Mmla'n 2 - NYANMIƐN NDƐ'N 1998

¹ Kpɛkuun e sali é sin e fali ndɛma jenvie i atin'n, e ɔli aawlɛ flɛnnɛn'n nun lɔ kɛ Anannganman fa kan kleli min'n sa. E sinnin Seir oka'n wun lɛ, e cɛli lɛ lɔuun kpa.

Izraɛlfuɛ'm be aawlɛ flɛnnɛn'n nun lɔ tranlɛ ndɛ'n

² Yɛ Anannganman seli min kɛ:

³ «Amu'an cɛ oka'n wun lɛ lɔun, amun `sin be wɔ nglo lɔ bue liɛ'n su.

⁴ Se Izraɛlfuɛ'm be kɛ: ‹Amun niaan Ezau i osu nunfuɛ bɔ be tran Seir'n be mɛn'n nun yɛ amun wa sin-ɔn. Be ´sro amun, sanngɛ amun `nian amún wun kpa.

⁵ Nán amun se kɛ amun nin be ´kun alɛ. Afin n su fa-man be mɛn'n i lika fi man-man amun, n su man-man amun lika bɔ kaan sa bɔ amun taka be ja su-ɔ. Seir oka'n ti Ezau liɛ, n fa mɛnnin i.

⁶ Aliɛ nga amun ko di'n, amun ´yi sika be ´to nan amu'an di. Nzue nga amun ko nɔn'n bɔbɔ, amun ´yi sika be ´to i bé sa nun nan amu'an nɔn.› »

⁷ Afin like nga amun yoli bɔ Anannganman amun Nyanmiɛn'n man ɔ'a yo-man ye'n ɔ nun-man lɛ. Ɔ niannin amun su aawlɛ flɛnnɛn dan nga i kpɛlɛ'n nun. Afuɛ ablanan nga amun dili'n nun'n, Anannganman amun Nyanmiɛn ɔ'a kpɔci-man amun le. Like fi ɔ'a mian-man amún sa.

⁸ Ɔ man y'a sin-man e niaan Ezau i osu nunfuɛ bɔ be tran Seir lɛ lika'n nun'n bé wun koko. Y'a fa-man kongo'n nun atin'n, yɛ y'a sin-man Elat nin Ɛzɔn-Gebɛr klɔ'm bé wun koko. E sali e sin nan y'a kpɛ Moab aawlɛ flɛnnɛn'n.

⁹ Yɛ Anannganman seli min kɛ: «Nán amun klɔklɔ Moabfuɛ mun. Nán amun se kɛ amun nin be ´kun alɛ. N su man-man amun lika fi be mɛn'n nun. Afin Ar mɛn'n ti Lɔt i osu nunfuɛ'm be liɛ, n fa mannin be.»

¹⁰ Laa Emfuɛ mun yɛ be tran lɛ-ɔ. Emfuɛ'm be ti nvle dan kun. Be sɔnnin, kpɛkuun be ti sran jajraajra kpa kɛ Anakfuɛ'm be sa.

¹¹ Sran wie'm be bu i kɛ be ti Rɛfafuɛ mun kɛ Anakfuɛ mun sa. Sanngɛ Moabfuɛ'm be flɛ be kɛ Emfuɛ.

¹² Seir lika'n kusu Ɔrfuɛ mun yɛ be tran nun laa-a, i sin Ezau i osu nunfuɛ'm be wa deli lika sɔ'n bé sa nun, be nunnunnin be nan b'a tran be osu. Lika nga bɔ Anannganman fa mannin Izraɛlfuɛ mun'n, i nun bɔ be ´ko tran nun'n, sa kunngba sɔ'n yɛ be yoli-ɔ, be tuli lɔfuɛ mun yɛ be nunnunnin be.

¹³ Anannganman seli e kɛ: «Siɛn'n, amun `jaso be `kpɛ Zerɛd nzue ba'n,» yɛ e kpɛli i-ɔ.

¹⁴ Kɛ e fɛli i Kadɛs-Barnea lɔ bɔ e ´fa kpɛ Zerɛd nzue ba'n, e dili afuɛ ablasan-nin-mɔcuɛ. Kɛ ɔ ´ju sɔ'n, wuun alɛ kunfuɛ nga be o lɛ i sɔ blɛ'n nun'n be akpasua liɛ'n ɔ'a wie kɛ Anannganman kan kleli be'n sa .

¹⁵ Anannganman bɔbɔ yoli man be kwlaa sɔ'n be wieli wu be tuli lɛ.

¹⁶ Kɛ wie'n kunnin alɛ kunfuɛ akpasua sɔ'n bɔ be tuli lɛ'n,

¹⁷ Anannganman seli min kɛ:

¹⁸ «Amun `kpɛ Moab awɛ'n siɛn'n, amun `sin Ar mɛn'n nun.

¹⁹ Amun ´kpɛn Amɔnfuɛ'm be mɛn'n i nyrun ndɛnman su, sanngɛ nán amun klɔklɔ be, nán amun se kɛ amun nin be ´kun alɛ. N su fa-man be osu nunfuɛ'm be mɛn'n nun lika'n wie m man-man amun. Lika sɔ'n ɔ ti Lɔt i osu nunfuɛ'm be liɛ, n fa mannin be.»

