Mmla'n 15 - NYANMIƐN NDƐ'N 1998

Kalɛ bɔ be ´yaci cɛ afuɛ nso kwlaa nun i su ndɛ

¹ Afuɛ nso kwlaa ng'ɔ ju'n, amun `yaci amun kalɛ ng'ɔ o sran'm bé su'n `cɛ be.

² Kalɛ'n i yaci cɛlɛ'n i wun ndɛ yɛ. Kɛ be ko bo ndolo kɔ sin kɛ afuɛ nga Anannganman waan be yaci kalɛ'm be cɛ'n yɛ ɔ o yɛ'n, sran kwlaa nga i kalɛ o i wiengu su'n, man ɔ yaci cɛ i. Nán man ɔ miɛn i wiengu'n annzɛ i niaan'n kɛ ɔ tannin i kalɛ b'ɔ o i su'n.

³ Sɛ sran'n ti aofuɛ'n, i liɛ amun kwla miɛn i kɛ ɔ tannin i kalɛ'n, sanngɛ amun niaan'm be liɛ'n, amun `yaci cɛ be.

⁴ Yalɛfuɛ su tran-man amun afiɛn, afin Anannganman amun Nyanmiɛn'n ɔ wa yo amun ye mɛn nga ɔ'a fa man amun kɛ amun ko fa'n nun.

⁵ Sanngɛ ɔ fata kɛ amun ti Anannganman amun Nyanmiɛn'n i aniɛn, nan amun `fa mmla nga m ´man amun ndɛ yɛ'n be su.

⁶ Sɛ Anannganman amun Nyanmiɛn'n ko yo amun ye kɛ ɔ kan kleli amun'n sa'n, amun ´bo nvle sunman be bosia, sanngɛ amun liɛ'n, amun su usa-man afɛ. Amun ´sie nvle sunman, sanngɛ amun liɛ'n, be wie fi su sie-man amun.

⁷ Sɛ amun niaan yalɛfuɛ kun wo amun afiɛn mɛn nga Anannganman amun Nyanmiɛn'n ɔ'a fa man amun'n nun'n klɔ wie su'n, sɛ ɔ usa amun afɛ'n, nán amun kete amun anwlɛn'n, amun `bo i bosia ng'ɔ usa'n.

⁸ Amun `bo i bosia klun-ufue su. Amun `fa ng'ɔ miɛn i sa'n kwlakwla mɛn i.

⁹ Amun `nian amún wun kpa, nán amun bu akunndan tɛ se kɛ: «Afuɛ'n i nso su b'ɔ ti kalɛ'n i yaci cɛlɛ afuɛ'n ɔ'a mantan.» Sɛ ɔ yo sɔ'n, amun su si-man amun niaan yalɛfuɛ'm be aunnvuɛ, kpɛkuun sɛ be srɛ amun like'n, amun su man-man be. Be kusu be ´kpan flɛ Anannganman be ´kan kle i, kpɛkuun Anannganman ɔ ´bu amun fɔ.

¹⁰ Sɛ be usa amun afɛ sɔ'n, amun `fa man be. Amun ´fa man be kusu-ɔ, man ɔ yo amun klun su klanman. Sɛ amun yo i sɔ'n, Anannganman amun Nyanmiɛn'n ɔ ´yo man like kwlaa nga amun yo'n nin junman kwlaa nga amun di'n, ɔ ´yo ye amun sa nun.

¹¹ Yalɛfuɛ sa'n, ɔ ti-man kɛ be ´tu amun mɛn'n nun mlɔnmlɔn. I sɔ'n ti yɛ n kan kle amun kɛ sɛ amun mɛn'n nun yalɛfuɛ annzɛ aunnvuɛfuɛ wie i sa mian like wie wun'n, amun `fa mɛn i nin-ɔn .

Kanga'm be nun yacilɛ ndɛ

¹² Sɛ amun niaan Ebre wie, sɛ bla o, sɛ yasua o, be yo be wun atɛ amun sa nun'n, man be su amun afuɛ nsiɛn. I afuɛ nso su'n, amun `yaci be nun man be wɔ.

¹³ Sanngɛ kɛ amun ´yaci be nun sɔ'n, nán man be toto bé sa be wɔ.

¹⁴ Like nga Anannganman amun Nyanmiɛn'n yoli man amun nyannin be'n, amun `man be wie, amun `man be amun nannin mun, nin bua mun, nin boli mun, nin amun ble, ɔ nin amun nzan'n wie.

¹⁵ Nán amún wla fi kɛ laa amun ti kanga Ezipt mɛn'n nun lɔ yɛ Anannganman amun Nyanmiɛn'n kpɔli amún ti-ɔ. I sɔ'n ti yɛ n fa ndɛ nga n fa sie amun nyrun ndɛkɛn nin-ɔn.

¹⁶ Sɛ amun kanga wie waan ɔ klo amun nin amun osufuɛ'm be sa, sɛ i waan kɛ ɔ nin amun tran'n i klun jɔ ti ɔ ´ka amun wun lɛ'n,

¹⁷ amun `fɛ i mantan anuan'n, kpɛkuun amun `fiti i su'n nin tulie. Kɛ ɔ fɛ i lɛ'n, ɔ ´kaci amun kanga tititi. Sɛ ɔ ti bla o, amun `yo i sɔ wie.

¹⁸ Nán man kanga kun nun yacilɛ'n yo amun ya. Kɛ bɔ ɔ'a su amun afuɛ nsiɛn'n, nga amun nyɛn i su'n, ɔ tra nga bɔ be nyɛn i junman difuɛ bɔ be tannin i kalɛ'n i su'n sɔ kpɛ nnyɔn. Yɛ kusu sɛ amun yaci be nun be kɔ'n, Anannganman amun Nyanmiɛn'n ´yo man like kwlaa nga amun yo'n ɔ ´yo ye amun sa nun.

Nnɛn'm be talua ba yasua'm bé su ndɛ

¹⁹ Amun nannin mun, nin amun bua mun, nin amun boli'm be talua ba yasua mun'n, amun `fa be sie be ngunmin nan amun `fa man Anannganman amun Nyanmiɛn'n. Nán amun fa amun nannin tola ng'ɔ ti talua ba'n be fa di junman. Amun bua nga be ti talua ba yasua'n kusu, nán amun kpɛkpɛ be ndrɛ'n.

²⁰ Afuɛ nuan kwlaa ng'ɔ ju'n, amun nin amun osufuɛ mun amun `wɔ lika nga Anannganman kle nun lɔ nan amun `ko di i sɔ nnɛn mun.

²¹ Sanngɛ sɛ wie ja ti saciwa'n, annzɛ sɛ i nyin ti siwa'n, annzɛ sɛ lɛ uflɛ wie o i wun'n, nán amun fa yi tɛ man Anannganman amun Nyanmiɛn'n.

²² Amun `di i kan amun tran lɔ'n. Sran ng'ɔ ti saun nin o, ng'ɔ ti-man saun nin o, be di wie-ɔ ɔ yo ye. Ɔ ti kɛ wannzannin annzɛ flete wie yɛ be su di sa.

²³ Sanngɛ nán amun di i mmoja fuɛ'n. Amun `guɛ i ase kɛ nzue sa.