Mmla'n 22 - NYANMIƐN NDƐ'N 1998

Be wiengu i like b'ɔ mlin'n

¹ Sɛ ɔ wiengu kun i nannin wie annzɛ i bua wie, annzɛ kusu i boli wie ɔ'a mlin nan a ko fite su'n, nán sɛn i wun kɔ, trɛ i blɛ ɔ wiengu'n.

² Sɛ ɔ wiengu sɔ'n i lika'n ɔ o mmua'n annzɛ kusu sɛ a si-mɛn i'n, fa nnɛn'n bla wɔ awlo, man ɔ ka ɔ́ wun lɛ. Cɛn nga i min'n usɛ i osu'n fa mɛn i.

³ Sɛ ɔ wiengu wie i aflunmun annzɛ i kondro mlin'n, like kwlaa ng'ɔ ti ɔ wiengu liɛ bɔ ɔ'a mlin'n, sɛ a ko fite su'n, yo i sɔ sa kunngba'n, nán sɛn i wun kɔ.

⁴ Sɛ a wun kɛ ɔ wiengu kun i aflunmun annzɛ i nannin ɔ'a tɔ'n, nán san bé wun kɔ, ukɛ i amun man su.

Mmla fanunfanun mun

⁵ Nán man bla ɔ wla yasua tralɛ. Yasua kusu nán man ɔ wla bla tralɛ. Be kwlaa nga be yo i sɔ like'n, wuun b'a bo tete Anannganman amun Nyanmiɛn'n i nyrun.

⁶ Sɛ a ´kɔ lika nan a ko fite anunman sua wie su waka su annzɛ asiɛ wun'n, sɛ anunman ba annzɛ anunman klenzua o nun, nan sɛ anunman nin'n utu bé su'n, nán fa anunman nin'n nin i mma mun.

⁷ Sɛ ɔ waan a fɛ i mma mun'n, a ko fa be sanngɛ yaci be nin'n i nun man ɔ wɔ. Sɛ a yo sɔ'n, ɔ wun ɔ ´jɔ wɔ fɔuun yɛ ɔ nguan nyanman'n ɔ ´yo tɛnndɛn.

⁸ Sɛ amun kplan sua uflɛ'n, amun kplan talɛ kaan kun i ti su aunngban fawlɛ i nuan su tɛɛn man ɔ sin yiɛ i. Ɔ'a yo-man sɔ'n, sɛ sran wie flo lɔ tɔ ɔ wu'n, kpɛkuun be ´se kɛ wɔ yɛ a kunnin i-ɔ.

⁹ Nán fa like uflɛ ta ɔ vinyi fie nun, sɛ ɔ'a yo-man sɔ'n, fie'n nun ninnge'n ngba ´yo Anannganman liɛ, i vinyi mma o, i like nga a fa tali i vinyi fie'n nun'n nin o.

¹⁰ Nán fa nannin kun nin aflunmun kun cici be saru kun su likawlɛ kɛ be tutu lika .

¹¹ Nán wla tralɛ nga be fa nnɛn ndrɛ ɔ nin lɛn be sanngannin nun yɛ be wuli'n.

¹² Yo kondro nga a fa kata ɔ wun'n i cɔnjɔ nnan'm be nuan su njɔlɛ.

Bla su ndɛ

¹³ Sɛ sran kun ja bla, nan sɛ ɔ nin i be si sua kwlaa, kpɛkuun ɔ klo-mɛn i kun'n,

¹⁴ sɛ ɔ kpɛ suɛn tɛ i wun'n, sɛ ɔ saci i dunman se kɛ: «Kɛ n jali bla nga bɔ e nin i e sili sua'n, n wunnin i kɛ ɔ nin bian b'a la le'n,»

¹⁵ man talua'n i si nin i nin be fa like ng'ɔ kle kɛ ɔ nin bian ɔ'a la-man laa le'n, man be fa wɔ klɔ'n i anuan'n nun lɔ kan be di jɔlɛ lɔ'n, be `fa like sɔ'n ko kle klɔ'n su kpɛnngbɛn mun.

