Mmla'n 23 - NYANMIƐN NDƐ'N 1998

¹ Sran kun lɛ-man atin b'ɔ ´jɛ i si i yi-ɔ. Ɔ ti kɛ ɔ'a kpaja i si i bo kondro'n sa.

Be nga b'ɔ fata-man kɛ be tran Anannganman i sran'm be nun'n

² Sran nga i ndɔnman'n ti kpɔtɔwa'n, ɔ nin sran nga i yasua lika'n ti kpɛwa kpo'n, nán man ɔ tran Anannganman i nvle'n nun.

³ Tekle ba'n, nán man ɔ wlu Anannganman i nvle'n nun. I osu nunfuɛ nga be ´jaso su lele b'ɔ ´fa ju i anunmannunman'm be akpasua blu su'n, nán be tran Anannganman i nvle'n nun.

⁴ Amɔnfuɛ mun nin Moabfuɛ mun'n, nán be wlu Anannganman i nvle'n nun. Nán be wlu nun lele nan kɛ ɔ yo-ɔ ɔ'a yo-ɔ. Be osu nunfuɛ nga be ´jaso su lele b'ɔ ´fa ju be anunmannunman'm be akpasua blu su'n, nán be wlu nun.

⁵ Afin i nun nga amun fin Ezipt lɔ amun ´ba'n, kɛ be `fa aliɛ nin nzue be `kpa amun atin nan be `sɔ amun nun'n, b'a yo-mɛn i sɔ. Be tuli Bɛɔr i wa Balaam b'ɔ o Pɛtɔr'n Mezopotami mɛn'n nun lɔ'n, kɛ ɔ wa bo amun sannzan. I ti be mɛnnin i sika.

⁶ Sanngɛ Anannganman amun Nyanmiɛn'n, kɛ b'ɔ klo amun'n ti ɔ'a kplin-man Balaam su. Sannzan bɔ be waan Balaam ɔ bo'n, ɔ'a bo-man. Sanngɛ Anannganman amun Nyanmiɛn'n man ɔ yrɛli i nuan klanman mannin amun. Afin Anannganman amun Nyanmiɛn'n ɔ klo amun .

⁷ Ɔ mɛn i ti'n, sɛ Amɔnfuɛ nin Moabfuɛ sɔ'm be wun ´jɔ be o, sɛ be ´di alaje o, nán man i sɔ'n ɔ mian amun sa nan kɛ ɔ ´yo-ɔ ɔ'a yo-ɔ.

⁸ Sanngɛ nán amun yo Edɔmfuɛ'm be finfin. Be ti amun niaan. Nán amun yo Eziptfuɛ'm be finfin, afin be sikeli amun i nun bɔ amun trannin be mɛn'n nun lɔ'n.

⁹ Sɛ nvle nnyɔn sɔ'm be nunfuɛ o amun mɛn'n nun'n, be anunman sian'm be kwla wlu Anannganman i nvle'n nun.

Ngblaliɛ'n i saun yolɛ

¹⁰ Sɛ amun nin amun kpɔfuɛ mun amun ´ko kun'n nan sɛ amun kpɛ amun ngblaliɛ'n, nán amun yo man like fiɛn wie fi kan amun.

¹¹ Sɛ amun nun kun i wun nzue gua kɔnguɛ'n, wuun fiɛn ɔ'a kɛn i, nán man ɔ tran amun ngblaliɛ'n nun lɛ, man ɔ fite.

¹² Nnɔsua nun'n, man ɔ sa nzue wunnzin, kɛ wia'n ko tɔ'n, wuun ɔ su sɛ i sin ba.

¹³ Amun `sie lika kun ngblaliɛ'n i tiwa su lɔ. Lɔ yɛ amun wɔ atin nun-ɔn.

¹⁴ Sɛ amun ´kɔ alɛ kunlɛ'n, amun `fa sue kan amun `sie amun trɔ'n nun. I liɛ sran kwlaa nga i waan ɔ ´kɔ atin nun'n, ɔ ´fɛ i sue'n kpɛ kunman. Kpɛkuun sɛ ɔ wie atin nun kɔ'n, ɔ ´kata i waka su'n su.