²⁰ Lika sɔ'n, sran'm be waan ɔ ti Rɛfafuɛ'm be liɛ laa, afin lalafuɛ nun'n Rɛfafuɛ'm be trannin lɛ. Amɔnfuɛ'm be flɛ be kɛ Zamzimfuɛ.

²¹ Be nvle'n ti dan, be sɔnnin, kpɛkuun be ti jajraajra kɛ Anakfuɛ'm be sa. Anannganman nunnunnin be mannin Amɔnfuɛ mun. Amɔnfuɛ'm be deli sran sɔ'm be lika'n be trannin be osu.

²² Like nga Anannganman yoli mannin Ezau i osu nunfuɛ bɔ be o Seir'n yɛ ɔ o lɛ-ɔ. Ɔ nunnunnin Ɔrfuɛ mun mannin be. Yɛ be kusu be fuannin Ɔrfuɛ sɔ mun, nan b'a tran be osu. Lele ndɛ be tɛ o lɛ.

²³ Avafuɛ'm be kusu bɔ be tran Gaza bue liɛ'n su'n, sran wie'm be fin Kaftɔr be wa nunnunnin be, nan b'a tran be osu.

²⁴ Anannganman seli e kɛ: «Amun `jaso amun `wɔ, amun `kpɛ Arnɔn nzue ba'n. An `nian, Siɔn b'ɔ ti Amɔrfuɛ'n b'ɔ ti Ɛsbɔn famiɛn'n ɔ nin i mɛn'n, m'an fa be m'an wla amún sa nun. Amun `bo i falɛ bo. Amun `fa alɛ wla be sin.

²⁵ Kɛ ɔ fin ndɛ'n, n wa yo man asiɛ wunmuan'n su nvle'm be nunfuɛ'm be kwlaa be ´sro amun. Kɛ be ti amun ngan'n, be ´usu, be wla'n ´bo.»

Izraɛlfuɛ'm be Siɔn famiɛn'n i mɛn'n i falɛ

²⁶ Kɛ e o Kɛdemɔt aawlɛ flɛnnɛn'n nun lɔ'n, n sunmannin sran Siɔn b'ɔ ti Ɛsbɔn famiɛn'n i sin kɛ be `ko se i wɛtɛɛ su kɛ:

²⁷ «Man e atin man e sin ɔ mɛn'n nun. Atin'n su trelele yɛ e ´sin-ɔn, e su sin-man bɛ su, e su sin-man fama su.

²⁸ Aliɛ nga e ko di'n, e ´yi sika e ´to yɛ e ´di-ɔ. Nzue nga e ko nɔn'n, e ´yi sika e ´to yɛ e ´nɔn-ɔn. Atin'n bɔ kunngba yɛ e waan a `fa man e nan e `sin su-ɔ.

²⁹ Like nga Ezau i osu nunfuɛ bɔ be tran Seir'n nin Moabfuɛ bɔ be tran Ar mɛn'n nun'n be yo mannin ye'n, i kunngba'n yɛ e waan a `yo man ye-ɔ. I liɛ'n, e ´kpɛ Zurdɛn'n e ´kpɛn lika nga Anannganman e Nyanmiɛn'n fa mannin ye'n nun.»

³⁰ Sanngɛ Siɔn b'ɔ ti Ɛsbɔn famiɛn'n waan nán i yɛ ɔ ko yaci e nun e ko sin-ɔn. Kannzu Anannganman amun Nyanmiɛn'n yɛ ɔ keteli i anwlɛn nin-ɔn, kɛ ɔ ´yo nan amu'an kwlɛ i nan amu'an fɛ i mɛn nga amun o nun ndɛkɛn yɛ'n ti.

³¹ Anannganman seli min kɛ: «Nian, kɛ ɔ fin ndɛ'n, m'an fa Siɔn nin i mɛn'n m'an man amun. An `bo be lika'n i falɛ bo.»

³² Siɔn nin i alɛ kunfuɛ'm be fali alɛ buli e nyrun Zaaz lɔ.

³³ Anannganman e Nyanmiɛn'n fɛli i wlali é sa nun, nan y'a kwlɛ i, nin i mma mun, ɔ nin i alɛ kunfuɛ mun.

³⁴ E kali é ja osu kunngba'n nun lɛ e fali be klɔ'm be ngba. E nunnunnin be su sran mun. I yasua o, i bla o, i bakan o, e nunnunnin be kwlakwla kpan. Y'a yaci-man sran ba kun sa lɛ.

³⁵ Sanngɛ e fali be su nnɛn mun, yɛ e fɛnnin be nun ninnge mun, e fali be ekun.

³⁶ Kɛ ɔ fɛ i Arɔɛr b'ɔ o Arnɔn nzue ba'n i nuan'n, ɔ nin klɔ ng'ɔ o kongo nun'n lɔ lele b'ɔ ´fa ju Galaad mɛn'n nun'n, klɔ ba kun sa ɔ'a kwla jran-man e nyrun. Anannganman e Nyanmiɛn'n fali be kwlakwla mannin ye.

³⁷ Sanngɛ y'a kan-man Amɔnfuɛ'm be mɛn'n, y'a kan-man lika ng'ɔ o Zabɔk nzue ba'n i wia afiliɛ lɔ'n nin oka'm bé su klɔ mun. Lika nga Anannganman e Nyanmiɛn'n waan nán e kan be'n, y'a kan-man wie fi.