Mmla'n 17 - NYANMIƐN NDƐ'N 1998

¹ Nannin annzɛ bua, annzɛ boli nga lɛ o i wun'n, nán amun fa yi tɛ man Anannganman amun Nyanmiɛn'n. I sɔ'n ti tete like i nyrun.

² Klɔ nga Anannganman amun Nyanmiɛn'n fa man amun'n, sɛ amun kɔ lɔ'n, atrɛkpa-a, amun nun yasua wie, annzɛ bla wie ɔ ´yo sa tɛ Anannganman amun Nyanmiɛn'n i wun, yɛ ɔ ´saci aenguɛ ng'ɔ nin amun trali'n.

³ Atrɛkpa-a, ɔ ko sɔ amuɛn wie mun, ɔ ´koto bé bo, annzɛ ɔ ´koto wia, annzɛ anglo, annzɛ nzraama'm bé bo. Nán nga Anannganman kan kleli amun kɛ amun yo'n yɛ ɔ o lɛ-ɔ.

⁴ Sɛ amun ti i sɔ'n, amun `usa-usa nun kpa. Sɛ sran nga amun tili i wun ndɛ sɔ'n ɔ yoli sɔ sakpa'n, sɛ ɔ yoli i sɔ tete sa liɛ'n Izraɛl mɛn'n nun'n,

⁵ sɛ ɔ ti yasua o, sɛ ɔ ti bla o, amun `fɛ i wɔ klɔ'n i anuan nun lɔ, nan amun `finfin i yɛbuɛ man ɔ wu.

⁶ Sran nga be ´kun i'n man i wun lalo difuɛ'n yo nnyɔn annzɛ nsan. Sɛ sran kunngba yɛ ɔ di i wun lalo'n, be kun i-ɔ ɔ yo-man ye .

⁷ Sɛ ɔ ti i kunlɛ'n, lalofuɛ'm be yɛ be `dun mmua fin i yɛbuɛ nan sran'm be kwlaa b'a fin i wie-ɔ. Amun `yi sa tɛ'n amun afiɛn kɛ ng'ɔ o lɛ'n sa.

Ndɛ kekle b'ɔ fata kɛ be kan be Nyanmiɛn i sua'n nun lɔ'n

⁸ Sɛ ndɛ tɛ tɔ klɔ kun su nan be kwla di-man'n, sɛ be kunnin sran, sɛ kannin yɛ be boli sran, annzɛ sɛ ndɛ uflɛ wie yɛ ɔ tɔ'n, amun `fɛ i sɔ ndɛ liɛ'n be `wɔ lika nga Anannganman amun Nyanmiɛn'n ko kle'n nun lɔ.

⁹ Amun `ko wun Levifuɛ bɔ be ti Nyanmiɛn nyrun jranfuɛ mun'n ɔ nin jɔlɛ difuɛ ng'ɔ o lɛ'n be wun. Amun `kan ndɛ'n be kle be man be kle amun i buwlɛ.

¹⁰ Kpɛkuun ndɛ nga be kan kleli amun lika nga Anannganman kleli'n nun lɔ'n, amun `niɛn i kwlaa su kan.

¹¹ Amun `nian mmla nga be kleli amun'n nin ndɛ'n i buwlɛ nga be kleli amun'n i su be `yo. Nán amun yi wie fi ase.

¹² Ndɛ nga Nyanmiɛn nyrun jranfuɛ b'ɔ di junman Anannganman amun Nyanmiɛn'n i sua'n nun'n annzɛ jɔlɛ difuɛ'n be kan'n, sɛ wun tufuɛ wie fa-man su'n, man be kun i sɔfuɛ'n. Amun `yi sa tɛ'n Izraɛl mɛn'n nun kɛ ng'ɔ o lɛ'n sa.

¹³ Kɛ Izraɛlfuɛ'm be ´ti'n, srɛ wa kun be, kpɛkuun sran uflɛ su tu-mɛn i wun sɔ kun.

Famiɛn'n i su mmla mun

¹⁴ Blɛ bɔ amun ko ju mɛn nga Anannganman amun Nyanmiɛn'n ɔ'a fa man amun i nun'n, bɔ amun ko tran nun'n, amun wa se kɛ amun ´sie amun famiɛn kɛ nvle nga be sin yia amun'n be liɛ'n sa .

¹⁵ Sɛ amun ´sie famiɛn'n, amun `fa sran nga Anannganman amun Nyanmiɛn'n ɔ ko kpa'n. Man amun niaan'm be nun kun yɛ ɔ yo amun famiɛn-ɔn. Nán amun fa aofuɛ b'ɔ ti-man amun nvle nunfuɛ'n.

¹⁶ Sanngɛ nán man ɔ nyan nnɛn kpanngɔ kpanngban, nán ɔ sunman sran Ezipt lɔ kɛ be ko to wie nan ɔ nyan wie kpanngban. Anannganman seli amun kɛ nán amun sa amún sin be ɔ Ezipt lɔ kun.

¹⁷ Nán ɔ ja bla kaka nan i ti nun saci. Nán man jɛtɛ ufue nin sika ɔkwlɛ kaka trɛn i sa nun .

¹⁸ Kɛ ɔ ko yo famiɛn'n, man ɔ nian mmla fluwa ng'ɔ o Levifuɛ bɔ be ti Nyanmiɛn nyrun jranfuɛ'm be sa nun'n i su, ɔ `klɛ mmla ng'ɔ o yɛ'n fluwa kun nun.

¹⁹ Man ɔ trɛn i sa nun nan ɔ kanngan nun cɛn kwlakwla, nan i nyin ɔ'a yi Anannganman i Nyanmiɛn'n titi, nan ɔ'a fa mmla sɔ'n i nun ndɛ'm be kwlaa bé su, nan ɔ'a nian bé su ɔ'a nanti.

²⁰ I liɛ'n, ɔ su tu-mɛn i wun guɛ-mɛn i wiengu'm bé su, kpɛkuun ɔ su fɔn-man mmla'n i nun ndɛ'm be nun. Ɔ man ɔ nin i osu nunfuɛ mun be ´cɛ Izraɛl bia'n su.