Mmla'n 21 - NYANMIƐN NDƐ'N 1998

Sran bɔ be si-man sran ng'ɔ kunnin i'n i su ndɛ

¹ Sɛ amun wo mɛn nga Anannganman amun Nyanmiɛn'n ɔ'a fa man amun kɛ amun fa'n i nun'n, nan amun ´nian-an, fuɛn yɛ ɔ la asiɛ wun yɛ'n, bɔ wienun-ɔn be si-man sran ng'ɔ kunnin i'n,

² man amun klɔ kpɛnngbɛn mun nin jɔlɛ difuɛ'm be wɔ be ko sunnzun kan fuɛn'n la lɛ'n nin klɔ nga be mantan lɛ'n be afiɛn'n.

³ Kpɛkuun man klɔ ng'ɔ mantan fuɛn'n i koko'n i su kpɛnngbɛn'm be fa nannin bla kun bɔ be nian fa di-man junman le, bɔ be nian sie-mɛn i kɔmin su waka le'n.

⁴ Man klɔ'n i su sran kpɛnngbɛn'm be fa nannin bla sɔ'n be wɔ nzue ba wie nuan. Man ɔ yo nzue ba bɔ i nun nzue'n wie-man nun, bɔ kusu be nian di-mɛn i nuan su fie le'n. Kpɛkuun man be fin i kɔmin su like be bu i.

⁵ Kpɛkuun man Nyanmiɛn nyrun jranfuɛ bɔ be ti Levi i osu nunfuɛ mun'n be bla. Afin be yɛ Anannganman amun Nyanmiɛn'n ɔ kpali be kɛ be su i nan be yra sran'm be nguan i dunman nun nin-ɔn. Sɛ akplowa tɔ'n, annzɛ sɛ be yo sran wie like'n, be yɛ be ´kɛn i nun ndɛ nin-ɔn.

⁶ Man klɔ sɔ'n b'ɔ mantan fuɛn'n koko'n i su kpɛnngbɛn'm be kwlaa be wunnzin bé sa nun `gua nannin bla bɔ be fali like finnin i kɔmin sin nzue ba'n i nuan su lɛ'n i su.

⁷ Kpɛkuun be `se kɛ: «Nán e yɛ e kunnin sran nin-ɔn. Be ´kun i-ɔ y'a wun-man nun.

⁸ Anannganman, yaci Izraɛl b'ɔ ti ɔ nvle'n i wun sa'n cɛ. Afin wɔ yɛ a deli i-ɔ. Sɛ sran sɔ'n ɔ'a yo-man sa yɛ be kunnin i'n, nán bu ɔ sran'm be fɔ i dunman nun ti.» Kpɛkuun Nyanmiɛn ɔ ´yaci be wun sa'n cɛ be.

⁹ I sɔ nun'n, wuun amun ´yo ng'ɔ ti sɛsɛ Anannganman nyrun'n, amun ´yi sran ng'ɔ kunnin sran nga ɔ'a yo-man sa'n, i fɔ'n amún su.

Bla nga be trɛli i lomuɛn i jalɛ'n i su ndɛ

¹⁰ Sɛ amun nin amun kpɔfuɛ mun amu'an ɔ alɛ kunlɛ'n, bɔ Anannganman amun Nyanmiɛn'n ɔ'a fa be ɔ'a man amun bɔ amu'an tra be lomuɛn'n,

¹¹ kpɛkuun amun nun kun ɔ ´nian bla'm be nun-ɔn, ɔ'a wun klanman kun, kpɛkuun ɔ'a klo i'n, yɛ i waan ɔ ´fɛ i yo i yi'n,

¹² man ɔ fɛ i wɔ i awlo lɔ, man bla'n ɔ yi i ti'n, yɛ ɔ kpɛkpɛ i sa bui'm bé su.

¹³ Kpɛkuun man ɔ yi i wun kanga tralɛ'n. Man ɔ ka yasua'n i awlo lɛ, man ɔ sun i si nin i nin anglo kun. Kɛ yasua'n nin i be ko si sua'n, wuun ɔ su fɛ i fa yo i yi.

¹⁴ Sɛ yasua'n waan ɔ klo-mɛn i kun'n, ɔ `yaci i nun man ɔ wɔ. Sanngɛ ɔ lɛ-man atin ɔ yo-mɛn i atɛ fa nyan-man sika su, kusu ɔ lɛ-man atin fɛ-mɛn i yo-mɛn i kanga, afin ɔ'a dun mmua ɔ'a miɛn i ɔ'a jɛ i kekle nun.

Like ng'ɔ ti ba kpɛnngbɛn'n i liɛ'n i su ndɛ

¹⁵ Sɛ sran kun lɛ bla nnyɔn nan ɔ klo kun kpɛkuun ɔ klo-man kun'n, sɛ ɔ nin bla nnyɔn sɔ'm be wu ba yasua'n, sɛ bla ng'ɔ lɛ-man klolɛ'n i wa liɛ'n yɛ ɔ ti kpɛnngbɛn'n,

¹⁶ cɛn nga yasua'n ɔ ´fɛ i sa nun ninnge mun ´man i mma mun'n, ɔ lɛ-man atin ɔ fa-man aja ng'ɔ ti ba yasua kpɛnngbɛn'n i liɛ'n ɔ fa man-man bla ng'ɔ klo i'n i wa liɛ'n.

¹⁷ Man ɔ si kɛ bla ng'ɔ klo-mɛn i'n i wa liɛ'n yɛ ɔ ti kpɛnngbɛn-ɔn. Sɛ ɔ bu i sa nun ninnge'm be nun'n, man ɔ fɛ i bue nnyɔn mɛn i, afin i yɛ ɔ ti i gbanflɛn'n nun ba nin-ɔn. Ɔ man ba yasua kpɛnngbɛn'n i aja'n ti i bɔbɔ i liɛ.

Ba bɔ i nyin ti kekle'n i ndɛ

¹⁸ Sɛ sran kun i wa'n i nyin ti kekle'n, bɔ i nyin yi-man sran'n, bɔ i si nin i nin be kan ndɛ kle i-ɔ ɔ ti-man'n, bɔ be tu i fɔ-ɔ ɔ fa-man'n,

¹⁹ man i si nin i nin be trɛ i nan be fɛ i be wɔ klɔ'n su kpɛnngbɛn'm be ja su klɔ'n i anuan'n nun lɔ ndɛ kanwlɛ lɔ.

²⁰ Nan be `se klɔ'n su kpɛnngbɛn'm be kɛ: «E wa nga i nyin ti kekle, i nyin yi-man sran, wlaka nin nzanboɛ'n yɛ i waan be fa mɛn i-ɔ.»

²¹ Kpɛkuun man klɔ'n su sran'm be kwlaa be finfin i yɛbuɛ be kun i. Amun `tu sa tɛ'n amun afiɛn kɛ ng'ɔ o lɛ'n sa. Izraɛlfuɛ'm be kwlaa be ´ti, kpɛkuun srɛ ´kun be.

Sran nga be bo i kɔmin'n i fuɛn'n

²² Sɛ sran kun yo sa tɛ nan ɔ nin kunlɛ fata bɔ amu'an bo i kɔmin'n,

²³ nán man i fuɛn'n ka waka'n su lɛ. Amun `ka lɛ be `sie i le kunngba'n nun, afin sran nga be bo i kɔmin'n, wuun Nyanmiɛn boli i sannzan. Ɔ man nán amun fa saci asiɛ nga Anannganman amun Nyanmiɛn'n ɔ'a fa man amun'n .