Mmla'n 19 - NYANMIƐN NDƐ'N 1998

Fiawlɛ klɔ mun

¹ Kɛ Anannganman amun Nyanmiɛn'n ko nunnun sran nga ɔ'a fa be mɛn'n ɔ'a man amun'n, bɔ amun ko tran be klɔ'm be su nin bé sua'm be nun'n,

² amun `sie mɛn sɔ'n nun klɔ nsan be ngunmin.

³ Amun `kpɛ mɛn'n nun nsan, amun `yi klɔ nsan sɔ'm bé su atin. Kɛ ɔ ´yo nan sran kwlaa ng'ɔ kun sran'n ɔ'a wanndi ɔ'a ɔ bé su ɔ'a ko fia'n ti.

⁴ Sran ng'ɔ kun i wiengu b'ɔ ´wanndi b'ɔ ´nyɛn i ti'n, yɛlɛ sran nga i sran kunlɛ sɔ'n yoli sanvuɛsa, bɔ ɔ'a bu-man sran'n i wun akunndan tɛ laa'n.

⁵ Wienun-ɔn, sran nnyɔn b'a ɔ blo waka kpɛlɛ. Be nun kun mɛn i kpɛliɛ su kɛ ɔ ´kpɛ waka, kpɛkuun i kpɛliɛ ba'n ɔ'a flo ɔ'a ko kpɛ i wiengu'n, kpɛkuun i wiengu ɔ'a wu. Man sran ng'ɔ kunnin sran sɔ'n ɔ wanndi ɔ klɔ sɔ'n kun su nan ɔ'a nyɛn i ti.

⁶ Sɛ ɔ'a yo-man sɔ'n, sɛ sran ng'ɔ kunnin sran'n i atin'n wali ngboko, ɔ cɛ-man nan sran ng'ɔ tu sran ng'ɔ wuli'n i klunngbɔ'n ɔ'a fa ya ɔ'a su sran ng'ɔ kunnin sran'n i su. Sɛ ɔ to i-ɔ, ɔ ´kun i ngbɛn, kusu wuun ɔ'a bu-mɛn i wiengu'n i wun akunndan tɛ ɔ'a sie-man ti yɛ ɔ kunnin i-ɔ. Ɔ nin wulɛ fata-man.

⁷ I ti n kan kle amun, amun `sie klɔ nsan ngunmin nan be `yo fiawlɛ klɔ.

^8-9 Mmla nga n ´fa sie amun nyrun'n yɛ'n, sɛ amun fa be kwlaa su'n, sɛ amun klo Anannganman amun Nyanmiɛn'n, nan amun fɛ i atin'n su'n, ɔ wa man amun lika dan. Mɛn nga ɔ kan kleli amun nannan'm be kɛ ɔ ´fa man amun'n, sɛ ɔ fɛ i wunmuan'n man amun'n, amun `fa klɔ nsan ekun `uka nsan klikli'm bé su.

¹⁰ Kɛ ɔ ´yo nan sran nga ɔ'a yo-man sa tɛ'n, b'a kun-mɛn i mɛn nga Anannganman amun Nyanmiɛn'n ɔ'a fa man amun kɛ amun tran nun'n i nun, nan ɔ'a yo-man kɛ amun ti yɛ b'a kun i'n ti.

¹¹ Sanngɛ sran ng'ɔ bu i wiengu kun wun akunndan tɛ sie'n, b'ɔ bu sa i nyrun nan ɔ yo i like wie nan ɔ wu'n, sɛ i sɔ sran'n ɔ wanndi ko fia klɔ sɔ'm be nun kun su'n,

¹² klɔ'n su kpɛnngbɛn'm be `sunman sran kɛ be ko trɛ i, kpɛkuun be `fɛ i wla sran ng'ɔ wuli'n i klunngbɔ tufuɛ'n i sa nun, nan ɔ kun i.

¹³ Nán amun si i sɔfuɛ'n i aunnvuɛ. Sran nga i wiengu ɔ'a yo-man sa, b'ɔ kun i'n, amun `kun i wie man ɔ tu Izraɛl mɛn'n nun, nan amu'an di alaje.

Awɛ'm bé su ndɛ

¹⁴ Mɛn nga Anannganman amun Nyanmiɛn'n ɔ'a fa man amun kɛ amun tran nun'n, i nun asiɛ nga sran kun nyɛnnin i kɛ be ´cɛcɛ i klikli nun'n, nán ɔ tu i awɛ'n `wɔ i sin.

Lalofuɛ'm bé su ndɛ

¹⁵ Sɛ sran kun ɔ kun sran annzɛ sɛ ɔ yo sa tɛ uflɛ wie'n, nan sran kunngba yɛ ɔ di i wun lalo'n, be kwla jran-man su be bu-mɛn i fɔ. San sɛ sran nnyɔn, annzɛ sran nsan yɛ be di i wun lalo'n, yɛ be kwla jran su-ɔ.

¹⁶ Sɛ sran kun jaso di i wiengu kun wun lalo kɛ ɔ'a yo sa tɛ wie'n

¹⁷ nan akplowa tɔ be afiɛn'n, man be sran nnyɔn'm be wɔ Nyanmiɛn i sua'n nun lɔ, nan be kan be ndɛ Nyanmiɛn nyrun jranfuɛ mun nin jɔlɛ difuɛ nga be o lɛ'n be nyrun.

¹⁸ Man jɔlɛ difuɛ'm be usa-usa ndɛ sɔ nun kpa sran'm be sa nun, sɛ be wun i kɛ lalofuɛ'n ɔ tɔnnin i wiengu'n i suɛn'n,

¹⁹ sa nga i waan ɔ ´tɔn i niaan'n i suɛn nan be `fa yo i'n, yɛ be `fa yo i bɔbɔ-ɔ. Amun `yo man sa tɛ'n tu amun afiɛn kɛ ng'ɔ o lɛ'n sa.

²⁰ Kɛ be nga'm be ´ti'n, srɛ wa kun be. Kpɛkuun be su yo-mɛn i sɔ sa tɛ'n amun afiɛn kun.

²¹ Nán amun si i sɔ abɔlɛfuɛ'm be aunnvuɛ. Amun `tu be fɔ. Sɛ sran kun ɔ kun sran'n, be `kun i wie sie i osu. Sɛ ɔ bo sran kun nyinma'n, be `bo i liɛ'n wie sie i osu. Sɛ ɔ tu sran je'n, be `tu i liɛ'n wie sie osu. Sɛ ɔ bu sran sa'n, be `bu i liɛ'n wie sie osu. Sɛ ɔ bu sran ja'n, be `bu i liɛ'n wie sie osu.