Mmla'n 16 - NYANMIƐN NDƐ'N 1998

Delɛ-cɛn'n i su ndɛ

¹ Kɛ Abib anglo'n ju'n, amun `di Delɛ-cɛn'n amun `fa manman Anannganman amun Nyanmiɛn'n. Afin Abib anglo'n i kɔnguɛ kun nun yɛ amun Nyanmiɛn'n fali amun Ezipt lɔ bali-ɔ.

² Delɛ-cɛn dilɛ nun'n, amun `wɔ lika nga Anannganman kle kɛ lɛ yɛ ɔ ´tran'n i nun lɔ, amun `kun bua nin boli, ɔ nin nannin be fa man Anannganman amun Nyanmiɛn'n.

³ Nán amun fa kpaun nga be fali kpaun ayre wlali nun'n be di cɛn sɔ'n. Amun `di i nin kpaun nga kpaun ayre nun-man nun'n. Ɔ ti amun ndawlɛ kpaun. Amun `di i sɔ cɛn ba nso. Afin kɛ amun ´fin Ezipt mɛn'n nun lɔ amun ´ba'n, ɔ yoli kplilɛ su. Amun `di i sɔ nan amún wla kpɛn su kɛ amun fin Ezipt mɛn'n nun lɔ bali cɛn kun.

⁴ Cɛn ba nso ng'ɔ o lɛ'n be nun'n, nán be wun kpaun ayre amun mɛn wunmuan'n nun. Nnɛn nga kusu bɔ amun kun i cɛn klikli'n i nnɔsua'n, nán man aliɛ cɛn su.

⁵ Amun lɛ-man atin be di-man Delɛ-cɛn'n mɛn nga Anannganman amun Nyanmiɛn'n fa mannin amun'n i klɔ'n wie fi su.

⁶ Klɔ nga Anannganman amun Nyanmiɛn'n ko kle kɛ lɛ yɛ ɔ ´tran'n, i su yɛ amun `kun Delɛ-cɛn'n i nnɛn'n nan amun di-ɔ. Amun `kun nnɛn'n nnɔsua kɛ sɛnzɛ'n ɔ'a tɔ'n, afin dɔ kunngba sɔ'n su yɛ amun tuli Ezipt lɔ-ɔ.

⁷ Kpɛkuun amun `tɔn be di i lika nga Anannganman amun Nyanmiɛn'n ɔ kle'n i nun lɔ. Kpɛkuun nglɛmun amun `sa amún sin wɔ amun tranwlɛ.

⁸ Amun `di kpaun nga kpaun ayre nun-man nun'n cɛn ba nsiɛn. I le nso'n su'n, amun `yia be manman Anannganman amun Nyanmiɛn'n. Cɛn sɔ'n nun nán amun yo junman fi.

Pantkɔt cɛn dilɛ'n i su ndɛ

⁹ Kɛ amun ko bo ble i kpɛlɛ'n i bo'n, amun bo cɛn'n i kalɛ bo lele man ɔ ju le mɔcuɛ nso,

¹⁰ kpɛkuun amun `di Pantkɔt'n be `manman Anannganman amun Nyanmiɛn'n. Amun klun klo like nga amun ´man'n, amun `nian ye nga Anannganman amun Nyanmiɛn'n yo amun'n su yɛ amun `mɛn i-ɔ.

¹¹ Amun nin amun mma yasua mun, nin amun mma bla mun, nin amun kanga yasua mun, nin amun afanniɛn bla mun, nin Levifuɛ nga amun nin be tran lɛ mun'n, nin aofuɛ nga be sike amun'n, nin aika mma mun, ɔ nin angboti bla nga be nin amun o likawlɛ lɛ'n, amun `wɔ lika nga Anannganman amun Nyanmiɛn'n ko kle kɛ lɛ yɛ ɔ ´tran'n nun lɔ, nan amun `ko di cɛn i nyrun lɔ.

¹² Nán amún wla fi su kɛ laa amun ti kanga Ezipt lɔ. Amun `fa mmla nga be `sie, yɛ amun `nian su be nanti.

Kpata bo tranlɛ cɛn dilɛ i su ndɛ'n

¹³ Kɛ amun ko kpɛ amun ble nin amun ɔrz mun, bɔ amun ko wie amun vinyi mma nzue'n i cuɛn'n, amun `di kpata bo tranlɛ cɛn'n lele cɛn ba nso.

¹⁴ Amun nin amun mma yasua mun, nin amun mma bla mun, nin amun kanga yasua mun nin amun afanniɛn bla mun, nin Levifuɛ mun, nin aofuɛ nga be sike amun'n, nin aika mma mun, ɔ nin angboti bla nga be nin amun tran likawlɛ'n, man cɛn sɔ'n yo amun aklunjuɛ cɛn.

¹⁵ Amun `di cɛn sɔ'n le nso lika nga Anannganman amun Nyanmiɛn'n ɔ kle'n nun, amun `di fa mɛnmɛn i. Amun `yi amun aklunjuɛ i nglo yɛlɛ kɛ Anannganman amun Nyanmiɛn'n yo man amun fie'm be yo kpa, yɛ like kwlaa nga amun yo'n ɔ ´yo ye.

¹⁶ Afuɛ nuan kwlakwla man amun nvle'n nun yasua'm be kwlakwla be wɔ Anannganman amun Nyanmiɛn'n i nyrun kpɛ nsan lika ng'ɔ kle'n nun. Be ko di cɛn nga be o yɛ mun: kpaun nga kpaun ayre nun-man nun'n i cɛn'n dilɛ'n, Pantkɔt, kpata bo tranlɛ i cɛn'n dilɛ'n. Nán amun bla Anannganman i nyrun ɔ nin amun sa ngbɛn.

¹⁷ Sran kun i klun klo like ng'ɔ man'n, ɔ `nian like nga Anannganman i Nyanmiɛn'n mɛnnin i'n su yɛ ɔ `fa man-an.

Sa nuan su yolɛ'n i su mmla

¹⁸ Klɔ nga Anannganman amun Nyanmiɛn'n fa man amun'n, amun `sie be kwlaa su jɔlɛ difuɛ mun, nin mmla su nianfuɛ mun amun akpasua kunngun'm bé su. Man be di sran'm be ndɛ mun nanwlɛ su.

¹⁹ Nán amun bu sran fi ndɛ kwlɛ. Nán amun nian sran nyrun nan amu'an bu ndɛ. Nán amun sɔ adi ninnge'm be nun. Afin ninnge sɔ'm be si akunndanfuɛ'm be nyinma. Yɛ be saci nanwlɛ difuɛ'm be ndɛ kanlɛ'n.

²⁰ Man nanwlɛ dilɛ'n yo cinnjin amún sa nun nan amu'an ka nguan nun, nan amu'an kwla mɛn nga Anannganman amun Nyanmiɛn'n ɔ'a fa man amun'n i fa.

Amuɛn nzuɛn wie bɔ Nyanmiɛn nunnunnin su'n

²¹ Nán amun taka amuɛn b'ɔ ti waka'n i wie fi Anannganman amun Nyanmiɛn'n i sɔwlɛ nga amun kplan'n i wun lɛ.

²² Nán amun taka amuɛn wie i yɛbuɛ. Anannganman amun Nyanmiɛn'n klo-mɛn i sɔ like'n mlɔnmlɔnmlɔn.