Mmla'n 20 - NYANMIƐN NDƐ'N 1998

Alɛ'n su mmla

¹ Sɛ amun ´kɔ alɛ kunlɛ'n, nan amun ´nian-an, amun kpɔfuɛ'm be nnɛn kpanngɔ mun, nin be kakaklolo'm be kpanngban ɔ tra amun liɛ'n, nán amun sro be, afin Anannganman amun Nyanmiɛn b'ɔ fali amun Ezipt mɛn'n nun lɔ bali'n, ɔ nin amun wo nun.

² Kɛ alɛ'n wa bo i bo'n, man Nyanmiɛn nyrun jranfuɛ'n ɔ jran amun nyrun ɔ kan ndɛ kle amun.

³ Man ɔ se kɛ: «Izraɛlfuɛ mun, amun `sie amun su. Alɛ'n yɛ amun nin amun kpɔfuɛ'm be su wa kun i ndɛ yɛ. Nán srɛ kun amun, nán amún wun usu-usu amun, nán amún sa sin bubu amun, nán amun wawɛ'n ɔ wanndi amún sin.

⁴ Afin Anannganman amun Nyanmiɛn'n ɔ nin amun yɛ ɔ ´kɔ-ɔ. Sɛ amun nin amun kpɔfuɛ mun amun ´kun'n, ɔ ´uka amun, ɔ ´man amun kwlalɛ .»

⁵ Kpɛkuun man alɛ su kpɛnngbɛn'm be usa alɛ kunfuɛ'm be kɛ: «?Wan yɛ ɔ'a kplɛn i sua uflɛ-uflɛ b'ɔ nian la-man nun-ɔn? Man ɔ sɛ i sin wɔ i awlo. Nán man alɛ'n ɔ di i nan sran uflɛ yɛ ɔ tran nun-ɔn.

⁶ ?Wan yɛ ɔ dili i vinyi fie b'ɔ nian ti-man i vinyi i su mma nin-ɔn? Man ɔ sɛ i sin wɔ i awlo. Nán man alɛ'n ɔ di i nan sran uflɛ yɛ ɔ ti i vinyi'n i su mma'n.

⁷ ?Wan kusu yɛ ɔ'a sie bla wie ja su yɛbuɛ b'ɔ nian jɛ-mɛn i-ɔ? Man ɔ sɛ i sin ɔ wɔ i awlo. Nán man alɛ'n ɔ di i nan sran uflɛ yɛ ɔ fa bla sɔ nin-ɔn.»

⁸ Man alɛ su kpɛnngbɛn'm be usa ekun kɛ: «?Wan yɛ srɛ kun i-ɔ? ?Yɛ wan yɛ i klun titi i-ɔ? Man ɔ sɛ i sin ɔ wɔ i awlo, nán man ɔ bubu i wiengu'm bé sa sin.»

⁹ Kɛ alɛ su kpɛnngbɛn'm be ko wie ndɛ'n kan'n, man be siesie sran nga be ko nian sonja akpasua'm be su'n.

¹⁰ Sɛ amun nin klɔ kun amun su wa kun alɛ'n, kɛ amun ju i wun lɔ'n, amun `dun mmua se lɔfuɛ'm be kɛ: «Amun man e siesie e afiɛn.»

¹¹ Sɛ be se amun kɛ be tili'n nan be tike be anuan'n man amun'n, wuun klɔ'n sufuɛ'm be kwlaa be ti amun liɛ. Be ´yo amun kanga.

¹² Sɛ be waan be kplin-man nan alɛ'n yɛ be nin amun ´kun'n, amun `taka amun ngblaliɛ'n klɔ'n wun lɛ.

¹³ Kpɛkuun Anannganman amun Nyanmiɛn'n ɔ ´fa klɔ sɔ'n man amun. Kpɛkuun amun `kun yasua'm be kwlakwla kpan.

¹⁴ Bla mun, nin ba kanngan mun'n, nin nnɛn mun'n, ɔ nin klɔ'n nun ninnge'm be liɛ'n, amun `fa be. Amun kpɔfuɛ nga Anannganman amun Nyanmiɛn'n fa be man amun'n, an `fa bé bo ninnge mun, be ti amun liɛ.

¹⁵ Klɔ nga be nun-man sran nga Anannganman fali be mɛn'n mannin amun'n be lika'm be nun'n, bɔ be o amún wun mmua'n, sɛ amun nin be kun'n, amun `yo be sɔ.

¹⁶ Sanngɛ mɛn nga Anannganman amun Nyanmiɛn'n fa mannin amun kɛ amun fa be'n, be liɛ'n, sɛ amun nin klɔ kun sufuɛ'm be kun alɛ'n, nán amun yaci like ba kun sa nguan nun.

¹⁷ Ɛtfuɛ mun, nin Amɔrfuɛ mun, nin Kanaanfuɛ mun, nin Ferezfuɛ mun, nin Evfuɛ mun, nin Zɛbisfuɛ mun'n, amun `bo be mɛn'n kɛ Anannganman amun Nyanmiɛn'n kan kleli amun'n sa.

¹⁸ Sɛ ɔ yo sɔ'n, i liɛ'n, be su kle-man amun tete sa bɔ be yo be man be amuɛn mun'n, yɛ amun su yo-man sa tɛ Anannganman amun Nyanmiɛn'n i wun.

¹⁹ Sɛ amun waan amun nin klɔ kun amun ´kun'n nan amun ´fa'n, kɛ amun ´kpɛ i wun ngblaliɛ'n, nán amun saci i fie'm bé su waka mun. Nán amun bu be. Amun `di bé su mma mun, sanngɛ nán amun kpɛ bé bo. ?Waka b'ɔ o fie'n su lɔ'n, sran-an nan se kɛ a nin i be ´kun alɛ?

²⁰ Waka nga amun si kɛ be di-man bé su mma'n, be yɛ amun `kpɛ be bo-ɔ. Amun `fa kplan klɔ nga amun nin i kun'n i wun like wie bɔ amun fu su nan amu'an nyɛn i.