Mmla'n 18 - NYANMIƐN NDƐ'N 1998

Levi i osu nunfuɛ'm be like liɛ nga be lɛ'n i su ndɛ'n

¹ Nyanmiɛn nyrun jranfuɛ bɔ be ti Levifuɛ'n, be nin Levi akpasua sufuɛ'm be kwlakwla, be liɛ nun-man Izraɛl asiɛ'n nun wie. Be like liɛ nga be ´nyɛn i'n, yɛlɛ ndidiɛ ninnge nga be o yɛ mun'n: tɛ nga be yi be man Anannganman, ɔ nin ninnge uflɛ nga be ti Anannganman liɛ mun.

² Be su nyan-man asiɛ'n wie Izraɛlfuɛ'm be nun. Be like liɛ bɔ be lɛ i'n, yɛlɛ Anannganman i sulɛ kɛ ɔ fa kan kleli be'n sa.

³ Like ng'ɔ ti bɔ Izraɛlfuɛ'm be `fa man Nyanmiɛn nyrun jranfuɛ'm be yɛ: sɛ be kun nannin tola, annzɛ bua, annzɛ boli be fa yi tɛ be man Anannganman'n, i walɛ'n nin i aoje'n, ɔ nin i fle'n be ti be liɛ.

⁴ Amun ble klikli, nin amun nzan lɔflɛ klikli, nin amun ngo klikli nga amun nyɛn i'n, ɔ nin amun bua ndrɛ klikli nga amun kpɛkpɛ'n, amun `fa man be.

⁵ Afin be yɛ Anannganman amun Nyanmiɛn'n ɔ niannin amun akpasua'm be nun, nan ɔ'a kpa be nin be osu nunfuɛ'm be kɛ be jrɛn i nyrun nan be su i titi nin-ɔn.

⁶ Sɛ Levifuɛ kun tran Izraɛl klɔ wie su nan i waan ɔ ´tu lɛ kɔ lika nga Anannganman i Nyanmiɛn'n kleli i'n nun lɔ'n,

⁷ man ɔ su Anannganman i Nyanmiɛn'n kɛ i niaan Levifuɛ nga be jran Anannganman nyrun lika sɔ'n nun lɔ'n sa.

⁸ Like nga be nyɛn i lɔ be di'n, i kunngba'n yɛ ɔ ´nyɛn i-ɔ, sanngɛ sɛ ɔ lɛ i aja like wie nan ɔ yo i atɛ'n, i sika'n ti i liɛ .

Sran ng'ɔ tɔn i wun suɛn kɛ ɔ ijɔ Nyanmiɛn nuan'n, nin sran ng'ɔ ti Nyanmiɛn nuan ijɔfuɛ sakpa'n bé wun ndɛ

⁹ Sɛ amun ju mɛn nga Anannganman amun Nyanmiɛn'n ɔ'a fa man amun'n i nun lɔ'n, tete sa nga lɔ sran'm be yo'n, nán amun nian su yo wie.

¹⁰ Nán amun nun wie fɛ i wa yasua annzɛ i wa bla ɔ yi i sin nun kɛ ɔ fa sɔ amuɛn. Nán amun nun wie di bae annzɛ ɔ yi wunnzue.

¹¹ Nán amun nun wie cici sran annzɛ ɔ nin wunmiɛn be ijɔ. Nán amun yo fuɛn kannganfuɛ.

¹² Sran nga be yo i sɔ sa'n, wuun b'a bo tete Anannganman nyrun. I sɔ tete sa'm be ti yɛ Anannganman amun Nyanmiɛn'n ɔ ´fa nvle nga'm be mɛn'n ´man amun nin-ɔn.

¹³ Amun liɛ'n, amun `nanti Anannganman amun Nyanmiɛn'n i atin'n su seiin.

¹⁴ Sran nga amun wa fa be mɛn'n be liɛ'n, be lafi wunnzue yifuɛ'm be su. Amun liɛ'n, Anannganman amun Nyanmiɛn'n ɔ kplin-man su kɛ amun yo i sɔ sa mun.

¹⁵ Anannganman amun Nyanmiɛn'n ɔ wa man amun i nuan ijɔfuɛ kun kɛ min sa b'ɔ ti amun nvle'n nunfuɛ. Amun `fa ndɛ ng'ɔ ´kan'n su.

¹⁶ Kɛ e yiali Orɛb lɔ'n, ndɛ nga amun bɔbɔ amun kan kleli Anannganman amun Nyanmiɛn'n yɛ ɔ lɛ-ɔ. Amun seli i kɛ: «E su kwla tie-man Anannganman i nɛn'n sa cɛn'n kwlakwla. E su kwla nian-man sin dan nga sa titi. Ɔ ´yo sɔ san e ´wu.»

¹⁷ Nan Anannganman ɔ'a se min kɛ: «Ng'ɔ fin bé nuan fiteli lɛ'n ti kpa.

¹⁸ N wa man be min nuan ijɔfuɛ kun kɛ wɔ sa. Ɔ ´yo be nvle'n nunfuɛ kun. N ´fa min ndɛ'n n ´wlɛ i nuan. Ndɛ kwlaa nga n fa mɛn i kɛ ɔ kan'n, ɔ ´kan kle be.

¹⁹ Sran nga i waan ɔ ti-man min ndɛ ng'ɔ kɛn i min dunman nun'n, e nin i e ´kan.

²⁰ Sran nga kusu b'ɔ di wlɛwlɛ ɔ fa min dunman'n fa kan ndɛ nga m'an se-mɛn i kɛ ɔ kan'n, annzɛ b'ɔ kan ndɛ amuɛn wie dunman nun'n, i sɔfuɛ'n be ´kun i.»

²¹ Wienun-ɔn, amun ´usa amún wun kɛ: «?E ´yo sɛ nan y'a si kɛ nán Anannganman yɛ ɔ kannin ndɛ nga-a, annzɛ i yɛ ɔ kannin-ɔn?

²² Sran nga i waan ɔ ti Anannganman nuan ijɔfuɛ b'ɔ fa Anannganman dunman fa kan ndɛ wie kpɛkuun ndɛ sɔ'n ɔ'a kpɛn-man su'n, wuun nán Anannganman yɛ ɔ kannin-ɔn. Sran sɔ'n bɔbɔ yɛ ɔ dili wlɛwlɛ kannin ndɛ sɔ nin-ɔn. Nán srɛ kun amun i wun.»