Nyanmiɛn nyrun jranfuɛ bɔ be ti Levifuɛ'm be kle amun kɛ sɛ kokowe yo amun-ɔn, amun `yo'n, man ɔ yo amun cinnjin. Nga n kan kleli be'n, amun `nian su yo.

⁹ Nán amún wla fi sa nga kɛ e fin Ezipt lɔ e fiteli'n bɔ e ´ba atin'n su'n Anannganman amun Nyanmiɛn'n fa yoli Mari'n .

Aowa wlalɛ i wun ndɛ ekun

¹⁰ Sɛ amun wiengu wie usa afɛ amún sa nun'n, nán amun wlu i awlo lɔ ko fa afɛ sɔ'n i su aowa'n.

¹¹ Amun `jran gua su wa man sran ng'ɔ usali bosia'n i bɔbɔ ɔ fa aowa'n blɛ amun.

¹² Sɛ sran sɔ'n ti yalɛfuɛ'n, nan ɔ fɛ i kondro'n ɔ wla aowa'n, nán aliɛ cɛn i aowa'n su.

¹³ Kɛ sɛnzɛ'n ɔ tɔ cɛ'n, amun `fɛ i kondro'n `ko mɛn i man ɔ la fa kɛtɛ i su nan ɔ yra amun nguan. Sɛ amun yo i sɔ'n, sa kpa dan kun yɛ amu'an yo i Anannganman amun Nyanmiɛn'n i nyrun lɛ-ɔ.

Nán amun bu yalɛfuɛ'n i lufle

¹⁴ Nán amun nian kɛ amun junman difuɛ'n ti yalɛfuɛ b'ɔ lɛ-man nyrun'n ti amun bu i lufle. Sɛ ɔ ti Izraɛlfuɛ o, sɛ ɔ ti aofuɛ wie b'ɔ tran amun mɛn'n nun klɔ kun su o, nán amun bu i lufle.

¹⁵ Amun `fɛ i akatua'n be `mɛn i cɛn kwlakwla. Amun `fa mɛn i, nan wia'n ɔ'a tɔ, afin ɔ lɛ-man wie, sɛ i sa kɛn i ndɛndɛ'n, ɔ ´yo i fɛ. Sɛ ɔ'a yo-man sɔ nan ɔ sanman amun Anannganman sa nun'n, wuun amu'an yo sa tɛ.

Man sran kun bɔbɔ wu i sa tɛ'n i nuan

¹⁶ Ɔ fata-man kɛ sa tɛ bɔ sran kun ɔ'a yo'n ti, be kun i si, annzɛ sɛ siɛ'n kusu yɛ ɔ yoli sa'n, ɔ fata-man kɛ be kun i wa'n i ti. Sran ng'ɔ yo sa tɛ'n, i bɔbɔ yɛ ɔ fata kɛ be kun i-ɔ .

Yalɛfuɛ'm be ukalɛ mmla

¹⁷ Nán amun bu aofuɛ annzɛ aika ba'n i ndɛ kwlɛ. Nán amun fa angboti bla'n i kondro'n wla aowa.

¹⁸ Nán amún wla fi kɛ amun yoli kanga Ezipt lɔ yɛ Anannganman deli amún-ɔn. I sɔ'n ti yɛ n fa mmla nga man amun kɛ amun nian su amun nanti nin-ɔn.

¹⁹ Sɛ amun kpɛ amun ble'n annzɛ amun ɔrz'n nan amún wla fi sɔlɛ kun fie su lɔ'n, nán amun sa amún sin ko fa. Man ɔ ka lɔ nan aofuɛ mun nin aika ba mun, ɔ nin angboti bla mun be fa. I liɛ'n, Anannganman amun Nyanmiɛn'm ɔ ´yo man junman kwlaa nga amun di'n ɔ ´yo kpa.

²⁰ Kɛ amun ko ti amun olivie mma mun ko sin'n, nán amun sa amún sin kɔ titi kunngun ng'ɔ kali amún sin'n i kun. Man i nga'n ɔ ka lɛ'n, aofuɛ mun nin aika mma mun, ɔ nin angboti bla mun be ti be fa.

²¹ Kɛ amun ko ti amun vinyi mma mun ko sin'n, nán amun sa amún sin nian-nian nun kun. Man i nga ɔ ka lɛ'n, aofuɛ mun, nin aika mma mun, nin angboti bla mun be ti be fa.

²² Nán amún wla fi kɛ amun yoli kanga Ezipt mɛn'n nun lɔ. I sɔ'n ti yɛ n fa mmla nga man amun kɛ amun nian su amun nanti nin-ɔn.