¹⁶ Man bian'n se kpɛnngbɛn'm be kɛ: «N fali mín wa'n m mannin bian nga kɛ ɔ jɛ i, kpɛkuun ɔ klo-mɛn i kun.

¹⁷ I ti ɔ kpɛ suɛn tɛ i wun kɛ yoo: ‹N wunnin i kɛ ɔ́ wa'n ɔ nin bian b'a la le.› Yɛ kusu like ng'ɔ kle kɛ ɔ nin bian ɔ'a la-man laa'n yɛ.»

¹⁸ Kpɛkuun man be tra yasua'n be bo i.

¹⁹ Izraɛl talua kun bɔ ɔ'a saci i dunman'n ti be `de i like, be `de i jɛtɛ mma ya. Be `fɛ i sɔ sika'n be `man talua'n i si'n. Man ɔ jɛ i. Kɛ b'a ja lɛ yɛ b'a ja-a, ɔ yaci i-ɔ ɔ yo-man ye kun.

²⁰ Sanngɛ sɛ ɔ nin bian lali sakpa'n, nan b'a kwla wun-mɛn i jrɛiin kɛ ɔ nin bian b'a la-man'n,

²¹ man be fɛ i wɔ i si i sua'n nyrun lɔ, nan klɔ'n sufuɛ'm be `finfin i yɛbuɛ be `kun i. Kɛ b'ɔ o i si awlo lɔ bɔ tekle yɛ ɔ bo'n, b'ɔ yo tete sa Izraɛl mɛn'n nun'n, i ti man ɔ wu. Amun `tu sa tɛ'n amun afiɛn kɛ ng'ɔ o lɛ'n sa.

²² Sɛ yasua kun kunndɛ bla kun b'ɔ lɛ bian'n nan be ko fite bé su'n, man be kun be sran nnyɔn'n, bian ng'ɔ kunndɛ bla'n nin o, bla'n nin o. Amun `tu sa tɛ'n Izraɛl mɛn'n nun kɛ ng'ɔ o lɛ'n sa.

²³ Sɛ talua b'ɔ nian si-man bian bɔ b'a trɛ i ase, sɛ yasua kun wun i klɔ nun nan ɔ nin i be la'n,

²⁴ amun `fa be sran nnyɔn'n be wɔ klɔ'n i anuan'n nun lɔ, amun `finfin be yɛbuɛ man be wu. Talua'n i kunlɛ liɛ'n, i bo yɛlɛ kɛ ɔ'a kpan-man man klɔ'n nunfuɛ'm b'a ti-man. Yasua'n i liɛ'n yɛlɛ kɛ ɔ'a sokpa i wiengu kun i bla'n bɔ ɔ'a trɛ i ase'n. Amun `tu sa tɛ'n amun afiɛn kɛ ng'ɔ o lɛ'n sa.

²⁵ Sanngɛ sɛ yasua'n wunnin talua sɔ'n, bɔ wienun-ɔn ɔ trɛli i nan ɔ nin i b'a la kekle nun'n, yasua'n i kunngba yɛ amun `kun i-ɔ.

²⁶ Nán amun yo talua'n i like fi. Talua'n nin kunlɛ fata-man, ɔ ti kɛ sran kun bɔ i wiengu kun tɔ i su kun i'n sa.

²⁷ Yasua'n toli talua'n i blo lɔ. Wienun-ɔn talua'n ɔ kpannin yɛ ɔ'a nyan-man sran ɔ'a de-mɛn i-ɔ.

²⁸ Sɛ yasua kun wun talua wie b'ɔ nian si-man bian bɔ kusu be nian trɛ-mɛn i ase'n, sɛ ɔ trɛ i ɔ miɛn i kpɛkuun ɔ nin be la nan be wun be'n,

²⁹ man sran ng'ɔ nin i be lali'n, ɔ `fa jɛtɛ mma ablenun man talua'n i si'n. Man ɔ `ja bla'n. Kɛ ɔ nin i lali kekle nun'n ti, kɛ b'a ja lɛ'n yɛ b'a ja-a, ɔ yaci i-ɔ ɔ yo-man ye.