¹⁵ Man amun ngblaliɛ'n yo saun, afin Anannganman amun Nyanmiɛn'n nin amun yɛ ɔ o lɛ-ɔ. I yɛ ɔ sasa amun-ɔn, i yɛ ɔ yo man amun nyan kwlalɛ amun kpɔfuɛ'm bé su-ɔ. Sɛ ɔ wun like ng'ɔ yo-man nyɛnmɛn'n, ɔ ´jaso amún sin.

Kanga b'ɔ wanndi'n i su ndɛ

¹⁶ Sɛ sran wie i kanga'n ɔ wanndi ɔ ba amun mɛn'n nun wa'n nan ɔ wa talo amun'n, nán amun trɛ i mɛn i min'n.

¹⁷ Man ɔ tran amún wun lɛ, man ɔ sike lika ng'ɔ klo kɛ ɔ sike lɛ'n, man ɔ tran klɔ ng'ɔ klo kɛ ɔ ´tran su'n su. Nán amun yo i tɛtɛ.

Tekle bolɛ'n i su ndɛ

¹⁸ Nán Izraɛl yasua fi bo tekle. Bla'm be kusu nán man be bo tekle.

¹⁹ Sɛ yasua wie annzɛ bla wie, ɔ seli kɛ ɔ ´man Anannganman amun Nyanmiɛn'n i like wie'n, nán amun kplin su kɛ ɔ fa tekle bolɛ'n i nuan like yɛ ɔ fa man-an. Afin Anannganman amun Nyanmiɛn'n i nyrun'n, i sɔ sran'm be ti tete bofuɛ.

Asubo'n i su ndɛ

²⁰ Sɛ amun niaan Izraɛlfuɛ wie usa amun afɛ'n, sɛ sika o, sɛ aliɛ o, sɛ like uflɛ wie o, nán amun se kɛ ɔ su i bo.

²¹ Aofuɛ mun yɛ sɛ be usa afɛ amun sa nun'n, amun se be kɛ be su i bo-ɔ. Sanngɛ sɛ amun niaan Izraɛlfuɛ'm be usa afɛ amun sa nun'n, amun lɛ-man atin se-man be kɛ be su i bo. I liɛ'n, Anannganman amun Nyanmiɛn'n ɔ ´yo man junman kwlaa nga amun ´di i lika nga amun ´ko fɛ i lɔ'n nun'n, ɔ ´yo ye amún sa nun.

Anannganman i nda talɛ

²² Sɛ a ta Anannganman i nda kɛ a ´cɛ i like wie'n, nán man ɔ cɛ nan w'a yiɛ i nuan. Sɛ ɔ'a yo-man sɔ'n, Anannganman ɔ Nyanmiɛn'n ɔ usa wɔ nun, kpɛkuun wuun sa tɛ yɛ w'a yo i lɛ-ɔ.

²³ Sɛ a ta-man Nyanmiɛn i nda'n, ɔ ti-man tɛ.

²⁴ Sanngɛ sɛ ɔ klun klo a ta Nyanmiɛn nda'n, nian ng'ɔ fin ɔ́ nuan fiteli'n su yo i cɛ.

Waka mma nga be kwla ti'n i su ndɛ

²⁵ Sɛ a ´kɔ lika wie nan a wlu ɔ wiengu kun i vinyi fie nun'n, sɛ ɔ waan a ´di vinyi mma'n lele nan ɔ ku yi'n, a kwla di. Sanngɛ nán fa wie gua ɔ trɔ nun kɔ.

²⁶ Sɛ kusu a kɔ ɔ wiengu wie i ble fie nun'n, sɛ ɔ waan a ´kpɛ wie'n, fa ɔ́ sa ngbɛn kpɛ. Sanngɛ nán fa ble kpɛlɛ laliɛ'n fa kpɛ.